រាជធានីភ្នំពេញ ៖ បុរស៣នាក់ ដែលពាក់ព័ន្ធករណីគប់បំបែកកញ្ចក់ថយន្ត និងគំរាមសម្លាប់នារីម្នាក់ដែលជាប្អូនស្រីឧកញ៉ា និងជាជំនួយការមេទាហាន កាលពីព្រឹកថ្ងៃទី៣ មេសា នោះ ត្រូវបានសមត្ថកិច្ចនគរបាលព្រហ្មទណ្ឌក្រសួង ចាប់ខ្លួនបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមច្បាប់ ។
ប្រភពឱ្យដឹងថា ជនសង្ស័យទាំង៣នាក់ ១-ឈ្មោះប៊ុន រតនា ហៅអូន អាយុ៣០ឆ្នាំ ស្នាក់នៅសង្កាត់បឹងកេងកង១ ខណ្ឌចំការមន ២-ឈ្មោះហួន តារារិទ្ធី អាយុ២២ឆ្នាំ ស្នាក់ផ្ទះលេខ៥៧D ផ្លូវលេខ៣៤៨ សង្កាត់ទួលស្វាយព្រៃ១ ខណ្ឌចំការមន និង៣-ឈ្មោះកែវ គុណនរា ហៅតឿ អាយុ២៤ឆ្នាំ ស្នាក់នៅផ្ទះលេខ១៥E0 ផ្លូវលេខលេខ៥ សង្កាត់ផ្សារកណ្តាល១ ខណ្ឌដូនពេញ រាជធានីភ្នំពេញ ។
ទាក់ទិនការចាប់ឃាត់ខ្លួនបុរស៣នាក់នោះ បញ្ជូនទៅសាលាដំបូងនោះ ត្រូវបានសមត្ថកិច្ចឲ្យដឹងថា ដើមបណ្តឹងក្នុងរឿង គឺជានារីមានមុខរបរលក់ឡេម្នាក់ ។ សមត្ថកិច្ចឱ្យដឹងទៀតថា ដើមចមពីដំបូង មានស្ត្រី២នាក់ជាមិត្តភក្តិគ្នា និងប្រកបមុខរបរលក់ឡេលាបខ្លួនដូចគ្នា ។ ក្រោយមក នារីដើមបណ្តឹងជាប្អូនស្រីឧកញ៉ា និងជាជំនួយការមេទាហាន លក់ដាច់ជាងមិត្តភក្តិពេក ធ្វើឱ្យមិត្តភក្តិនោះអន់ចិត្ត កើតក្តីច្រណែនជាមួយគ្នាញឹកញាប់ រហូតមិត្តម្នាក់នោះបានពឹងពាក់បុរស៣នាក់ខាងលើ ឱ្យទៅវាយ និងគប់កញ្ចក់រថយន្តដើមបណ្តឹង ព្រមទាំងបង្ហោះហ្វេសប៊ុកគំរាមថា នឹងសម្លាប់ជាញឹកញាប់ កាលពីថ្ងៃទី១៧ កក្កដា ២០១៦ ។ ដើមបណ្តឹងដំបូង ជិះរថយន្តម៉ាកព្រុស ដល់ពេលគេគុបបែកកញ្ចក់ម្តងទៅ នាងលក់ចោល ហើយក៏ទិញរថយន្តម៉ាកឡិចស៊ីសប្រើវិញ ។
សមត្ថកិច្ចបន្តថា ពេលដើមបណ្តឹងទិញរថយន្តឡិចស៊ីសប្រើ ត្រូវគេចោលបែកកញ្ចក់ម្តងទៀត ពេលនោះដើមបណ្តឹងឆែកកាមេរ៉ាសុវត្តិភាព មើលទៅឃើញមនុស្សដដែលធ្វើសកម្មភាព គប់កញ្ចក់រថយន្តរបស់នាង ។ បន្ទាប់មកនាងបានដូរកញ្ចក់រថយន្តប្រើប្រាស់វិញ ស្រាប់តែថ្ងៃទី ២៤ មីនា ២០១៧ ក្រុមដដែលនោះលបគប់បែកម្តងទៀត ។ ក្រោយមកនៅថ្ងៃទី២៨ មីនា ជនដដែលបានគប់កញ្ចក់រថយន្តរបស់នាងបែកម្តងទៀត សរុបទៅទង្វើដែលបុរស៣នាក់នេះ បានធ្វើទៅលើដើមបណ្តឹងគប់បំបែកកញ្ចក់រថយន្តនាងចំនួន៣ដង ទើបនាងទ្រាំលែងបានក៏ប្តឹងសមត្តកិច្ចឲ្យជួយចាត់ការតាមផ្លូវច្បាប់ ។
បុរសទាំង៣នាក់ក្រោយសមត្ថកិច្ចឃាត់ខ្លួន ត្រូវបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដោយបានចោទប្រកាន់ពីបទធ្វើឲ្យខូចខាតដោយចេតនា និងគំរាមថា និងសម្លាប់ ដែលសំណុំរឿងនេះ ស្ថិតនៅដំណាក់កាលតំណាងអយ្យការកំពុងធ្វើការសាកសួរ ។
ចែករំលែកព័តមាននេះ