ខេត្តព្រះសីហនុ៖ គឺជារឿងសោកសង្រេង​ថ្មីមួយទៀត ដែល​ស្ត្រីម្នាក់ ជិះម៉ូតូទៅទទួល​កូន ចេញពីរៀន ក្នុងក្រុងព្រះសីហនុ ក៏ត្រូវរថយន្តកុងតឺន័រ បុកស្លា.ប់ ដោយកិន​ខ្ទេចទាំងម៉ូតូ និង​ខ្ទេចទាំងសាកស.ព។ កុងតឺ​ន័រនោះ បានបើកវ៉ាជែង ហើយ​​ចូល​ចំណែក​ផ្លូវ​ខាងស្តាំរបស់​ស្ត្រីរងគ្រោះ ក៏បុក​កិន​ដល់ចញ្ចើមផ្លូវតែម្តង​។

គ្រោះថ្នាក់ចរាចរណ៍នោះ បានកើតឡើង នៅផ្លូវជាតិលេខ៤ ម្តុំចំណោតអូរត្រាវ ឃុំបិតត្រាំង ស្រុកព្រៃនប់ ខេត្តព្រះសីហនុ កាលពីម៉ោងជិត ៦ល្ងាច ថ្ងៃទី១៧ ខែតុលា ឆ្នាំ២០២២ នេះ។

សមត្ថកិច្ចបញ្ជាក់ថា គ្រោះថ្នាក់ចរាចរណ៍នេះ បានកើតឡើងរវាងរថយន្ដកុងតឺន័រ ០១គ្រឿង ដែលមាន​ក្បាលរថយន្តពាក់ផ្លាកលេខ ព្រះសីហនុ 3A-5829 បើកបរទិសដៅ ចេញពីក្រុង​ព្រះសីហនុ មកដល់ចំណុចកើតហេតុ រថយន្តនេះ បានវ៉ាឡើងជែង ក៏ទៅបុកម៉ូតូជនរងគ្រោះ ម៉ាកHONDA PCX ពណ៌ស គ្មានផ្លាកលេខ ទិសដៅផ្ទុយគ្នា ដែលមានអ្នកបើកបរ ឈ្មោះ ផាន់ រ័ត្នធឿន ភេទស្រី អាយុ ៣៦ឆ្នាំ ស្នាក់នៅបណ្ដោះអាសន្ន ក្នុង​ភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ បណ្តាលឲ្យស្រីរងគ្រោះ ស្លា.ប់ ដោយឡានកិនខ្ទេចសាកស.ព នៅនឹងកន្លែង។ ដោយឡែក អ្នកបើកបររថយន្ដកុងតឺន័រ បានចុះ រត់គេចខ្លួនបាត់ ក្រោយពេលកើតហេតុ៕