អាជីវកម្មថ្មភ្នំ ខ្លះមានច្បាប់ខ្លះអត់ច្បាប់ ខ្លះកន្ទេលធំបន្លំដេក
ខេត្ដព្រៃវែង ៖ បច្ចុប្បន្ននេះ គេសង្កេតឃើញក្រុមឈ្មួញកំពុងសំរុកធ្វើសកម្មភាពកាយយកថ្មភ្នំនៅលើភ្នំឈើកាច់ និងដឹកជញ្ជូនចេញតាមរថយន្តធំៗ
ខេត្ដព្រៃវែង ៖ បច្ចុប្បន្ននេះ គេសង្កេតឃើញក្រុមឈ្មួញកំពុងសំរុកធ្វើសកម្មភាពកាយយកថ្មភ្នំនៅលើភ្នំឈើកាច់ និងដឹកជញ្ជូនចេញតាមរថយន្តធំៗ
ខេត្ដព្រៃវែង ៖ បច្ចុប្បន្ននេះ គេសង្កេតឃើញក្រុមឈ្មួញកំពុងសំរុកធ្វើសកម្មភាពកាយយកថ្មភ្នំនៅលើភ្នំឈើកាច់ និងដឹកជញ្ជូនចេញតាមរថយន្តធំៗរាប់រយឡានក្នុង១ថ្ងៃៗ ខ្លះមានច្បាប់ ខ្លះក៏អត់ច្បាប់ ខ្លះទៀតកន្ទេលធំបន្លំដេកយ៉ាងសុខសាន្ដ ។ ពួកគេនៅតែអាចធ្វើសកម្មភាពបានជារៀងរាល់ថ្ងៃ ខណៈដែលមន្ត្រីជំនាញប្រចាំខេត្ដព្រៃវែង បានត្រឹមតែប្រាប់អ្នកកាសែតថាចាំចុះទៅមើល ប៉ុន្តែជាក់ស្តែងគឺស្ងាត់ឈឹង មិនឃើញចុះទៅមើលសោះ មិនដឹងហេតុអ្វី ?
ប្រភពពីអ្នកស្រុកដែលរកស៊ីវាយថ្មភ្នំនៅលើភ្នំឈើកាច់នោះ បានប្រាប់កោះសន្ដិភាពថា នៅលើភ្នំនោះមានក្រុមហ៊ុនចំនួន៤ ដែលទទួលបានអាជ្ញាប័ណ្ណធ្វើអាជីវកម្មយកថ្មភ្នំពីក្រសួង គឺក្រុមហ៊ុន លឹម ហុង, ក្រុមហ៊ុន ផុនផលិត, ក្រុមហ៊ុន ឡេង ហួ និងក្រុមហ៊ុន ឡុង ណាំ ។ ក្រៅពីនេះនៅមានក្រុមហ៊ុនមួយចំនួនទៀត ដែលកំពុងធ្វើអាជីវកម្មយកខ្សាច់ភ្នំនៅតាមជើងភ្នំឈើកាច់ដែរ ប៉ុន្តែភាគច្រើនសកម្មភាពរបស់ក្រុមហ៊ុនទាំងនោះ គឺធ្វើមិនចំគោលដៅ ដែលបានកំណត់នៅក្នុងអាជ្ញាប័ណ្ណនោះទេ គឺគេជីកយកគ្រប់កន្លែងដោយប្រើរូបភាពទិញយកដីពីប្រជាពលរដ្ឋនៅជុំវិញជើងភ្នំនោះ ដែលសកម្មភាពបែបនេះត្រូវបានគេនិយាយថាខុសច្បាប់ទាំងស្រុង ។
