រាជធានីភ្នំពេញ ៖ ថវិកាឆ្នាំ២០១៧ ជាថវិកាមួយដែលបានមកពីការប្រឹងប្រែង ហើយធានាបាននូវប្រក្រតីកម្មនៃជីវភាព និងស្ថិរភាពហិរញ្ញវត្ថុ ដែលហៅថាជា «ថវិកាវិត្ថារកម្មដោយប្រយ័ត្នប្រយែង» ព្រោះថា ចំណូលនិងចំណាយថវិកាជាតិមានទំហំស្មើគ្នា ប៉ុន្ដែកើនឡើងធំ ដោយក្នុងឆ្នាំ២០១៧ ការចំណាយថវិកាជាតិបានកើនដល់១៥,៧% ។ នេះបើតាមការលើកឡើងរបស់មន្ត្រីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុ ។
ថ្លែងនៅក្នុងពិធីបើកវេទិកាសាធារណៈស្ដីពី «ការគ្រប់គ្រងម៉ាក្រូសេដ្ឋកិច្ច និងថវិកាឆ្នាំ២០១៧» កាលពីព្រឹកថ្ងៃទី២៣ មករា នៅឯក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ បានលើកឡើងថា ការចំណាយថវិកាឆ្នាំ២០១៧ មានកំណើនដល់១៥,៧% ដែលការចំណាយទាំងនោះភាគច្រើន គឺផ្ដោតទៅលើការកសាងហេដ្ឋារចនាសម្ព័ន្ធ ការអភិវឌ្ឍធនធានមនុស្ស ការដំឡើងប្រាក់បៀវត្សមន្ត្រីរាជការ ប្រាក់សោធននិវត្តន៍ និងប្រាក់លើកទឹកចិត្តជាដើម ។
លោកថ្លែងថា ៖ « កម្ពុជា ជាប្រទេសមួយដែលកំពុងឆ្លងកាត់ដំណើរការផ្លាស់ប្ដូរមានគុណភាពពីកម្រិតមួយទៅកម្រិតមួយថ្មី គឺការផ្លាស់ប្ដូររចនាសម្ព័ន្ធសេដ្ឋកិច្ច សង្គម វិទ្យាសាស្ត្រ និងរបៀបរស់នៅ ទាំងអស់នេះជាកត្ដាមួយដែលយើងត្រូវគិតគូរថា តើថវិកាឆ្នាំ២០១៧ ត្រូវគិតបែបណា ដោយយកកត្តានីមួយៗមករួមបញ្ចូលគ្នាដើម្បីរៀបចំថវិកាជាតិ » ។
លោកថ្លែងបន្តថា ៖ « ថវិកាឆ្នាំ២០១៧ ជាថវិកាដែលគិតពីមនុស្ស ព្រោះអ្វីៗគឺចាប់ផ្ដើមពីមនុស្សទាំងអស់ ។ ដូច្នេះ ថវិកាឆ្នាំ២០១៧នេះ គឺចាប់ផ្ដើមគិតគូរពីប្រាក់បៀវត្សមន្ត្រីរាជការ កងទ័ពឲ្យដល់គោលដៅ១លានរៀលក្នុង១ខែ»។
យោងតាមគោលនយោបាយបៀវត្សថ្នាក់ជាតិឆ្នាំ២០១៧ គ្រោងនឹងដំឡើងបៀវត្សសរុបអប្បរមាដល់មន្ត្រីរាជការស៊ីវិល នឹងឡើងដល់ជាង៨៥ម៉ឺនរៀល, គ្រូបង្រៀន និងគ្រូពេទ្យ នឹងឡើងដល់ជាង៩៥ម៉ឺនរៀល, នគរបាលជាតិ ថ្នាក់ពលបាលត្រី នឹងឡើងដល់ជាង៩៣ម៉ឺនរៀល, យោធិន(ពលទោ) នឹងឡើងដល់ជាង៨៨ម៉ឺនរៀល ។ ចំណែកក្រុមប្រឹក្សារាជធានី-ខេត្ត នឹងដំឡើងប្រាក់ឧបត្ថម្ភប្រធានជាង១លានរៀល សមាជិកពី៨៧ដល់៩៧ម៉ឺនរៀល