ខេត្តបាត់ដំបង ៖ អភិបាលខេត្តបាត់ដំបង លោក សុខ លូ បានសរសេរសារបំភ្លឺតាមរយៈបណ្ដាញសង្គមផ្ទាល់ខ្លួនរបស់លោកជុំវិញករណីផ្លូវថ្នល់ស្ទើរគ្រប់ទីកន្លែង គ្រប់ខ្សែនៅក្នុងក្រុងបាត់ដំបង បាននិងកំពុងរងការខូចខាតយ៉ាងធ្ងន់ធ្ងរ តែការសាងសង់ ឬការជួសជុលមានភាពយឺតយ៉ាវ ។
ការបំភ្លឺពាក់ព័ន្ធនឹងរឿងផ្លូវថ្នល់របស់លោកអភិបាលខេត្តខាងលើនេះ ត្រូវគេសម្គាល់ឃើញថា ទំនងជាការឆ្លើយតបទៅនឹងមហាជនដែលបានរិះគន់យ៉ាងចាស់ដៃ និងយ៉ាងផុសផុលតាមបណ្ដាញសង្គមនានា អំពីភាពអសកម្មរបស់អាជ្ញាធរ និងអង្គភាពជំនាញ ដែលមិនយកចិត្តទុក
ដាក់សាងសង់ ឬជួសជុលកំណាត់ផ្លូវនានា ដែលកំពុងរងការខូចខាតយ៉ាងធ្ងន់ធ្ងរស្ទើរគ្រប់ទីកន្លែងដោយសារទឹកភ្លៀង ។ រហូតអ្នកលេងបណ្ដាញសង្គមមួយចំនួនប្រើពាក្យបែបបញ្ចើចញ្ចើរថា «អាជ្ញាធរខេត្ត បាននិងកំពុងប្រឹងប្រែងយ៉ាងខ្លាំងក្នុងការអភិរក្ស តែមិនព្រមអភិវឌ្ឍន៏ផ្លូវទេ»។
អភិបាលខេត្តបាត់ដំបង លោក សុខ លូ បានសរសេរសារបំភ្លឺប្រាប់ប្រជាពលរដ្ឋអំពីផ្លូវថ្នល់ដែលរងការខូចខាត បង្ហោះតាមបណ្ដាញសង្គមផ្ទាល់ខ្លួនរបស់លោក កាលពីយប់ថ្ងៃទី០២ តុលា តែលោកហាក់បាននិយាយផ្ដោតទៅលើតែផ្លូវនានានៅក្នុងក្រុងបាត់ដំបងតែប៉ុណ្ណោះ។ តាមរយៈបណ្ដាញសង្គម លោក សុខ លូ បានជម្រាបជូនប្រជាពលរដ្ឋយ៉ាងដូច្នេះថា « ផ្លូវនៅក្នុងក្រុងបាត់ដំបងមានចំនួន៧៦ខ្សែ (ទាំងវែង ទាំងខ្លី) ហើយភាគច្រើនជាផ្លូវដែលបានសាងសង់រួចហើយ ។ ពេលនេះ ផ្លូវមួយចំនួនធំបានរងការខូចខាត ។ ផ្លូវទាំងនោះសុទ្ធតែបានរងផលប៉ះពាល់ដោយទឹកជំនន់ច្រើនលើកច្រើនសារមកហើយ។ ពេលនេះជារដូវភ្លៀងច្រើន យើងលុបសំបុកមាន់ក៏មិនជាប់ដែរ» ។
បើតាមការពិនិត្យជាក់ស្ដែងទៅលើកំណាត់ផ្លូវនានានៅក្នុងក្រុងបាត់ដំបង មុនរដូវភ្លៀងធ្លាក់ គេសម្គាល់ឃើញថា ផ្លូវថ្នល់ស្ទើរគ្រប់ខ្សែនៅក្នុងក្រុង ហាក់រងការខូចខាតត្រិមលក្ខណៈ«សំបុកមាន់»ប៉ុណ្ណោះ មិនសូវធ្ងន់ធ្ងរទេ។ ប៉ុន្តែពេលចូលដល់រដូវវស្សានេះ ជាពិសេស រយៈពេលជាងមួយខែចុងក្រោយនេះ ដែលមានភ្លៀងធ្លាក់ជោកជាំស្ទើររាល់ថ្ងៃ ស្រាប់តែកំណាត់ផ្លូវដែលមានត្រឹម «សំបុកមាន់»តូចតាច បានក្លាយជាជង្ហុកជ្រៅៗ រណ្ដៅធំៗ ដូចកូនបឹងនៅចំកណ្ដាលផ្លូវ ខូចខាតស្ទើរគ្រប់ខ្សែ គ្រប់ទីកន្លែងពាស់ពេញ នៅក្នុងក្រុងបេតិកភណ្ឌនៃយើង។
ស្របពេលជាមួយគ្នា ដែលកំណាត់ផ្លូវស្ទើរទូទាំងក្រុងកំពុងរងការខូចខាតដោយទឹកភ្លៀងយ៉ាងធ្ងន់ធ្ងរ ធ្វើដំណើរស្ទើរមិនកើត គេសង្កេតឃើញតាមបណ្ដាញសង្គមនានា បានបង្ហោះសាររិះគន់ព្រោងព្រាត ភ្ជាប់ជាមួយនូវរូបភាពផ្លូវថ្នល់ក្រហ៊ីងក្រហូងដូចរន្ធបាយខុម ដែលមើលទៅមិនស័ក្តសមជាផ្លូវថ្នល់ក្នុងសម័យទំនើបនេះទាល់តែសោះ។
