ព្រះរាជាណាចក្រកម្ពុជា, ភ្នំពេញ៖ ដើម្បីលើកកម្ពស់ប្រជាជនកម្ពុជា ឱ្យកាន់តែមានចំណេះដឹងអំពីការថែទាំសុខភាពមាត់-ធ្មេញឱ្យកាន់តែប្រសើរជាងមុន ក្រុមហ៊ុន ខលហ្គេត ប៉ាម៉ូលីវ (Colgate-Palmolive) និងគណៈទន្តពេទ្យកម្ពុជា បានរៀបចំកម្មវិធីទិវាជាតិសុខភាពមាត់-ធ្មេញឆ្នាំ២០១៧ ក្រោមប្រធានបទ «ដំណើរឆ្ពោះទៅកាន់ភាពគ្មានរោគពុកធ្មេញ» ស្ថិតក្នុងទីរួមខេត្តកំពង់ស្ពឺ កាលពីព្រឹកថ្ងៃទី២៤ ខែមករា ឆ្នាំ២០១៧ ក្រោមអធិបតីដ៏ខ្ពង់ខ្ពស់ពីសំណាក់លោកហ៊ុន ម៉ានី តំណាងរាស្ត្រមណ្ឌលកំពង់ស្ពឺលោកទន្តបណ្ឌិត សុខុម រិទ្ធីវុធ ប្រធានគណៈទន្តពេទ្យជាតិ លោកស្រី ទឹម សាវា៉ត អភិបាលរងខេត្តកំពង់ស្ពឺ និងតំណាងក្រុមហ៊ុន ខលហ្គេត លោក សាំពុង ឆារុវីចិត្រាថាណា ។
យុទ្ធនាការឆ្នាំនេះ ចាប់ផ្តើមពីថ្ងៃទី ១ ដល់ថ្ងៃទី២៨ ខែកុម្ភៈ ឆ្នាំ២០១៧ ក្នុងគោលបំណងដើម្បីពិនិត្យ និងពិគ្រោះជំងឺមាត់-ធ្មេញដោយឥតគិតថ្លៃជូនដល់ប្រជាពលរដ្ឋ ដោយទន្តពេទ្យជំនាញមកពីគណៈទន្តពេទ្យកម្ពុជា ។
ក្នុងនាមជាក្រុមហ៊ុនដែលឈានមុខគេក្នុងពិភពលោកផ្នែកសុខភាពមាត់-ធ្មេញ ក្រុមហ៊ុនខលហ្គេត តែងតែរៀបចំកម្មវិធីទិវាជាតិសុខភាពមាត់-ធ្មេញជារៀងរាល់ឆ្នាំ ជាមួយបណ្តាប្រទេសជាង៨០នៅក្នុងពិភពលោក ដែលមានការសហការជាមួយសមាគមទន្តពេទ្យក្នុងតំបន់ប្រចាំប្រទេសនីមួយៗ ដើម្បីអប់រំប្រជាជនទូទៅឲ្យយល់កាន់តែច្បាស់ពីការថែទាំសុខភាពមាត់-ធ្មេញ ។ តាមរយៈទិវាជាតិសុខភាពមាត់-ធ្មេញ ក្នុងខែកុម្ភៈ ឆ្នាំ២០១៧នេះ ក្រុមហ៊ុនខលហ្គេត ប្តេជ្ញាថានឹងចូលរួមចំណែកក្នុងការប្រឆាំងភាពគ្មានរោគពុកធ្មេញដល់ប្រជាជនកម្ពុជា ហើយយុទ្ធនាការនេះមានគោលបំណងបង្កើនការយល់ដឹងបន្ថែមទៅលើសុខភាពមាត់-ធ្មេញ និងសកម្មភាពប្រចាំថ្ងៃដែលជាកត្តាបង្កជាផលប៉ះពាល់ដល់សុខភាពទូទៅរបស់ប្រជាជនកម្ពុជា ។
ការស្រាវជ្រាវបានបង្ហាញថា មាត់-ធ្មេញមានសុខភាពល្អពិតជាមានសារៈសំខាន់ណាស់ ព្រោះវាអាចជួយឱ្យរាងកាយរបស់យើងមានសុខភាពល្អ ដែលនេះជាមូលហេតុដ៏សំខាន់មួយសម្រាប់មនុស្សគ្រប់រូបគួរតែមានការថែរក្សា និងទទួលការពិនិត្យមាត់-ធ្មេញឲ្យបានទៀងទាត់និងត្រឹមត្រូវ ។
សកម្មភាពសំខាន់នៃយុទ្ធនាការនេះ គឺដើម្បីជំរុញទឹកចិត្តប្រជាពលរដ្ឋកម្ពុជាឲ្យទទួលបានការពិនិត្យ និងពិគ្រោះមាត់-ធ្មេញដោយឥតគិតថ្លៃនៅតាមបណ្តាគ្លីនិកមួយចំនួន ដែលមានដូចជាការជួយវិនិច្ឆ័យរោគសញ្ញាក្នុងដំណាក់កាលដំបូង ការព្យាបាលដែលមានប្រសិទ្ធភាព ការផ្តល់ប្រឹក្សាយោបល់ដែលមានជំនាញវិជ្ជាជីវៈ និងការចែកផលិតផលសាកល្បងសម្រាប់ការថែទាំមាត់-ធ្មេញនៅក្នុងគ្រួសារ។
ជាមួយនឹងការគាំទ្រ ក៏ដូចជាកិច្ចសហការយ៉ាងខ្លាំងក្លាពីគណៈទន្តពេទ្យកម្ពុជា ក្រុមហ៊ុនខលហ្គេត បានរៀបចំកម្មវិធីទិវាជាតិសុខភាពមាត់-ធ្មេញអស់ជាច្រើនឆ្នាំ និងប្រកបទៅដោយភាពជោគជ័យ ដោយមានការចូលរួមនិងគាំទ្រពីប្រជាជនកម្ពុជាយ៉ាងច្រើន ។ ឆ្នាំនេះ ក្រុមហ៊ុនខលហ្គេតនឹងបន្តសកម្មភាពនេះឲ្យកាន់តែច្រើនជាងមុន ព្រោះបើរាប់មកដល់ពេលនេះមានគ្លីនិកជាង២៥០កន្លែងក្នុងរាជធានីភ្នំពេញ និងខេត្តធំៗមួយចំនួនរួចមកហើយ ដែលទទួលពិនិត្យនិងពិគ្រោះជំងឺមាត់-ធ្មេញដោយឥតគិតថ្លៃជូនដល់ប្រជាពលរដ្ឋកម្ពុជា។
ក្រុមហ៊ុន ខលហ្គេត រីករាយនឹងចែករំលែកនូវចំណេះដឹងផ្នែកសុខភាពមាត់-ធ្មេញ ការចែកផលិតផលសាកល្បង និងការលើកកម្ពស់អនាម័យមាត់-ធ្មេញ។ យើងទាំងអស់គ្នាចូលរួមកម្ចាត់ភាពគ្មានរោគពុកធ្មេញ ទៅកាន់ប្រជាជនកម្ពុជាទាំងអស់ឱ្យមានស្នាមញញឹមស្រស់ស្រាយ និងមាត់-ធ្មេញមានសុខភាពល្អ ៕
ចែករំលែកព័តមាននេះ