រាជធានីភ្នំពេញ ៖ កម្ពុជា និងគណៈកម្មការសេដ្ឋកិច្ចអឺរ៉ុប-អាស៊ី មានគោលបំណងពង្រីកកិច្ចសហប្រតិបត្តិការ ជាពិសេស ផ្នែកសេដ្ឋកិច្ចដើម្បីជំរុញវិស័យពាណិជ្ជកម្ម វិនិយោគ និងពង្រីកទៅវិស័យផ្សេងទៀត ។ នេះបើយោងតាមមន្ត្រីជាន់ខ្ពស់ក្រសួងពាណិជ្ជកម្ម ។
ក្នុងពិធីចុះហត្ថលេខាលើសេចក្តីថ្លែងការណ៍រួមរវាងក្រសួងពាណិជ្ជកម្ម និងគណៈកម្មការសេដ្ឋកិច្ចអឺរ៉ុប-អាស៊ី នៅសណ្ឋាគារឡឺ រ៉ូយ៉ាល់ កាលពីថ្ងៃទី១៣ កុម្ភៈ លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម មានប្រសាសន៍ថា ៖ « នេះជាជំហានដំបូងដែលបើកផ្លូវឱ្យយើងជជែកគ្នាលម្អិតដើម្បីឱ្យមានការសិក្សារួមថា តើយើងមានអត្ថប្រយោជន៍ និងបញ្ហាប្រឈមអ្វីខ្លះ ។ ការដែលយើងចូលជាភាគីកិច្ចព្រមព្រៀងពាណិជ្ជកម្មសេរី នៅក្នុងដំណើរការចរចាសិក្សានេះត្រូវការរយៈពេល៣ ឬ៤ឆ្នាំ » ។
លោកជំទាវលើកឡើងថា កន្លងមក កម្ពុជាបាននាំចេញផលិតផលទៅប្រទេសជាសមាជិកគណៈកម្មការសេដ្ឋកិច្ចអឺរ៉ុប-អាស៊ី រួមមាន ស្បែកជើង កង់ ផលិតផលក្មេងលេង ផលិតផលកសិកម្មតិចតួច និងសម្លៀកបំពាក់ គិតជាទឹកប្រាក់ប្រហែល១០៤លានដុល្លារ ។ គេនាំចូលមកកម្ពុជាវិញមាន ត្រាក់ទ័រ ថ្នាំពេទ្យ និងជីធម្មជាតិ គិតទឹកប្រាក់ប្រមាណ១១លានដុល្លារកាលពីឆ្នាំ២០១៥ ហើយនៅឆ្នាំ២០១៦កន្លងទៅនេះ គិតជាទឹកប្រាក់មានទំហំប្រហាក់ប្រហែលនឹងឆ្នាំមុន ។
លោកស្រី Tatiana Volovaya សមាជិកក្រុមប្រឹក្សាភិបាលសមាហរណកម្ម និងម៉ាក្រូសេដ្ឋកិច្ចនៃគណៈកម្មការសេដ្ឋកិច្ចអឺរ៉ុប-អាស៊ី មានប្រសាសន៍ថា ៖ «ការចរចា និងពិភាក្សាថ្ងៃនេះ នឹងជួយពង្រឹង និងជំរុញពាណិជ្ជកម្មបន្ថែមទៀត ។ តួយ៉ាង ការធ្វើពាណិជ្ជកម្មរវាងកម្ពុជា ជាមួយបណ្តាប្រទេសនៃសហគមន៍សេដ្ឋកិច្ចអឺរ៉ុប-អាស៊ី បានកើនឡើង២០%នៅឆ្នាំ២០១៥ ហើយនៅឆ្នាំ២០១៦ ទំហំពាណិជ្ជកម្មកើនឡើងដល់៣០% ប៉ុន្តែយើងឃើញនៅមានអតុល្យភាពធំ២គឺ ទី១-ប្រទេសចំនួន៥ ជាសមាជិកក្នុងគណៈកម្មការសេដ្ឋកិច្ចអឺរ៉ុប-អាស៊ី ឃើញថា ការធ្វើពាណិជ្ជកម្មកើនឡើង តែភាគីកម្ពុជានិងរុស្ស៊ីទេ តែប្រទេស៤ផ្សេងទៀតមានកម្រិតនៅឡើយ ។ ដូច្នេះ យើងចង់ឱ្យសមាជិកប្រទេសផ្សេងទៀតបានចូលរួមក្នុងការធ្វើពាណិជ្ជកម្មនេះដែរ » ។
លោកស្រីបន្តថា ៖ « អតុល្យភាពសំខាន់ទី២-គឺប្រទេសជាសមាជិករបស់គណៈកម្មការសេដ្ឋកិច្ចអឺរ៉ុប-អាស៊ី បាននាំចូលទំនិញច្រើនពីកម្ពុជា តែនាំចូលទៅកម្ពុជាវិញមានចំនួនតិច នេះបង្ហាញថា យើងមានអតុល្យភាពខាងពាណិជ្ជកម្មចំនួនធំ ។ ដោយមើលឃើញចំណុចនេះ យើងមានឆន្ទៈចង់នាំចេញមកកម្ពុជាបន្ថែមទៀត » ៕
ចែករំលែកព័តមាននេះ