ខេត្តមណ្ឌលគិរី ៖ សំណង់ខុសច្បាប់រួមមានគ្រឿងចក្រលាយបេតុង និងសំណង់រំលោភយកដីចំណីអូរធម្មជាតិ របស់ថៅកែល្បីឈ្មោះប្រចាំខេត្តមណ្ឌលគិរី ឈ្មោះ ហ៊ាង ឆៃលី បានធ្វើឲ្យមហាជនមានការចាប់អារម្មណ៍យ៉ាងខ្លាំង ក្រោយអាជ្ញាធរមន្ត្រីជំនាញចម្រុះរហូតដល់ស្ថាប័នតុលាការមិនអាចអនុវត្តន៍ច្បាប់…
ខេត្តមណ្ឌលគិរី ៖ សំណង់ខុសច្បាប់រួមមានគ្រឿងចក្រលាយបេតុង និងសំណង់រំលោភយកដីចំណីអូរធម្មជាតិ របស់ថៅកែល្បីឈ្មោះប្រចាំខេត្តមណ្ឌលគិរី ឈ្មោះ ហ៊ាង ឆៃលី បានធ្វើឲ្យមហាជនមានការចាប់អារម្មណ៍យ៉ាងខ្លាំង ក្រោយអាជ្ញាធរមន្ត្រីជំនាញចម្រុះរហូតដល់ស្ថាប័នតុលាការមិនអាចអនុវត្តន៍ច្បាប់ ដូចពលរដ្ឋទូទៅផ្សេងទៀត ចំពោះទង្វើបំពានទ្រព្យសម្បត្តិរបស់រដ្ឋពីថៅកែនេះឡើយ ។
ជាក់ស្តែង នៅថ្ងៃទី២៩ កញ្ញា ២០២២ ក្រុមមន្ត្រីជំនាញចម្រុះ ដឹកនាំដោយលោក ស៊ាវ ងីឈាន់ ព្រះរាជអាជ្ញារង នៃអយ្យការអមសាលាដំបូងខេត្តមណ្ឌលគិរី បានចុះពិនិត្យទីតាំងសំណង់ជញ្ជាំងរំលោភចូលអូរធម្មជាតិ ស្ថិតនៅភូមិចំការតែ សង្កាត់ស្ពានមានជ័យ ក្រុងសែនមនោរម្យ ដែលសំណង់នេះ ត្រូវបានមន្ត្រីជំនាញមូលដ្ឋានហាមប្រាមចំនួន២លើកមកហើយឲ្យផ្អាក និងរុះរើចេញជាកំហិត តែម្ចាស់ទីតាំងឈ្មោះ ហ៊ាង ឆៃលី មិនអនុវត្ត ទើបមន្ត្រីជំនាញបញ្ជូនសំណុំរឿងទៅតុលាការ ។
នៅក្នុងប្រតិបត្តិការចុះពិនិត្យសំណង់រំលោភអូរធម្មជាតិរបស់ឈ្មោះ ហ៊ាង ឆៃលី មន្ត្រីជំនាញបានពិនិត្យឃើញម្ចាស់ទីតាំងបានសងរបងថ្មរំលោភយកចំណីអូរ និងអាក់របស់អូរទាំងស្រុង ដែលសំណង់នេះ បានលយចូលស្ទើរពាក់កណ្ដាលអូរធម្មជាតិតែម្ដង អាចនិងបង្កផលប៉ះពាល់បាក់ស្រុតដីរបស់ចំណីអូរផ្នែកចំហៀងទៀត ប្រសិនមានទឹកហូរបុកខ្លាំង ។
សង្កេតតាមស្ថានភាពជាក់ស្ដែង ម្ចាស់ទីតាំងមិនត្រឹមសង់សំណង់ចូលអូរធម្មជាតិដោយមិនញញើតពីចំណាត់ការរបស់អាជ្ញាធរមូលដ្ឋាននោះទេ សូម្បីបង្គន់អនាម័យក៏ម្ចាស់ទីតាំងបានសង់នៅមាត់អូរ ថែមទាំងរៀបចំប្រព័ន្ធបង្ហូរកាកសំណល់ពីតៅក្រឡុកស៊ីម៉ង់ ចូលមកអូរធម្មជាតិនេះទាំងស្រុងទៀតផង ដែលទង្វើនេះបានធ្វើឲ្យប៉ះពាល់ដល់ធនធានជាតិ និងប្រជាពលរដ្ឋដែលរស់នៅអាស្រ័យប្រភពទឹកអូរនេះជាខ្លាំង ។
ព្រះរាជអាជ្ញារងនៃអយ្យការអមសាលាដំបូងខេត្តមណ្ឌលគិរី លោក ស៊ាវ ងីឈាន់ បានប្រាប់ថា នៅក្នុងប្រតិបត្តិការលើកនេះ គឺមិនទាន់អនុវត្តនីតិវិធីនៅឡើយទេ ដោយគ្រាន់តែចុះមកពិនិត្យទីតាំងជាក់ស្ដែង ដើម្បីយកនិយាមការ ប្រមូលទិន្នន័យជាក់លាក់ នឹងអនុវត្តនីតិវិធីនៅពេលខាងមុខ ។
មិនត្រឹមសង់សំណង់បំពានយកចំណីអូរធម្មជាតិ ពីសំណាក់ម្ចាស់ឃ្លាំងគ្រឿងសំណង់ លោក ហ៊ាង ឆៃលី មន្ត្រីជំនាញក៏បានពិនិត្យឃើញម្ចាស់ទីតាំង សង់របងថ្មខាងមុខក៏បានរំលោភយកចំណីផ្លូវមួយផ្នែកដែរ រីឯតៅក្រឡុកស៊ីម៉ង់ទម្ងន់១០០តោន គ្មានច្បាប់អនុញ្ញាត ដែលបានបាក់រំលំ កាលពីពេលថ្មីៗនេះ ក៏ត្រូវលោក ហ៊ាង ឆៃលី ជួសជុលបញ្ឈរឡើងវិញ ដោយពុំមានច្បាប់អនុញ្ញាត ៕
ចែករំលែកព័តមាននេះ