ខេត្តកំពង់ឆ្នាំង ៖ ជន្លេន គឺជាសត្វល្មូនក្នុងដីមួយប្រភេទ ដែលគ្រប់គ្នាខ្ពើមរអើមស្ទើរតែមិនហ៊ានប៉ះកាន់នោះទេ ប៉ុន្តែក្រោយពីមានសិប្បកម្មកែច្នៃជន្លេនមួយកន្លែង នៅភូមិអូរសណ្ដាន់ថ្មី ឃុំទឹកហូត ស្រុករលាប្អៀរ បែរជាប្រជាពលរដ្ឋនៅតំបន់នោះ មានឱកាសរកកម្រៃពីសិប្បកម្ម ធ្វើជន្លេននៅទីនោះ ដើម្បីផ្គត់ផ្គង់ជីវភាពគ្រួសារបានល្អប្រសើរទៅវិញផងដែរ។
បើតាមលោកយាយ ប៊ុន ទី អាយុ៦៧ឆ្នាំ បានឲ្យដឹងថា គាត់បានមកធ្វើការនៅក្នុងសិប្បកម្មកែច្នៃជន្លេននេះអស់រយៈពេលជាច្រើនថ្ងៃមកហើយ ដោយក្នុងមួយថ្ងៃគាត់រកចំណូលបានប៉ុន្មានពី៣ទៅ៤ម៉ឺនរៀលពីការលាតសត្វជន្លេនវះរួចហាលលើចង្អើ។ ប៉ុន្តែក្មេងៗមានភាពរហ័សរហួន អាចហាលដល់ទៅជាង២០០ចង្អើរ គ្រាដែលក្នុងមួយចង្អើរមានតម្លៃ៤០០រៀល ឬអាចនិយាយបានថា រកប្រាក់ចំណូលពី៨ទៅ១០ម៉ឺនរៀលក្នុងមួយថ្ងៃ។ ចំណែកក្មេងៗដែលឆ្លៀតពេលទំនេរពីរៀនសូត្រ១ពេលក្នុងមួយថ្ងៃ បានមកធ្វើការហាលជន្លេន ក៏អាចរកចំណូលបានប្រមាណជាង២ម៉ឺនរៀលតែក្នុងមួយពេលផងដែរ។
ស្ត្រីរូបនោះបានបញ្ជាក់ថា នៅក្នុងរោងសិប្បកម្មនេះ មានអ្នកមកធ្វើជន្លេនចន្លោះពី៣០ទៅ៤០ នាក់តែប៉ុណ្ណោះ។ ប៉ុន្តែបើនៅចុងភូមិវិញ មានសិប្បកម្មធ្វើជន្លេនមួយកន្លែងដែរ ដែលមានមនុស្សច្រើនជាងប្រមាណ៦០នាក់ មានន័យថា អ្នកភូមិអូរសណ្ដានថ្មី ប្រមាណ១០០នាក់ បានរកកម្រៃពីសិប្បកម្មកែច្នៃជន្លេននេះ។
បើតាមស្ត្រីម្នាក់ទៀតដែលសុំអនុញ្ញាតមិនបញ្ចេញឈ្មោះ និងជាមេការមើលការខុសត្រូវក្នុងសិប្បកម្មខាងលើ បានឲ្យដឹងថា សិប្បកម្មនេះជារបស់ក្រុមហ៊ុនបរទេសមួយ ដែលបានប្រមូលទិញជន្លេនពីកសិករនៅខែទឹកឡើង ដោយក្នុង១គីឡូក្រាម ថ្លៃពី២៥០០រៀល ទៅ ៣០០០ រៀល។ ប៉ុន្តែពេលខ្លះក៏ទិញដល់ ៤០០០ រៀល ក្នុង១គីឡូក្រាមផងដែរ ប្រសិនបើទិញ.តពីឈ្មួញកណ្ដាលយកមកលក់បន្ត។
ស្ត្រីមេការរូបនោះបានបន្តថា គាត់មិនបានដឹងថា តើសត្វជន្លេនដែលគេប្រមូលទិញរួចយកមកហាលឱ្យស្ងួតនោះ គេយកទៅធ្វើអ្វីនោះទេ? ប៉ុន្តែមានប្រភពមិនច្បាស់ការថា គឺគេយកទៅធ្វើគ្រឿងសំអាងមានដូចជា ឡេ និងក្រែមលាបមាត់ជាដើម។ ចំពោះជន្លេនដែលទិញមក គេឲ្យកម្មករបញ្ចូលក្នុងម៉ាស៊ីនវះជន្លេន រួចយកមកដាក់ឲ្យអ្នកតតម្រៀមលើចង្អើរយកទៅហាល។ នៅពេលឆ្អើក្រៀម សត្វជន្លេនដែលមិនមានប្រឡាក់អំបិលនោះ ត្រូវបានច្រកក្នុងការ៉ុងហើយដឹកទៅភ្នំពេញ ឬបន្តដឹកទៅប្រទេសណាទៀត គាត់មិនដឹងនោះទេ។ ប៉ុន្តែសត្វជន្លេនដែលសិប្បកម្មនេះធ្វើ គឺក្នុងមួយឆ្នាំបានតែមួយរដូវទេ ក្នុងខែទឹកឡើង ដែលធ្វើបានតែ៣ខែប៉ុណ្ណោះ ក្រៅពីខែនោះ គឺគ្មានជន្លេនធ្វើទៀតនោះទេ។
ទោះយ៉ាងណាក៏ដោយចុះ បើតាមការអង្កេតជាក់ស្ដែងទាំងមនុស្សចាស់ និងក្មេងៗនៅតំបន់នោះ អាចរកកម្រៃពីការធ្វើការងារនៅក្នុងសិប្បកម្មជន្លេននេះ ក្នុងម្នាក់ចន្លោះពី៣ទៅ១០ម៉ឺនរៀលដែរ ក្នុង១ថ្ងៃ ដែលអាចបញ្ជាក់បានថា បានជួយផ្គត់ផ្គង់ជីវភាពបានមួយគ្រាដែរ៕
ចែករំលែកព័តមាននេះ