ដោយឡែកក្រុមហ៊ុនដែលមានអាជ្ញាប័ណ្ណ និងកំពុងធ្វើសកម្មភាពត្រឹមត្រូវនោះ បានលួចបង្ហើបប្រាប់ឱ្យដឹងថា ការពិតក្រុមហ៊ុនដែលទទួលបានអាជ្ញាប័ណ្ណធ្វើអាជីវកម្មយកថ្មភ្នំនៅលើភ្នំឈើកាច់នេះ មានចំនួន៥ក្រុមហ៊ុន ប៉ុន្តែកាលពីប៉ុន្មានខែមុននេះ មានក្រុមហ៊ុន១ដែលគេមិនបានចាំឈ្មោះ បានគេចមិនព្រមបង់សួយសារអាករចូលរដ្ឋប្រហែលជា២ទៅ៣ឆ្នាំជាប់គ្នា ហើយត្រូវក្រសួងចាប់បង្ខំឱ្យបង់ផាកពិន័យជិត១០ម៉ឺនដុល្លារ ។ ម្ចាស់ក្រុមហ៊ុននោះមិនព្រមបង់ទើបត្រូវក្រសួងសម្រេចលុបអាជ្ញាប័ណ្ណចោលតែម្តង ។ តែទោះជាយ៉ាងណាក៏ដោយថ្មីៗនេះគេបានឮដំណឹងមកថា ម្ចាស់ក្រុមហ៊ុននោះមានខ្សែនៅខាងលើ ពេលនេះកំពុងតែរត់ការសុំអាជ្ញាប័ណ្ណថ្មី ដោយប្រើឈ្មោះក្រុមហ៊ុនថ្មី ព្រោះកន្លែងចាស់ស្រួលកើបជាង ។ បើគេធ្វើបែបនេះបានមែន នោះគឺវាមិនយុត្តិធម៌ទេសម្រាប់ក្រុមហ៊ុនផ្សេងទៀត ដែលគេរកស៊ីបង់ពន្ធចូលរដ្ឋត្រឹមត្រូវនោះ ។
ចំណែកខាងមន្ត្រីមូលដ្ឋានវិញ ក៏បានបង្ហើបប្រាប់កោះសន្ដិភាពដែរថា នៅលើភ្នំនោះមានក្រុមហ៊ុន១ក្នុងចំណោម៤ គឺក្រុមហ៊ុន ឡុង ណាំ ដែលបានធ្វើសកម្មភាពយកថ្មភ្នំ និងយកខ្សាច់ភ្នំខុសទីតាំងអាជ្ញាប័ណ្ណ ដោយប្រើរូបភាពទិញពីអ្នកស្រុកដែលនៅជិតនោះ ។ កន្លងទៅថ្មីៗនេះសកម្មភាពជីកយកខ្សាច់ភ្នំរបស់ក្រុមហ៊ុន ឡុង ណាំ ក៏បានធ្វើឱ្យបាក់ដីប៉ះពាល់ដល់ដីចំការ និងផ្ទះសម្បែងអ្នកស្រុកនៅក្បែនោះជាច្រើនគ្រួសារផងដែរ ដោយសារតែគេធ្វើសកម្មភាពជីកយកខ្សាច់ភ្នំនោះ នៅគៀកជាប់ដីចំការ និងផ្ទះអ្នកស្រុកខ្លាំងពេក ។ រហូតមកដល់ពេលនេះ ក្រុមហ៊ុន ឡុង ណាំ បានដោះស្រាយសំណងជូនអ្នកស្រុករួចរាល់អស់ហើយ គឺនៅសល់តែខាងមន្ទីរជំនាញរ៉ែនិងថាមពលខេត្ត ដែលគេមិនទាន់ឃើញចាត់វិធានការអ្វីទេ ចំពោះសកម្មភាពខុសច្បាប់នេះ ។
