លោក ឌី រ័ត្នខេមរុណ ៖ សូមពលរដ្ឋចៀសឆ្ងាយពីគ្រឿងញៀ.ន
រាជធានីភ្នំពេញ ៖ ស្របតាមយុទ្ធនាការប្រយុទ្ធប្រឆាំងគ្រឿងញៀ.នខុសច្បាប់លើកទី១ទូទាំងប្រទេសរបស់រាជរដ្ឋាភិបាលកម្ពុជា លោកអភិបាលរងខណ្ឌមានជ័យ …
រាជធានីភ្នំពេញ ៖ ស្របតាមយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១ទូទាំងប្រទេសរបស់រាជរដ្ឋាភិបាលកម្ពុជា លោកអភិបាលរងខណ្ឌមានជ័យ និងជាប្រធានអនុសាខាកាកបាទក្រហមកម្ពុជាប្រចាំខណ្ឌ បានធ្វើការអំពាវនាវជាសាធារណៈដល់បងប្អូនប្រជាពលរដ្ឋដែលរស់នៅក្នុងមូលដ្ឋានខណ្ឌមានជ័យរបស់ខ្លួនក៏ដូចជាប្រជាពលរដ្ឋទូទៅ ធ្វើយ៉ាងណាមេត្តាចៀសសឲ្យឆ្ងាយពីគ្រឿងញៀន ។
ការថ្លែងរបស់លោកអភិបាលរងខណ្ឌមានជ័យ និងជាប្រធានអនុសាខាកាកបាទក្រហមកម្ពុជាប្រចាំខណ្ឌ ធ្វើឡើងក្នុងពិធីចែកអំណោយមនុស្សធម៌របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ចែកជូនដល់ពលរដ្ឋក្រីក្រចំនួន៤៤គ្រួសារដែលរស់នៅក្នុងសង្កាត់ចាក់អង្រែក្រោម ខណ្ឌមានជ័យ កាលពីព្រឹកថ្ងៃទី១៧ ខែមករា ឆ្នាំ២០១៧ ។
ថ្លែងក្នុងឱកាសនោះ លោក ឌី រ័ត្នខេមរុណ បានឲ្យដឹងថា គ្រឿងញៀនគឺជាសារធាតុញៀនដែលចូលទៅពង្វក់ស្មារតី និងអារម្មណ៍របស់ជនដែលបានសេពវាឲ្យក្លាយជាមនុស្សពោរពេញទៅដោយកំហឹង ខ្វះការពិចារណា និងជាពិសេសខ្វះភាពម្ចាស់ការលើខ្លួនឯង ដែលបង្កឲ្យខ្លួនអាចប្រព្រឹត្តនូវទង្វើមិនគម្បីមួយចំនួនបានគ្រប់ពេលវេលា ។ បន្ថែមពីនោះ ចំពោះប្អូនៗ ឬក្មួយៗជាយុវជន យុវតី ដែលបានប្រើប្រាស់វាហើយនោះ អាចបែកអារម្មណ៍បោះបង់ការសិក្សា ដើរចូលហ្វូងសង្គមបងតូចបងធំ និងអាចប្រព្រឹត្តនូវសកម្មភាពភាពមួយចំនួនដែលសង្គមជាតិកំពុងស្អប់ខ្ពើម ដូចជាអំពើ លួច ឆក់ ប្លន់ ជាដើម ។
លោកបន្ថែមថា គ្រឿងញៀន ជាសារធាតុញៀនដែលបំផ្លាញសង្គមមនុស្សទូទៅមិនថាក្មេង ឬចាស់ ពិសេសសង្គមជាតិទាំងមូលឲ្យធ្លាក់ចូលក្នុងភ្នក់ភ្លើងដោយសារវា ដូច្នេះសូមបងប្អូននិយាយថា ទេចំពោះគ្រឿងញៀន គ្មានគ្រឿងញៀនប្រទេសជាតិនឹងសម្បូរសប្បាយរីកចម្រើន ពិសេសសង្គមមនុស្សនឹងមានការអប់រំល្អច្រើន ។
ក្នុងឱកាសដដែលនោះ លោកប្រធានអនុសាខាកាកបាទក្រហមខណ្ឌមានជ័យក៏បានមានប្រសាសន៍ផ្ញើរក្តីនឹករលឹកយ៉ាងក្រៃលែងផងដែរពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនចំពោះបងប្អូន ថ្វីត្បិតតែពេលនេះសម្តេចមិនមានវត្តមាននៅទីនេះពិតប្រាកដមែន ប៉ុន្តែចិត្តរបស់សម្តេចតែងឋិតនៅក្បែរបងប្អូនជានិច្ច ដែលលោកតែងតែក្រើនរំលឹកដល់មន្ត្រីក្រោមឱវាទឲ្យធ្វើយ៉ាងណាត្រូវយកចិត្តទុកដាក់ខ្ពស់ទៅលើប្រជាពលរដ្ឋក្រីក្រលំបាក តោកយ៉ាក ចាស់ជរា អ្នកកើតជម្ងឺរុំារ៉ៃ និងជាពិសេសជនមានផ្ទុកមេរោគអេដស៍ គឺមិនត្រូវមើលរំលងជាដាច់ខាត ព្រោះសុខទុក្ខរបស់ពលរដ្ឋកម្ពុជា គឺជាសុខទុក្ខរបស់សម្តេចកត្តិព្រឹទ្ធិបណ្ឌិត ប៊ុន រ៉ានី ហ៊ុន សែន ដូចគ្នា ។
សូមបញ្ជាក់ថា អំណោយដែលត្រូវបានចែកជូនក្នុង១គ្រួសារៗទទួលបាន មី, ទឹកស៊ីអ៊ីវ, ទឹកត្រី, ទឹកសុទ្ធ, អង្ករ១ប៉ាវ៥០គីឡូក្រាម, ឃីត១ឈុត មាន មុង ភួយ ក្រមា និងថវិការ២ម៉ឺនរៀលផងដែរ ៕
ចែករំលែកព័តមាននេះ