រាជធានីភ្នំពេញ ៖ ព្រលានយន្តហោះអន្តរជាតិថ្មីមួយនៅខេត្តកោះកុង នឹងចាប់ផ្តើមសាងសង់នាពេលឆាប់ៗខាងមុខ ខណៈបច្ចុប្បន្ន ក្រុមហ៊ុនកំពុងបង្ហាប់ដីដើម្បីសាងសង់ព្រលានយន្តហោះនេះ ។
បុគ្គលិកជាន់ខ្ពស់របស់ក្រុមហ៊ុន បាន និយាយក្នុងលក្ខខណ្ឌមិនបញ្ចេញឈ្មោះ នាព្រឹកថ្ងៃទី២ កុម្ភៈថា បច្ចុប្បន្ន ក្រុមហ៊ុនកំពុងបង្ហាប់ដីដើម្បីឈានទៅសាងសង់ព្រលានថ្មីនេះ។ ការសាងសង់នឹងចាប់ផ្តើមនៅពេលឆាប់ៗ ប៉ុន្តែព័ត៌មានលម្អិតពីព្រលាននេះ លោកបដិសេធមិនធ្វើអត្ថាធិប្បាយទេ ដោយសារវាជាការសម្ងាត់របស់ក្រុមហ៊ុន ។ លោកបន្តថា ៖ « ក្រុមហ៊ុនមិនចង់បង្ហាញព័ត៌មានលម្អិតនៅឡើយទេ ព្រោះក្រុមហ៊ុនចង់ធ្វើឲ្យមានភាពភ្ញាក់ផ្អើល នៅពេលព្រលាននេះបញ្ចប់ការសាងសង់នាពេលខាងមុខ» ។
ទោះជាយ៉ាងណា លោក កែវ ស៊ីវន អគ្គនាយកបច្ចេកទេសនៃរដ្ឋលេខាធិការដ្ឋានអាកាសចរណ៍ស៊ីវិល ថ្លែងថា ៖ « ក្រុមហ៊ុនពិតជាកំពុងបង្ហាប់ដីពិតមែន ប៉ុន្តែដំណើរការសាងសង់មិនទាន់ចាប់ផ្តើមទេ ព្រោះគម្រោងនេះកំពុងស្ថិតក្នុងដំណាក់កាលត្រួតពិនិត្យ និងវាយតម្លៃពីក្រុមប្រឹក្សាអភិវឌ្ឍន៍កម្ពុជានៅឡើយ ។ សម្រាប់នីតិវិធី និងរយៈពេលដើម្បីអនុម័តគម្រោងនេះនៅពេលណា និងចំណាយពេលយូរប៉ុណ្ណា វាអាស្រ័យលើយន្តការត្រួតពិនិត្យរបស់ក្រុមប្រឹក្សាអភិវឌ្ឍន៍កម្ពុជា » ។
ទោះជាយ៉ាងណា តាមព័ត៌មានរបស់ ក្រុមហ៊ុនកន្លងមកឲ្យដឹងថា រាជរដ្ឋាភិបាលកម្ពុជាបានអនុម័តនូវគម្រោងសាងសង់ព្រលានយន្តហោះអន្តរជាតិថ្មី ដែលវិនិយោគដោយ Tainjin Union Development Group ជាក្រុមហ៊ុនបាននិងកំពុងវិនិយោគលើរមណីយដ្ឋានទេសចរណ៍លំដាប់អន្តរជាតិនៅខេត្តកោះកុង ។
តំណាងក្រុមហ៊ុន Tainjin Union Development Group លោកស្រី ប៊ែលឡា ហ្សាងធ្លាប់មានប្រសាសន៍ថា ការធ្វើផែនការសាងសង់ព្រលានយន្តហោះលំដាប់អន្តរជាតិនេះបានបញ្ចប់ហើយ និងកំពុងត្រៀមរៀបចំផែនការដើម្បីសាងសង់ ។ ព្រលានយន្តហោះនេះអាចទទួលអ្នកដំណើរបាន១០លាននាក់ក្នុង១ឆ្នាំ និងអាចចុះចតយន្តហោះខ្នាតធំ Boeing 380 ហើយក្រុមហ៊ុនបានសិក្សាពីភូមិសាស្ត្រ និងកំណត់ទីតាំងសម្រាប់ព្រលានយន្តហោះនេះរួចហើយ ។
ក្រុមហ៊ុន Tainjin Union Development Group បានទទួលដីសម្បទានវិនិយោគពីរាជរដ្ឋាភិបាលកម្ពុជាទំហំ៤៥ពាន់ហិកតា ដែលគ្របដណ្តប់លើទឹកដីស្រុកបុទុមសាគរ និងស្រុកគិរីសាគរ ខេត្តកោះកុង និងគ្រោងបោះទុនវិនិយោគជាង៣.៨០០លានដុល្លារអាមេរិក ។
តាមព័ត៌មានរបស់ក្រុមហ៊ុននេះឲ្យដឹងថា បច្ចុប្បន្ន ក្រុមហ៊ុនបាននិងកំពុងដំណើរការគម្រោងរមណីយដ្ឋានលំដាប់ប្រណីតនៅខេត្តកោះកុងរួចហើយ រួមមាន សណ្ឋាគារលំដាប់ផ្កាយ៥ ភោជនីយដ្ឋាន និងទីលានវាយកូនហ្គោលលំដាប់អន្តរជាតិជាដើម ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងថា កម្ពុជាត្រូវការហេដ្ឋារចនាសម្ព័ន្ធគ្រប់បែបយ៉ាង ឲ្យតែមានការវិនិយោគ គឺវិនិយោគនៅទីណាក៏សំខាន់ ប៉ុន្តែកម្ពុជាដូចជាមិនត្រូវការព្រលានយន្តហោះធំនៅតំបន់នេះទេ ហើយអ្វីសំខាន់គឺថា គម្រោងនេះមានភាពពិតប្រាកដកម្រិតណា លោកមិនទាន់ដឹងនៅឡើយទេ ៕
ចែករំលែកព័តមាននេះ