ទិវារត់ប្រណាំងអន្តរជាតិពាក់កណ្ដាលម៉ារ៉ាតុងអង្គរ លើកទី២៧ គ្រោងធ្វើនៅដើមខែធ្នូចុងឆ្នាំនេះ
- ភ្នំពេញ
រាជធានីភ្នំពេញ ៖ ទិវារត់ប្រណាំងអន្ដរជាតិពាក់កណ្ដាលម៉ារ៉ាតុងលើកទី២៧គ្រោងរៀបចំធ្វើនៅថ្ងៃទី
រាជធានីភ្នំពេញ ៖ ទិវារត់ប្រណាំងអន្ដរជាតិពាក់កណ្ដាលម៉ារ៉ាតុងលើកទី២៧គ្រោងរៀបចំធ្វើនៅថ្ងៃទី០៤ ខែធ្នូ ឆ្នាំ២០២២ ខាងមុខនេះហើយខណៈការចុះឈ្មោះបាននិងកំពុងធ្វើជាបណ្ដើរៗផងដែរ ។ នេះបើតាមការបញ្ជាក់បន្ថែមរបស់ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា។
មកទល់ពេលនេះ មានអ្នកមកចុះឈ្មោះចូលរួមរត់ក្នុងព្រឹត្តិការណ៍នេះមានចំនួនជិត៣.០០០នាក់ហើយ ។ ជាមួយនឹងការចុះឈ្មោះជាបណើ្ដរៗនេះគណៈកម្មការរៀបចំបានប្ដេជ្ញាសម្រាប់ព្រឹត្តិការណ៍ឆ្នាំនេះថា នឹងរៀបចំឲ្យកាន់តែប្រសើរ និងធំជាងឆ្នាំកន្លងទៅ ដើម្បីទាក់ទាញភ្ញៀវទេសចរជាតិ-អន្ដរជាតិចូលរួមឲ្យបានច្រើនកុះករ ដូចកាលមុនផ្ទុះជំងឺកូវីដ-១៩។
កាលពីប៉ុន្មានថ្ងៃមុននេះ គណៈកម្មាធិការជាតិអូឡាំពិកកម្ពុជា បានបរិច្ចាគទឹកប្រាក់ចំនួន៣ម៉ឺនដុល្លារអាមេរិកដល់មន្ទីរពេទ្យកុមារ និងអង្គការមនុស្សធម៌ចំនួន៩ដើម្បីគាំទ្រនិងចូលរួមសកម្មភាពមនុស្សធម៌ក៏ដូចជាជួយកាត់បន្ថយការលំបាកមួយចំនួនរបស់សង្គម និងរួមចំណែកអភិវឌ្ឍប្រទេសជាតិ។
ឯកឧត្តម វ៉ាត់ ចំរើន មានប្រសាសន៍ថា ថវិកា ៣ម៉ឺនដុល្លារនេះ បានមកពីការប្រមែប្រមូលក្នុងបរិបទកូវីដ១៩ ពិសេសអ្នកចូលរួមរត់ប្រណាំងអន្ដរជាតិពាក់កណ្ដាលម៉ារ៉ាតុង លើកទី២៦ នៅអង្គរវត្ត ខេត្តសៀមរាប កាលពីដើមឆ្នាំ២០២២ កន្លងទៅ និងត្រូវបែងចែកដល់អង្គការនានា ក្នុងនោះមានកាកបាទក្រហមកម្ពុជា ១ម៉ឺនដុល្លារ ដែល NOCC នឹងនាំយកទៅប្រគល់ជូនដល់ទីតាំងផ្ទាល់នាពេលក្រោយ ។
ឯកឧត្តមបានមានប្រសាសន៍បន្តថា អង្គការមនុស្សធម៌ ដែលទទួលបានផ្ទាល់នៅទីស្នាក់ការ NOCC រួមមាន៖ មន្ទីរពេទ្យគន្ធបុប្ផា ៥.០០០ដុល្លារ, អង្គការ Cambodia Trust ២.៥០០ដុល្លារ, អង្គការ Handicap International២.០០០ដុល្លារ, និងថវិកា១០.៥០០ដុល្លារទៀត បានប្រគល់ជូនអង្គការបេះដូងមាស(Heart of Gold) ដែលទទួលបន្ទុកអង្គការពាក់ព័ន្ធចំនួន៥ មានអង្គការ Cambodia Disable Athletics Federation (CDAF), Support Disable Athletics, New Child Care Center (NCC), Physical Education Project និងអង្គការ Youth Development Project។
លោក សែម ផល្លា នាយកបច្ចេកទេសរៀបចំព្រឹត្តិការណ៍កីឡា និងទេសចរណ៍នេះ បានបញ្ជាក់ថា ថវិកាទទួលបានពីការរៀបចំទិវារត់ប្រណាំងអន្ដរជាតិពាក់កណ្ដាលម៉ារ៉ាតុង លើកទី២៦ នៅខេត្តសៀមរាប លើកនេះ មានការថយចុះច្រើន បើធៀបនឹងលើកមុនៗ ដោយសារការរៀបចំក្នុងបរិបទកូវីដ១៩ ។ ប៉ុន្ដែលោកមានជំនឿចិត្តថាសម្រាប់ការរៀបចំក្រោយៗនឹងមានអ្នកចូលរួមកើនច្រើនឡើងវិញដើម្បីទទួលបាននូវថវិកាច្រើនសម្រាប់គាំទ្រដល់អង្គការដៃគូ ដែលជាអង្គការចូលរួមសកម្មភាពមនុស្សធម៌ និងការងារសង្គម ៕
ចែករំលែកព័តមាននេះ