ដោយឡែកក្រៅពីក្រុមហ៊ុន ឡុង ណាំ គឺនៅមានឈ្មួញម្នាក់ទៀតឈ្មោះលោកស្រី គ្រុឌ កូឡា ដែលកំពុងតែលួចធ្វើសកម្មភាពជីកកាយយកថ្មភ្នំនៅលើភ្នំឈើកាច់នេះដែរ ប៉ុន្តែមិនមានរូបភាពជាក្រុមហ៊ុនអ្វីទេ ហើយក៏មិនមានច្បាប់ទំលាប់ ឬអាជ្ញាប័ណ្ណអ្វីដែរ គឺគេធ្វើឆៅតែម្តង ដោយប្រើរូបភាពទិញថ្មពីក្រុមហ៊ុនរួចដឹកយកទៅចាក់ផ្ញើនៅលើដីទាហាន K89 នៅលើភ្នំ ។ បន្ទាប់មកទើបយកគ្រឿងចក្រដែលបិទស្លាកបញ្ជាការដ្ឋានវិស្វកម្មកង៧១៨ ទៅជីកកាយយកថ្មភ្នំនៅក្បែរទីតាំងដែលគេចាក់ផ្ញើថ្មភ្នំនោះតែម្តង ។ ប្រភពដដែលនេះបានចោទថា លោកស្រីម្ចាស់ក្រុមហ៊ុនកាយយកថ្មភ្នំលក់ទៅឱ្យកងវិស្វកម្ម ដែលកំពុងធ្វើផ្លូវនៅជីភូ ខេត្តស្វាយរៀង ហើយសកម្មភាពនេះគេធ្វើច្រើនខែមកហើយ និងកំពុងបន្តធ្វើដល់សព្វថ្ងៃ ប៉ុន្តែគ្មានច្បាប់អនុញ្ញាតិទេ ទំនងជ្រកក្រោមស្លាកកងវិស្វកម្មដែលសង្ស័យ កន្ទេលធំបន្លំដេក ។
ពាក់ព័ន្ធនឹងសកម្មភាពជីកកាយយកថ្មភ្នំ និងខ្សាច់ភ្នំ ដោយខុសទីតាំងអាជ្ញាប័ណ្ណ និងគ្មានច្បាប់ទំលាប់នេះ មន្ត្រីជំនាញរ៉ែម្នាក់ឈ្មោះ ទ្រី ដែលទទួលខុសត្រូវខាងផ្នែកនេះបានទទួលស្គាល់ថាលោកស្រី គ្រុឌ កូឡា ពិតជាគ្មានច្បាប់មែន ។ ចំណែក្រុមហ៊ុន ឡុង ណាំ ក៏បានធ្វើខុសទីតាំងដែរ ហើយលោកនិយាយថា កំពុងត្រៀមឯកសារចាត់ការហើយ ។
ដោយឡែកលោក ជា កក្តដា ប្រធានមន្ទីររ៉ែនិងថាមពលខេត្តព្រៃវែង ក៏បានបញ្ជាក់តាមទូរស័ព្ទថា ករណីនេះលោកបានដឹងហើយ លោកនឹងចុះទៅពិនិត្យមើលដោយផ្ទាល់តែម្តង ដើម្បីចាត់ការទៅលើក្រុមអ្នកធ្វើល្មើសច្បាប់ទាំងនោះ ។
សូមបញ្ជាក់ថា បើទោះបីជាលោកប្រធានមន្ទីរបានអះអាងបែបនេះក្តី ប៉ុន្តែរហូតមកដល់ពេលនេះគេនៅមិនទាន់ឃើញលោកប្រធានមន្ទីរចុះទៅពិនិត្យមើលដូចសម្ដីទេ ផ្ទុយទៅវិញសកម្មភាពរបស់ក្រុមឈ្មួញ គឺនៅតែបន្តធ្វើខុសច្បាប់ជារៀងរាល់ថ្ងៃ ដែលធ្វើឱ្យបាត់បង់ចំណូលជាតិ យ៉ាងច្រើនសន្ធឹកសន្ធាប់ តើជាកំហុសរបស់អ្នកណា ?
ចែករំលែកព័តមាននេះ