ចាប់ពីខែមករានេះតទៅ ។ ក្រុមប្រឹក្សាក្រុង ស្រុក ខណ្ឌ នឹងដំឡើងប្រាក់ឧបត្ថម្ភប្រធានពី៨១ដល់ជាង៩៣ម៉ឺនរៀល, សមាជិកពី៦៥ដល់៧៥ម៉ឺនរៀល ចាប់ពីខែមករានេះតទៅ ។ ក្រុមប្រឹក្សាឃុំ សង្កាត់ នឹងដំឡើងប្រាក់ឧបត្ថម្ភប្រធាន ពី៧៥ទៅ៨៨ម៉ឺនរៀល ជំទប់ទី១ ទី២ ចៅសង្កាត់រងទី១ និងទី២ ពី៥៥ដល់៦៥ម៉ឺនរៀល និងសមាជិក ពី៤៥ដល់៥៧ម៉ឺនរៀលចាប់ពីខែមករានេះតទៅ។ ដោយឡែកមេភូមិ នឹងដំឡើងប្រាក់ឧបត្ថម្ភប្រធានពី២០ដល់ជាង២២ម៉ឺនរៀល ជំនួយការភូមិពី១៦ដល់១៨ម៉ឺនរៀល និងសមាជិក ពី១៤ដល់១៦ម៉ឺនរៀលចាប់ពីខែមករានេះ តទៅ ។
ក្រៅពីប្រាក់ខែ ក៏មានប្រាក់ឧបត្ថម្ភផ្សេងៗទៀតទាំងគ្រួសារ ទាំងប្រាក់រង្វាន់ ដើម្បីឲ្យមន្ត្រីដែលកាន់ការងារអនុវត្តការងាររបស់ខ្លួនមានប្រសិទ្ធភាពខ្ពស់ កាន់តែមានមធ្យោបាយ ជីវភាពគ្រាន់បើ និងមានលទ្ធភាពគ្រប់គ្រាន់ក្នុងការបម្រើសេវាសាធារណៈជូនប្រជាពលរដ្ឋឲ្យកាន់តែល្អប្រសើរ ។
លោកវង្សី វិស្សុត ថ្លែងថា ៖ « យើងចាក់សាំងដើម្បីឲ្យអ្នកធ្វើមានកម្លាំង មានផលិតភាព មានគុណភាពជាងមុនក្នុងការផ្ដល់សេវា » ។
ជាមួយគ្នានេះ ការគិតគូរប្រាក់សោធនក៏មានសម្រាប់មន្ត្រីរាជការ ជនពិការ និងដំឡើងផងដែរ ហើយទៅថ្ងៃអនាគត ក្នុងក្របខ័ណ្ឌគិតគូរពីមនុស្សនេះ យើងកំពុងតែរៀបចំក្របខ័ណ្ឌគោលនយោបាយគាំពារសង្គម ។
ការបណ្ដុះបណ្ដាលធនធានមនុស្ស ក៏ស្ថិតក្នុងក្របខ័ណ្ឌគិតគូរពីមនុស្សផងដែរ ដោយមានក្រសួង២ បានស្រូបចំណាយថវិកាជាតិរហូតដល់៤,៥%នៃកំណើន GDP មានចំនួន២៣,៧% ដែលជាចំណាយមួយធំ ។
តាមការធ្វើបទបង្ហាញរបស់លោក ហាវ រតនៈ អគ្គនាយកនៃអគ្គនាយកថវិកា បានលើឡើងថា ក្រសួងដែលនឹងចំណាយខ្ពស់ជាងគេក្នុងឆ្នាំ២០១៧នេះរួមមាន ក្រសួងអប់រំ យុវជន និងកីឡា គ្រោងនឹងចំណាយថវិកាជាតិប្រមាណ១២,៩៥%នៃការចំណាយថវិការដ្ឋសរុប ស្មើនឹង៣,០៨%នៃផ.ស.ស។ ក្រសួងសាធារណការ និងដឹកជញ្ជូន គ្រោងនឹងចំណាយ១១,៤០% នៃការចំណាយថវិការដ្ឋសរុប ស្មើនឹង២,៧១នៃផ.ស.ស ។ ក្រសួងការពារជាតិ ចំនួន៨,៧៨%នៃការចំណាយថវិការដ្ឋសរុប ស្មើនឹង២,០៩%នៃផ.ស.ស និងក្រសួងសុខាភិបាល ចំនួន៨,០៣% ស្មើនឹង១,៩១%នៃផ.ស.ស ៕
ចែករំលែកព័តមាននេះ