ខេត្តបាត់ដំបង ៖ «វាលបឹងត្រាវ» ជាប់ដងផ្លូវជាតិលេខ៥៧ (បាត់ដំបង-ប៉ៃលិន) ជាចំណុចមួយស្ថិតចំកណ្ដាល នៃព្រំប្រទល់ពុះចែករវាងទឹកដីឃុំភ្នំសំពៅ និងទឹកដីឃុំស្នឹង ស្រុកបាណន់។ ជារៀងរាល់ឆ្នាំ…
ខេត្តបាត់ដំបង ៖ «វាលបឹងត្រាវ» ជាប់ដងផ្លូវជាតិលេខ៥៧ (បាត់ដំបង-ប៉ៃលិន) ជាចំណុចមួយស្ថិតចំកណ្ដាល នៃព្រំប្រទល់ពុះចែករវាងទឹកដីឃុំភ្នំសំពៅ និងទឹកដីឃុំស្នឹង ស្រុកបាណន់។ ជារៀងរាល់ឆ្នាំ នារដូវវស្សា ដែលជារដូវមានទឹកជំនន់ម្ដងៗនៅចំណុច «វាលបឹងត្រាវ» នេះ ហាក់ដូចជាទីកន្លែងកម្សាន្តដ៏ពេញនិយមតូចមួយ សម្រាប់អ្នកភូមិ និងអ្នកដំណើរទៅលេងកម្សាន្ត ជាមួយនឹងការហែលទឹកលេង និងការប្រើប្រាសឧបករណ៍នេសាទត្រី ដើម្បីសប្បាយៗជាលក្ខណៈគ្រួសារ ។
តាមការកត់សម្គាល់ក្នុងអំឡុងពេលនៃរដូវបុណ្យភ្ជុំបិណ្ឌគឺជារដូវវស្សាទឹកឡើងខ្លាំង ។ ត្រីស្រែគ្រប់ប្រភេទក៏សំបូរស្អេកស្កះពាសពេញនៅតំបន់នោះ ស្របពេលប្រជាពលរដ្ឋខ្មែរពីតាមបណ្ដាខេត្ត-រាជធានីធ្វើដំណើរកម្សាន្តតាមផ្លូវជាតិលេខ៥៧ ឆ្លងកាត់«វាលបឹងត្រាវ» ក៏នាំគ្នាឈប់សំចតយានយន្តហូហែរនៅតាមដងផ្លូវ ដើម្បីសម្រាកកម្សាន្ត លំហែកាយនៅទីនោះយ៉ាងភ្លូកទឹកភ្លូកដី ។
នៅទីនោះ មានប្រឡាយទឹកហូរនាចពេញស្រែមើលដាច់កន្ទុយភ្នែក មានកន្លែងបង់ត្រី មានកន្លែងរាយមងចាប់ត្រី ថែមទាំងមានតូបសម្រាប់អង្គុយលេងទៀតផង ។ អ្នកភូមិ ឬ អ្នកដំណើរកម្សាន្តមួយចំនួនបានប្រើប្រាសឧករណ៏នេសាទជាលក្ខណៈគ្រួសារសម្រាប់រកត្រីបែបកម្សាន្ត ។ អ្នកខ្លះបង់សំណាញ់ អ្នកខ្លះចុះរាងមងចាប់ត្រីតាមប្រឡាយ ឬ តាមស្រែ អ្នកខ្លះស្ទូចត្រី រីឯអ្នកខ្លះទៀតហែលទឹកលេងយ៉ាងសប្បាយ ខណៈអ្នកដំណើរភាគច្រើននាំគ្នាលាតវង់ដុំកង់អាំងឬដុតត្រីក្លែមស្រាយ៉ាងសប្បាយរកលេខដាក់គ្មានផងដែរ។
មិនតែប៉ុណ្ណោះ អ្នកភូមិមួយចំនួននេសាទត្រីបានស្រស់ៗ រហូតដាក់លក់នៅទីនោះយ៉ាងព្រោងព្រាត ដែលមើលទៅប្រៀបដូចជាកូនផ្សារត្រីចល័តតូចមួយនៅក្បែរចិញ្ចើមថ្នល់ ។ អតិថិជនដែលទិញត្រីស្រែរកបានថ្មីៗ ស្រស់ៗ នៅទីនោះ ភាគច្រើនជាភ្ញៀវដែលធ្វើដំណើរកម្សាន្តឆ្លងកាត់ ឬ អ្នកដំណើរដែលទៅកម្សាន្តនៅទីនោះតែម្ដង ដែលទិញអាំងឬដុតក្លែមស្រា ។ អ្នកលក់ត្រីនៅទីនោះ និយាយថា ត្រីស្រែគ្រប់ប្រភេទ អន្ទង់ស្រែ ខ្យង ក្ដាម គឺលក់ដាច់បំផុត ព្រោះទើបរកបានពីក្នុងទឹកនៅតំបន់នោះភ្លាមៗស្រស់ៗ ។
ពួកគេប្រាប់ថា អ្នកដំណើរភាគច្រើនបានឈប់ចុះទិញត្រីស្រែទាំងនេះ ។ ប៉ុន្តែយ៉ាងណាក្ដី បើតាមអ្នកភូមិបាននិយាយថា ការនេសាទត្រី ឬការមកម្សាន្តរបស់អ្នកដំណើរនៅ«វាលបឹងត្រាវ» ខាងលើនេះ មិនមានរយៈពេលវែងទេ គឺយ៉ាងយូរត្រិមរយៈចន្លោះពីមួយសប្ដាហ៏ទៅពីរសប្ដាហ៍ប៉ុណ្ណោះ ក៏ថមថយទៅវិញ ព្រោះទឹកជំនន់បានស្រកចុះ ។ អ្នកភូមិបានបញ្ជាក់ថា ជារៀងរាល់ឆ្នាំពេលដល់រដូវទឹកជំនន់ គឺស្របពេលដល់រដូវបុណ្យភ្ជុំបិណ្ឌប្រពៃណីខ្មែរក៏មកដល់ដែរ ។ អ្នកភូមិតែងតែនាំគ្នាទៅនេសាទត្រីបែបកម្សាន្តសប្បាយផង និងលក់ដូរខ្លះផង ព្រោងព្រាតនៅទីនោះ ។
ហើយគូបផ្សំនឹងអ្នកដំណើរឆ្លងកាត់ឈប់ចុះលេងកម្សាន្តថែមទៀត ទើបធ្វើឲ្យតំបន់«វាលបឹង
ត្រាវ» ជាប់ផ្លូវជាតិលេខ៥៧នេះ ក្លាយជាតំបន់កម្សាន្តតូចមួយដ៏ពេញនិយម ប្រចាំរដូវទឹកជំនន់ សម្រាប់អ្នកភូមិ និង អ្នកដំណើរលេងទឹកសប្បាយផង និងនេសាទត្រីយកមកអាំងឬដុតក្លែមស្រាយ៉ាងសប្បាយផង ក្នុងរដូវទឹកជំនន់ លាយឡំជាមួយនឹងដំណើរកម្សាន្ត នារដូវបុណ្យភ្ជុំបិណ្ឌប្រពៃណីខ្មែរយើងផង៕
ចែករំលែកព័តមាននេះ