ប្រាក់បញ្ញើក្នុងវិស័យធនាគារកើនឡើងដល់64ភាគរយនៃGDP
រាជធានីភ្នំពេញ ៖ មន្ត្រីជាន់ខ្ពស់ធនាគារជាតិនៃកម្ពុជាបានថ្លែងថា ប្រាក់បញ្ញើក្នុងវិស័យធនាគារ បានកើនឡើងស្មើនឹង៦៤ភាគរយនៃផលទុនជាតិសរុប ដែលជាការបង្ហាញពី …
រាជធានីភ្នំពេញ ៖ មន្ត្រីជាន់ខ្ពស់ធនាគារជាតិនៃកម្ពុជាបានថ្លែងថា ប្រាក់បញ្ញើក្នុងវិស័យធនាគារ បានកើនឡើងស្មើនឹង៦៤ភាគរយនៃផលទុនជាតិសរុប ដែលជាការបង្ហាញពីទំនុកចិត្តលើវិស័យធនាគាររបស់ប្រជាពលរដ្ឋមានការកើនឡើង ។
ថ្លែងក្នុងឱកាសសម្ពោធសាខាធនាគារគូកមីនកម្ពុជា កាលពីព្រឹកថ្ងៃទី១៥ កុម្ភៈ កន្លងមក លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា បានលើកឡើងថា ជាមួយនឹងកំណើនសេដ្ឋកិច្ចរឹងមាំប្រមាណ៧%ប្រចាំឆ្នាំ វិស័យធនាគារនៅកម្ពុជា បាននិងកំពុងបន្តរីកចម្រើនប្រកបដោយសុវត្ថិភាព និងមានលក្ខណៈប្រកួតប្រជែងប្រកបដោយបរិយាប័ន្ន ។ ជាក់ស្តែងក្នុងឆ្នាំ២០១៦ ប្រាក់បញ្ញើអតិថិជនក្នុងប្រព័ន្ធធនាគារបានកើនឡើងដល់៦៤%នៃផ.ស.ស(GDP) ពោលគឺមានកំណើន១៨%ធៀបគ្នានឹងឆ្នាំ២០១៥ ។
លោកជំទាវបន្តថា «ធនាគារនេះ នឹងចូលរួមចំណែកក្នុងការអភិវឌ្ឍវិស័យធនាគារនៅកម្ពុជា ព្រមទាំងបង្កើនតួនាទីអន្តរការិយកម្ម ហិរញ្ញវត្ថុដើម្បីផ្តល់ហិរញ្ញប្បទានដល់ការវិនិយោគចម្បងៗ ជាពិសេសវិស័យកសិកម្ម និងផលិតកម្មដែលនឹងជួយគាំទ្រដល់គោលនយោបាយ អភិវឌ្ឍន៍របស់រាជរដ្ឋាភិបាលកម្ពុជា »។
លោកយុន ចុងគ្យូ នាយកប្រតិបត្តិ និងជាប្រធានសម្ព័ន្ធហិរញ្ញវត្ថុគូកមីន និងជាប្រធានធនាគារគូកមីនបានថ្លែងថា ធនាគារKB Cambodia បាននិងកំពុងអភិវឌ្ឍប្រកបដោយនិរន្តរភាព ដោយមានការគាំទ្រពីប្រជាពលរដ្ឋកម្ពុជាក៏ដូចជារាជរដ្ឋាភិបាលកម្ពុជា ហើយកំពុងតែពង្រីកអាជីវកម្មជាបន្តបន្ទាប់ដើម្បីផ្តល់សេវាហិរញ្ញវត្ថុចំពោះឯកជន និងក្រុមហ៊ុនខ្នាតតូច ។
លោកបន្តថា ឆ្នាំនេះជាឆ្នាំខួបទី១០ដែលធនាគារKBបានចាប់ផ្តើមដំណើរការនៅកម្ពុជា ហើយការរីកចម្រើនរបស់វិស័យនេះ បានធ្វើឲ្យធនាគារបើកសាខាទី៣គឺសាខាទួលទំពូង។ ធនាគារ KB ដែលបាននិងកំពុងតែអភិវឌ្ឍដោយមានការណែនាំពីធនាគារជាតិនៃកម្ពុជា ក៏ដូចជារាជរដ្ឋាភិបាលកម្ពុជា នឹងបន្តអនុវត្តការបង្កើតបណ្តាញថ្មី និងការផ្ទេរសមត្ថភាពហិរញ្ញវត្ថុ ដើម្បីអភិវឌ្ឍភាពងាយស្រួលផ្នែកហិរញ្ញវត្ថុរបស់ប្រជាពលរដ្ឋកម្ពុជា ។
លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដាភីអិលស៊ីបានថ្លែងថា វិស័យធនាគារនៅកម្ពុជាកំពុងទទួលបានទំនុកចិត្តពីប្រជាពលរដ្ឋ តាមរយៈការកើនឡើងនូវការដាក់ប្រាក់បញ្ញើ ហើយវិស័យ នេះនឹងបន្តរីកចំរើនបន្ថែមទៀត តាមរយៈការរីកចម្រើនសេដ្ឋកិច្ចជាតិ ក្នុងរង្វង់៧,៧%ក្នុងរយៈពេលជាង២ទសវត្សរ៍កន្លងមកនេះ ហើយវិស័យនេះត្រូវបានវាយតម្លៃ ដោយធនាគារពិភពលោក ធនាគារអភិវឌ្ឍន៍អាស៊ី និងមូលនិធិរូបិយវត្ថុអន្តរជាតិជាវិស័យមានការរីកចម្រើនល្អប្រសើរ ។
លោកបន្តថា «វិស័យនេះជាឆ្អឹងខ្នងនៃសេដ្ឋ កិច្ចជាតិ និងរួមចំណែកទ្រទ្រង់កំនើនសេដ្ឋកិច្ចរបស់ប្រទេស ព្រោះការអភិវឌ្ឍន៍សេដ្ឋកិច្ចទាមទារការគាំទ្រពីវិស័យនេះ » ៕
ចែករំលែកព័តមាននេះ