អ្នកលេងបណ្ដាញសង្គមមួយចំនួនបានរិះគន់ចំៗទៅលើអាជ្ញាធរខេត្តថា «មានភាពអសកម្ម មិនយកចិត្តទុកដាក់ មិនមើលផ្លូវ អភិរក្ស តែមិនអភិវឌ្ឍន៏»។ល។និង ។ល។ ដោយឡែក ខាងមន្ទីរសាធារណការនិងដឹកជញ្ជូនខេត្តឯណោះវិញ ក៏រងនូវការវាយប្រហាររិះគន់មិនសំចៃដៃផងដែរ ពីតាមបណ្ដាញសង្គមថា «មានភាពយឿតយ៉ាវ ក្នុងការសាងសង់ផ្លូវ ឬ ជួសជុលផ្លូវសំបុកមាន់ ដែលជាហេតុធ្វើឲ្យផ្លូវសំបុកមាន់ ក្លាយទៅជាសំបុកជ្រូក នៅគ្រប់ទីកន្លែងក្នុងរដូវភ្លៀងធ្លាក់នេះ» ។
ពាក់ព័ន្ធនឹងបញ្ហាជួសជុលផ្លូវសំបុកមាន់នៅក្នុងក្រុង ដែលកំពុងរងការរិះគន់ស្ទើរវិលក្បុងនេះ បើតាមប្រធានមន្ទីរសាធារណការ និងដឹកជញ្ជូនខេត្ត លោក ព្រូញ រិទ្ធថា ធ្លាប់បានប្រាប់កោះសន្តិភាព នាពេលកន្លងមកថា ការងារសាងសង់ ឬជួសជុលផ្លូវនៅក្នុងខេត្ត (មិនមែនផ្លូវជាតិ) គឺជាការទទូលខុសត្រូវរបស់ថ្នាក់ក្រោមជាតិ មិនមែនខាងមន្ទីរទេ ។ លើកលេងតែផ្លូវជាតិ ទើបជាការទទូលរបស់មន្ទីរ ។ ប៉ុន្តែខាងមន្ទីរអាចចូលរួមសហការជាមួយខេត្ត បើមានតម្រូវការចាំបាច់ពីខេត្ត។
លោកប្រធានមន្ទីរបានបញ្ជាក់ថា កន្លងមកមន្ត្រីជំនាញរបស់លោក ប្រឹងប្រែងសម្បើមណាស់ ក្នុងការចុះជួយជួសជុលទាំងផ្លូវសំបុកមាន់ មិនថាផ្លូវនៅក្នុងក្រុង ឬ កំណាត់ផ្លូវជាតិ ដែលរងការខូចខាតនោះទេ ដើម្បីជួយសម្រូលដល់ការធ្វើដំណើររបស់ប្រជាពលរដ្ឋ។ ហើយរហូតមកដល់សព្វថ្ងៃនេះ មន្ត្រីជំនាញមន្ទីរសាធរណការខេត្ត នៅតែបន្តសហការជួយជួសជុលផ្លូវសំបុកមាន់នៅក្នុងក្រុងដដែល តែសត្រូវធំបំផុតគឺ«ទឹកភ្លៀង» ដែលពិបាកយកឈ្នះ ។
យ៉ាងណាក្ដី ជុំវិញការរិះគន់ពីមហាជនតាមបណ្ដាញសង្គមនានា ពាក់ព័ន្ធនឹងការខូចខាតផ្លូវថ្នល់គ្រប់ទីកន្លែងនៅក្នុងខេត្តបាត់ដំបងខាងលើ អភិបាលខេត្តបាត់ដំបង លោក សុខ លូ បានចេញមុខបំភ្លឺរួចហើយតាមបណ្ដាញសង្គមផ្ទាល់ខ្លួនរបស់លោក អំពីវិធានការសាងសង់ផ្លូវ ក៏ដូចជាវិធានការជួសជុលផ្លូវសំបុកមាន់ ។ ខ្លឹមសារចុងក្រោយ លោកអភិបាលខេត្តបានសន្យាដូច្នេះថា «នៅពេលអស់ភ្លៀងខាងមុខនេះ ខេត្តនឹងចាប់ផ្ដើមលុបសំបុកមាន់ ផ្លូវដែលអាចធ្វើបាន ។ ផ្លូវមួយចំនួននឹងធ្វើថ្មីទៅតាមទំហំថវិកា» ។
លោកអភិបាលខេត្តក៏បានបញ្ជាក់ជូនផងដែរថា «ផ្លូវមួយចំនួនខេត្តចង់ធ្វើថ្មី ក៏មិនអាចធ្វើកើតដែរ ដោយយើងទាក់នឹងគម្រោង ADB ធ្វើប្រព័ន្ធលូរំដោះទឹកភ្លៀងនិងទឹកកខ្វក់ ទាំងខាងកើតស្ទឹង និងទាំងខាងលិចស្ទឹង។ ដូច្នេះ យើងត្រូវរង់ចាំមួយរយៈសិន កុំឲ្យពិបាកធ្វើពីរដង តែខេត្តនឹងលុបសំបុកមាន់ប្រើប្រាស់បណ្ដោះអាសន្នសិន។ សូមបងប្អូនយោគយល់ និងអធ្យាស្រ័យ»៕
ចែករំលែកព័តមាននេះ