ខេត្តកំពង់ស្ពឺ ៖ ពិធីបុណ្យភ្ជុំបិណ្ឌប្រពៃណីជាតិខ្មែររយៈពេល០៣ថ្ងៃ ចាប់ពីថ្ងៃទី២៤ ដល់ថ្ងៃទី២៦ ខែកញ្ញា ឆ្នាំ២០២២ ខេត្តកំពង់ស្ពឺ ទទួលបានភ្ញៀវទេសចរជាតិ និងអន្តរជាតិ មកស្នាក់នៅតាមសណ្ឋាគារ ផ្ទះសំណាក់ និងលេងកម្សាន្តតាមរមណីយដ្ឋាននានា ប្រមាណជាង២ម៉ឺន៥ពាន់នាក់ នេះបើយោងតាមសម្តីរបស់លោក រស់ សុខ ប្រធានមន្ទីរទេសចរណ៍ខេត្តកំពង់ស្ពឺ ប្រាប់នៅថ្ងៃទី២៧ ខែកញ្ញា ឆ្នាំ២០២២នេះ។
ប្រធានមន្ទីរទេសចរណ៍ខេត្តកំពង់ស្ពឺ លោក រស់ សុខ បានឱ្យដឹងផងដែរថា ចំនួនភ្ញៀវនេះគឺភ្ញៀវជាតិមានចំនួន២៤៨៥០នាក់ និងភ្ញៀវអន្តរជាតិ២៧៦នាក់។ ចំនួននេះ ហាក់មានការហក់ឡើងវិញ ក្រោយមានការបិទខ្ទប់គ្រប់វិស័យដោយរាជរដ្ឋាភិបាលក្នុងកំឡុងនៃការរីករាលដាលជំងឺកូវីដ-១៩។
ប្រធានមន្ទីរទេសចរណ៍ខេត្តកំពង់ស្ពឺ លោក រស់ សុខ បានបញ្ជាក់ផងដែរថា បច្ចុប្បន្នខេត្តកំពង់ស្ពឺ មានរមណីយដ្ឋាន និងសហគមន៍ទេសចរណ៍ចំនួន២០កន្លែង ក្នុងនោះសហគមន៍ទេសចរណ៍ មាន៨កន្លែង រមណីយដ្ឋានទេសចរណ៍៨កន្លែង កសិទេសចរណ៍៣កន្លែង និង កីឡាវា.យកូនហ្គោល១កន្លែង។
ហើយក្នុងចំណោមរមណីយដ្ឋានទាំងអស់ខាងលើ ភ្ញៀវទេសចរជាតិ និងអន្តរជាតិសម្រុកទៅលេងខ្លាំងជាងគេ គឺមានរមណីយដ្ឋានជាតិគីរីរម្យ កសិទេសចរណ៍ម៉ុងឬទ្ធីសែនជ័យ និងរមណីយដ្ឋានកែច្នៃទំនប់ស្លាផងដែរ៕
ចែករំលែកព័តមាននេះ