ខេត្តមណ្ឌលគិរី ៖ កុមារ២នាក់បងប្អូនបង្កើតត្រូវស្លាប់យ៉ាងវេទនាបំផុតនៅក្នុងភ្នក់ភ្លើង ខណៈពួកគេកំពុងដេកលង់លក់ក្នុងដំណេក ហើយក៏ត្រូវអគ្គិភ័យឆាបឆេះផ្ទះទាំងកណ្តាលរាត្រីមិនអាចរត់ចេញទាន់ កើតឡើងកាលពីវេលាម៉ោង១០ និង១០នាទីយប់ថ្ងៃទី២៣ មីនា ២០១៧ ស្ថិតនៅភូមិខ្ញែង ឃុំចុងផ្លាស់ ស្រុកកែវសីមា ខេត្តមណ្ឌលគិរី ។
ប្រភពឱ្យដឹងថា ក្មេងរងគ្រោះដែលស្លាប់ ម្នាក់ឈ្មោះយ៉ឹម ផល្លី អាយុ៤ឆ្នាំ និងក្មេងស្រីឈ្មោះយ៉ឹម ផល្លា អាយុ២ឆ្នាំ មានឪពុកឈ្មោះពាក យ៉ឹម អាយុ២៥ឆ្នាំ និងម្តាយឈ្មោះប៊ុន ភន អាយុ២៤ឆ្នាំ ទាំងឪពុកម្តាយនិងកូនតូចៗជាជនជាតិភ្នង ។ ផ្ទះដែលត្រូវភ្លើងឆេះនេះមានទទឹង៦ម៉ែត្រ បណ្ដោយ៧ម៉ែត្រ ។ នៅក្នុងផ្ទះមានស្រូវ៤០បាវឆេះគ្មានសល់ ហើយករណីនេះ សមត្ថកិច្ចសន្និដ្ឋានថា គឺបណ្ដាលមកពីភ្លើងទៀន ដែលឪពុកម្តាយក្មេងរងគ្រោះដុតទុកបំភ្លឺចោលក្នុងផ្ទះ ។
ប្រភពពីលោកនាយប៉ុស្តិ៍ឃុំចុងផ្លាស់ លោកឡេវ វិបុល បានឱ្យដឹងថា មុនពេលកើតហេតុ ឪពុក-ម្ដាយក្មេងរងគ្រោះបានចេញទៅមើលទូរទស្សន៍នៅផ្ទះបងប្អូន ចម្ងាយប្រមាណ៥០ម៉ែត្រពីផ្ទះរបស់ខ្លួន និងបានទុកឲ្យកូនទាំងពីរនាក់គេងក្នុងផ្ទះ ។ ក្រោយមកក៏មានគេស្រែកប្រាប់ថា «ភ្លើងឆេះផ្ទះ» ទើបឪពុក-ម្ដាយ និងអ្នកជិតខាងបាននាំគ្នារត់មកជួយពន្លត់ភ្លើង ប៉ុន្តែមិនអាចពន្លត់បាននោះទេ ព្រោះភ្លើងបានឆេះពេញបន្ទុកទៅហើយ ។
នៅព្រឹកថ្ងៃទី២៤ មីនា នេះ សមត្ថកិច្ច រួមជាមួយឪពុក-ម្ដាយក្មេងរងគ្រោះបានកាយរកឃើញឆ្អឹងក្មេងទាំងពីរ ។
ចែករំលែកព័តមាននេះ