ខេត្តមណ្ឌលគិរី ៖ ឈ្មួញឈើដុះស្នឹមប្រចាំឃុំមេម៉ង់ ស្រុកកែវសីមា ខេត្តមណ្ឌលគិរី ដែលគ្មានសមត្ថកិច្ច ឬមន្ត្រីជំនាញហ៊ានទៅក្បែរលំនៅឋានរបស់គាត់រាប់សិបឆ្នាំមកហើយ ត្រូវបានជំនាញខណ្ឌរដ្ឋបាលព្រៃឈើមណ្ឌលគិរី ចាប់បង្ក្រាបឈើខុសច្បាប់របស់គាត់ កសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់ ។
សេចក្តីរាយការណ៍បានឲ្យដឹងថា «យាយម៉ាប់» ដែលអ្នកស្រុកស្គាល់យ៉ាងច្បាស់ថា គឺជាថៅកែឈើដ៏ធំប្រចាំឃុំមេម៉ង់ ដែលរកស៊ីជំនួញឈើមិនក្រោម២០ឆ្នាំ ត្រូវបានជំនាញចាប់បង្ក្រាបឈើរបស់គាត់ ដែលជារឿងភ្ញាក់ផ្អើលមួយស្ទើរមិនគួរឲ្យជឿ ដ្បិតរបរកែច្នៃឈើ និងលក់ឈើខុសច្បាប់របស់គាត់ កន្លងមកមិនធ្លាប់មានសមត្ថកិច្ចណាទៅប៉ះពាល់ឡើយ ព្រោះគាត់តែងអះអាងថា មានមន្ត្រីគ្រាក់ៗ រង់ចាំការពារពីក្រោយ ដែលធ្វើឲ្យជំនាញមន្ត្រីតូចតាងមិនហ៊ានទៅក្បែរ ។
ជាក់ស្តែង នៅថ្ងៃទី០៣ ខែតុលា ឆ្នាំ២០២២ កន្លងទៅកំលាំងខណ្ឌរដ្ឌបាលព្រៃឈើមណ្ឌលគិរី ដឹកនាំដោយលោក ព្រះរាជអាជ្ញារងអមសាលាដំបូងខេត្ត ត្រូវបានប្រភពបង្ហើបថា ខណៈមន្ត្រីជំនាញកំពុងប្រត្តិបត្តិការបង្ក្រាប គេបានឃើញយាយម៉ាប់ ស្វែងរកការអន្តរាគមន៏ខ្វាត់ខ្វែងពីអ្នកមានអំណាច ប៉ុន្តែដោយមិនអាចយកមុខមាត់កិត្តិយសរបស់ខ្លួនការពារ មុខរបរខុសច្បាប់របស់ឈ្មួញជួញដូរឈើ ទើបគ្មានអ្នកណាចេញមុខកាងឲ្យយាយម៉ាប់ ធ្វើឲ្យប្រតិបត្តិការរបស់មេព្រៃដំណើរការបានយ៉ាងរលូន រហូតឈានដល់កសាងសំណុំរឿងបញ្ជូនទៅតុលាការ។
សូមបញ្ជាក់ថា មន្ត្រីជំនាញរដ្ឋបាលព្រៃឈើបានចាប់ឃាត់រោងសិប្បកម្មកែច្នៃផលអនុផលព្រៃឈើ គ្មានលិខិតអនុញ្ញាតមួយកន្លែង ដកហូតបានម៉ាស៊ីនភ្លើង០១គ្រឿង តាបឈួស០១គ្រឿង និងឈើអារប្រភេទលេខ១សុក្រម ចំនួនប្រហែល១,៥០ ម៉ែត្រត្រីគុណ នៅភូមិពូហូង ឃុំចុងផ្លាស់ ស្រុកកែវសីមា ខេត្តមណ្ឌលគិរី ដែលមានម្ចាស់ឈ្មោះ យាយ ម៉ាប់ ។
ចែករំលែកព័តមាននេះ