ស្នេហ៍ឆក់កណ្ដៀតក្នុងពន្ធនាគារ ពោះធំ2ខែលេបថ្នាំរំលូត
ខេត្ដប៉ៃលិន ៖ ប្រភពព័ត៌មានចេញពីពន្ធនាគារខេត្តប៉ៃលិន កាលពីរសៀលថ្ងៃទី៨ មករា ថា ក្រោយពីមានរឿងរ៉ាវមន្ត្រីស្រឡាញ់អ្នកទោសគួរឱ្យចាប់អារម្មណ៍ម្ដង
ខេត្ដប៉ៃលិន ៖ ប្រភពព័ត៌មានចេញពីពន្ធនាគារខេត្តប៉ៃលិន កាលពីរសៀលថ្ងៃទី៨ មករា ថា ក្រោយពីមានរឿងរ៉ាវមន្ត្រីស្រឡាញ់អ្នកទោសគួរឱ្យចាប់អារម្មណ៍ម្ដង មកដល់ឥឡូវនេះក៏មានរឿងអ្នកទោសស្រឡាញ់អ្នកទោសដូចគ្នា រហូតដល់មានផ្ទៃពោះ២ខែ ក៏ចាប់ផ្តើមលេបថ្នាំរំលូត ។ គេបានបន្ទោសទៅលើលោក នៅ ធឿង ប្រធានពន្ធនាគារខេត្ត ដឹកនាំមានភាពធូររលុង និងអត្តនោម័តជ្រុលពេក ទើបធ្វើឱ្យអ្នកទោសប្រុសស្រីពីរនាក់ អាចរួមរ័កគ្នារហូតដល់មានកូន ។ លុះដល់ពេលពោះកាន់តែធំទៅៗ លាក់មិនកំបាំង ក៏ប្រើឱ្យគេទិញថ្នាំយកទៅលេបរំលូតកូនចោលតែម្តង ។
ប្រភពព័ត៌មានបានឱ្យដឹងថា អ្នកទោសដែលប្រព្រឹត្តខុសវិន័យ ដោយសារស្នេហាឆក់កណ្ដៀតលួចលាក់មិនជិតនោះ ឈ្មោះ សំ ប៊ុល ភេទប្រុស ជាប់ទោសបទល្មើសគ្រឿងញៀន និងឈ្មោះ អៀង លំអង ភេទស្រី បទល្មើសគ្រឿងញៀនដូចគ្នា ។ ការមានឱកាសបង្កាត់ភ្លើងស្នេហ៍ រវាងអ្នកទោសប្រុសស្រីទាំង២នេះ ដោយសារត្រូវបានលោកប្រធានពន្ធនាគារខេត្ត អនុញ្ញាតឱ្យអ្នកទាំងពីរចេញមកដាំបាយនៅខាងក្រៅពន្ធនាគារជារៀងរាល់ថ្ងៃ ។ លុះចប់កិច្ចការលោកប្រធានពន្ធនាគារ មិនបានឱ្យអ្នកទោសទាំងនោះចូលទៅក្នុងបន្ទប់ឃុំឃាំងវិញនោះទេ ដោយទុកឱ្យនៅខាងក្រៅ និងមានសេរីភាព ។
ប្រភពបន្តទៀតថា ជាឱកាសល្អ ខណៈមន្ត្រីអនុរក្សពន្ធនាគារដល់ម៉ោងសម្រាកពីការងារ មិនបានចាំមើលពួកគេ ទើបអ្នកទាំងពីរបានលួចរួមភេទជាមួយគ្នាជាច្រើនលើកច្រើនសា ដោយលើកទី១ នៅក្នុងបន្ទប់ទឹករបស់លោកប្រធានពន្ធនាគារ ជាប់នឹងបន្ទប់ធ្វើការរដ្ឋបាល កាលពីប៉ុន្មានខែកន្លងមក ។ លើកទី២ ពួកគេរួមរ័កជាមួយគ្នា កាលពីថ្ងៃទី២៩ ខែវិច្ឆិកា ឆ្នាំ២០១៦ នៅក្រោយអគារមន្ត្រីធ្វើការ ។
ប្រភពបញ្ជាក់ទៀតថា រហូតដល់ថ្ងៃទី០១ ខែមករា ឆ្នាំ២០១៧ អ្នកទោសស្រី ឈ្មោះ អៀង លំអង បានទូរស័ព្ទឱ្យឈ្មោះ និត នី ដែលទើបនឹងចេញពីពន្ធនាគារថ្មីៗ ជួយទិញថ្នាំលេបដើម្បីរំលូតកូនក្នុងផ្ទៃ ព្រោះដឹងថាខ្លួនឯងមានកូនចំនួន២ទៅ៣ខែហើយ ។ ការលេបថ្នាំរំលូតកូននេះអស់រយៈពេល៣ថ្ងៃ គឺចាប់តាំងពីថ្ងៃទី១រហូតដល់ថ្ងៃទី៣ មករា កូនក្នុងផ្ទៃក៏បានធ្លាក់ដូចបំណងមែន ។
ប្រភពដដែលបានបញ្ជាក់ទៀតថា បច្ចុប្បន្នប្រធានពន្ធនាគារខេត្តរូបនេះ នៅបន្តលាក់បាំងរឿងអាស្រូវមួយនេះ ដោយខ្លាចក្រែងបែកការណ៍ ។ ប៉ុន្ដែខាងអនុរក្សពន្ធនាគារប្រុសស្រីបានដឹងរឿងនេះគ្រប់ៗគ្នា ហើយក៏បានរៀបចំធ្វើរបាយការណ៍ទុកផងដែរ ។ អនុរក្សពន្ធគារមួយចំនួនសុំឱ្យខាងថ្នាក់លើ ចុះទៅត្រួតពិនិត្យចំពោះបញ្ហារញ៉េរញ៉ៃមួយនេះ បើលាក់ទុកបែបនេះ នៅថ្ងៃខាងមុខ នឹងមានបញ្ហាកាន់តែច្រើនជាក់ជាមិនខាន អាចក្លាយជាសម្លកំពិស ។
ពាក់ព័ន្ធនឹងបញ្ហានេះ លោក ហេង ចាន់ដារ៉ា ប្រធានការិយាល័យអប់រំ នៃពន្ធនាគារខេត្តប៉ៃលិន បានឱ្យដឹងថា រឿងរ៉ាវអ្នកទោសប្រុសស្រី១គូរួមរ័កគ្នា រហូតដល់មានកូននៅពន្ធនាគារ ពិតជាមានមែន ។ លោកបន្តទៀតថា បើចង់ដឹងច្បាស់ជាងនេះសូមឱ្យទាក់ទងសួរនាំទៅលោក នៅ ធឿង ប្រធានពន្ធនាគារខេត្តទៅចុះ ក្រែងច្បាស់ជាង ។
ចំណែកលោក នៅ ធឿង ប្រធានពន្ធនាគារខេត្តប៉ៃលិន ខាងភ្នាក់ងារយើងបានទាក់ទងជាច្រើនលើកច្រើនសា ដោយទូរស័ព្ទចូលដែរ តែអត់មានអ្នកទទួល ៕
ចែករំលែកព័តមាននេះ