មហាជន ជាពិសេសបណ្តាប្រិយមិត្តគាំទ្របានសម្តែងការភ្ញាក់ផ្អើល ក្រោយពេលគេឃើញថា ស្ងាត់ៗតារាចម្រៀងក្នុងផលិតកម្មថោន នី រ័ត្ន បានវិលមកស្រុកខ្មែរ ដើម្បីជួបជុំមិត្តភក្តិ
រាជធានីភ្នំពេញ ៖ មហាជន ជាពិសេសបណ្តាប្រិយមិត្តគាំទ្របានសម្តែងការភ្ញាក់ផ្អើល ក្រោយពេលគេឃើញថា ស្ងាត់ៗតារាចម្រៀងក្នុងផលិតកម្មថោន នី រ័ត្ន បានវិលមកស្រុកខ្មែរ ដើម្បីជួបជុំមិត្តភក្តិបងប្អូន បន្ទាប់ពីនាងបានចាកចេញទៅរស់នៅប្រទេសអូស្ត្រាលីជាមួយស្វាមីអស់រយៈពេលជាង៥ឆ្នាំមកនេះ។
ការវិលមកស្រុកខ្មែរនាពេលនេះ នី រ័ត្ន បានឆ្លៀតពេលបញ្ចេញបទចម្រៀងថ្មីៗបន្ថែមទៀត ដើម្បីជាការឆ្លើយតបការចង់បានពីប្រិយមិត្តគាំទ្រ ក្រោយពីនាងបានខកខានមិនបានចេញបទចម្រៀងអស់ពេលជាច្រើនឆ្នាំ។
តាមរយៈរូបភាពនៃសកម្មភាពសម្តែង MV ថ្មី ដែលមានការស្លៀកពាក់តាមបែបបុរាណខ្មែរ ត្រូវបានតារាចម្រៀងស្រីរូបនេះ បង្ហោះលើបណ្តាញសង្គម ជាមួយនឹងសំណេរថា ក្រោយពីបែកគ្នា៥ឆ្នាំ នាងខ្ញុំនឹងមានបទថ្មីសំរាប់អ្នកស្រលាញ់គាំទ្រ នីរត្ន័ ទាំងអស់គ្នា។
តាមរយៈរូបភាពសកម្មភាពដែល នីរ័ត្ន នៃការសម្តែងបទថ្មីនាពេលនេះ បានធ្វើអោយមហាជន ជាពិសេសប្រិយមិត្តគាំទ្របាននាំគ្នាសម្តែងការរីករាយយ៉ាងខ្លាំង ក្នុងពេលដែលពួកគេបានឃើញការវិលត្រឡប់ជាថ្មីពីតារាចម្រៀងក្នុងដួងចិត្ត។
បន្ថែមពីអ្វីដែលបានបង្ហោះខាងលើនេះ នីរ័ត្ន ក៏បានអះអាងប្រាប់កោះសន្តិភាពតាមសារអេឡិចត្រូនិចថា នាងបានចាកចេញពីប្រទេសអូស្ត្រាលី មកដល់ស្រុកខ្មែរតាំងពីថ្ងៃទី១៩ ខែកញ្ញា ឆ្នាំ២០២២ ក្នុងគោលបំណងមកដើម្បីធ្វើបុណ្យខួបជូនប៉ា និងប្អូនស្រី ដែលបានចែកឋានទៅ និងបន្ដការងារសិល្បៈដែលនាងស្រលាញ់។ នាងបញ្ជាក់ថា ការមកលើកនេះ នាងអាចនឹងស្នាក់នៅស្រុកខ្មែររយៈពេលមួយខែ ប៉ុន្តែវាអាចនឹងប្រែប្រួល ព្រោះមិនទាន់សូវច្បាស់ពីពេលវេលាត្រូវឡើងមកអូស្ដ្រាលីវិញ ខណៈពេលការមកនេះ គឺនាងមកតែម្នាក់ឯងប៉ុណ្ណោះ ដោយស្វាមី ប្អូន និងកូន មិនបានមកជាមួយទេ ដោយសារបារម្ភកូនប្រុសនៅតូចខ្លាចឈឺព្រោះតែការផ្លាស់ប្ដូទឹកដីនៅស្រុកយើងខុសនឹងអាកាសធាតុគ្នា ទើបនាងសម្រេចមកតែម្នាក់ឯងសិន។
យ៉ាងណា បើតាម នីរ័ត្ន ថា កាលមកស្រុកខ្មែរនាពេលនេះ នាងបានត្រៀមបទថ្មីៗប្រហែលជិត១០បទ តែក្នុងពេលវេលានេះ នាងមិនដឹងទេថា អាចមានពេលថតបានអស់ ឬយ៉ាងណាទេ? ដោយសារពេលវេលាខ្លី។
ជាការកត់សម្គាល់ អ្នកនាង ប៊ូស្រីរ័ត្ន ហៅ នីរ័ត្ន បានរៀបចំពិធីភ្ជាប់ពាក្យជាមួយប្រុសអាណិកជនខ្មែរមកពីអូស្ត្រាលី កាលពីថ្ងៃទី៧ ខែកក្កដា ឆ្នាំ២០១៨ ហើយនាងបានចាកចេញទៅរស់នៅប្រទេសអូស្រា្ដលី នឹងបានរៀបអាពាហ៍ពិពាហ៍នៅទីនោះតែម្ដង។ បច្ចុប្បន្ននាងទទួលបានចំណងដៃកូនប្រុសម្នាក់រួចហើយ ក្រោយរួមរស់ជាមួយស្វាមីលើទឹកដីប្រទេសអូស្ត្រាលីប្រមាណជា៥ឆ្នាំមកនេះ៕
ចែករំលែកព័តមាននេះ