បុរសវ័យចំណាស់ម្នាក់មានមុខរបរដើរលក់ផ្លែត្របែកតាមម៉ូតូ នៅតាមចំនុចភ្លើងស្តុបក្នុងទីក្រុង បានធ្វើឲ្យគេឯង គោរពស្ញប់ស្ញែងពីទឹកចិត្តព្រហ្មវិហារធម៌របស់គាត់ចំពោះកូនស្រីតូចម្នាក់ ។ ជាមួយផ្លែត្របែក ច្រកក្នុងថង់តូចៗ ភ្ជួររនោងលើម៉ូតូ បុរសរូបនេះតែងតែដឹកកូនស្រីតូចរបស់ខ្លួនទៅជាមួយដែរ ។
នៅរៀងរាល់ពេលដែលគាត់ឈប់ម៉ូតូលក់ដូរ បុរសនោះតែតែងទាញក្តាឈ្នួនពីម៉ូតូកង់បីមកឲ្យកូនស្រីតូចរបស់ខ្លួនរៀន មិនឲ្យទំនេរឥតប្រយោជន៍នោះឡើយ ។ រៀនអានអក្សរ រៀនសរសេរ ក ខ គ ឃ ង ជាដើម ។
អ្នកឃើញសកម្មភាពបុរសរូបនេះ និងកូនស្រី បានកោតសេរសើរ និងស្ញប់ស្ញែងសកម្មភាពឪពុកកូនទាំងពីរនាក់នេះយ៉ាងខ្លាំង ។ មើលទៅទោះបីឪពុកហត់កាយ តែមិនខ្វះក្តីស្រឡាញ់ចំពោះកូនស្រីនោះឡើយ ។ នៅពេលទិដ្ឋភាពបែបនោះ ពលរដ្ឋខ្លះបានលើកឡើងថា បើជាកូនអ្នកវិញប្រហែលនោះជាពេលវេលាដែលពួកគេមើលទូរស័ព្ទដៃបាត់ទៅហើយ ។ អ្នកខ្លះទៀតបានត្រឹមឃើញរូបបុរសនេះ និងក្មេងស្រីតូច ដែលគេបានចែកចាយតាមបណ្តាញសង្គម ក៏រំជួលចិត្តដែរ ។
រូបភាពដ៏សែនមានន័យប៉ុន្មានសន្លឹកត្រូវបានចែកចាយពាសពេញបណ្តាញសង្គម កាលពីថ្មីៗកន្លងទៅនេះ ។ ជាមួយ និងម៉ូតូចាស់មួយគ្រឿង ដែលមានសណ្តោងរ៉ឺម៉ក់ មានផ្ទុកដោយសម្លៀកបំពាក់ខ្លះ សំបកកំប៉ុង និងមានព្យួរថង់លក់ផ្លែត្របែកជាច្រើនសម្រាប់ចល័តលក់នៅតាមស្តុបសាធារណៈ ក្នុងរាជធានីភ្នំពេញ ។
មើលទៅម៉ូតូកង់បីនេះមិនត្រឹមជាតូបលក់ផ្លែឈើនោះទេ អាចជាកន្លែងស្នាក់អាស្រ័យពីរនាក់ឪកូននេះទៀតផង ។ ក្មេងស្រីតូច បានអង្គុយសរសេរអក្សរនៅលើក្តារឈ្នួនមួយផ្ទាំងយ៉ាងយកចិត្តទុកដាក់ នៅក្បែរបុរសចំណាស់ ដែលទំនងជាឪពុកនៅលើកម្រាលចាស់ក្បែរអគារឯកជនមួយ ជាប់នឹងភ្លើងស្តុបចរាចរណ៍មួយកន្លែង ។
នៅពេលនោះបុរសជាឪពុក គាត់លក់ផ្លែ ត្របែក បណ្តើរងាកមកមើលកូនស្រីបណ្តើរ ។ អ្នកឃើញរូបភាពនេះបានយល់ថា លោកឪពុក បានយល់ដឹងពីតម្លៃនៃវិជ្ជា ដូច្នេះហើយបានជាលោកព្យាយាមឲ្យស្រីតូចរបស់ខ្លួនខិតខំរៀនសូត្រ ពិសេសរក្សាទម្លាប់រៀនសូត្រនេះឯង ។
ជាការពិតណាស់ គ្មានទ្រព្យសម្បត្តិណាគាប់ប្រសើរ និងវិសេសវិសាលជាជាងចំណេះដឹងនោះឡើយ ឪពុកម្តាយស៊ូលំបាក តែស្វះស្វែងរកគ្រប់មធ្យោបាយគ្រប់បែបយ៉ាងឲ្យតែកូនបានរៀនសូត្រ ដោយយល់ថាចំណេះវិជ្ជានេះហើយដែលជាទ្រព្យដែលមានតម្លៃសម្រាប់កូននាពេលអនាគត ។ អ្នកបានឃើញរូបនោះម្នាក់បាននិយាយថា រូបភាពប៉ុន្មានសន្លឹកនោះ បានបញ្ជាក់យ៉ាងច្បាស់ៗ ពីទឹកចិត្តរបស់ឪពុកដែលតែងតែគាំទ្រ លើកចិត្តឲ្យកូនបានរៀនសូត្រ បើទោះបីជាជួបប្រទះនូវបញ្ហាសេដ្ឋកិច្ចគ្រួសារ ត្រូវរកព្រឹកខ្វះល្ងាចក្តី ក៏មិនឲ្យកូនបោះបង់ការសិក្សាដែរ ។
ចំណែកក្មេងស្រីដ៏គួរឲ្យស្រឡាញ់នោះវិញ គឺពិតជាគំរូដ៏ល្អមួយសម្រាប់កុមារដទៃទៀតដែលក្មេងៗមួយចំនួនមានឱកាសទទួលបានការអប់រំរៀនសូត្រពីសាលាហើយ ប៉ុន្តែបែរមិនជាមិនប្រឹងប្រែងក្រេបជញ្ជក់យកចំណេះដឹងទាំងនោះទៅវិញ ។
អ្នកនិយមលេងហ្វេសប៊ុកខ្លះក៏បានចូលទៅបញ្ចេញមតិដោយទឹកចិត្តអាណិត ស្រឡាញ់ និងពោលសរសើរដល់ឪពុកកូននេះថា« មិនច្បាស់ថា គាត់ជាឪពុក រឺជាជីតាទេ ប៉ុន្តែអ្វីដែលចង់ផ្តោតលើនោះគ្រប់ពេលជិះឃើញគាត់ គឺគាត់តែងតែបង្រៀនអូនតូចហ្នឹងរហូត ហើយមើលទៅអូនតូច និងក៏ចូលចិត្តការសរសេរអក្សរដែរ ។
មានក្រមិនសំខាន់ៗលើការអប់រំរបស់អាណាព្យាបាល និងឥទ្ធិពលសង្កមដែលនាងកំពុងរស់នៅ កុមារដូចជា ក្រដាសសមួយផ្ទាំងអញ្ចឹង ហើយក៏ដូចជាMemory Card ផងដែរ គេនឹងកត់ទុកនូវទង្វើសកម្មភាពគ្រប់យ៉ាងដែលយើងប្រព្រឹត្តជារៀងរាល់ថ្ងៃ ហើយគេក៏នឹងត្រាប់តាមយើងដូចគ្នា ហេតុនេះហើយចូលផាត់សេចក្តីល្អលើក្រដាសនោះជៀសវាងសេចក្តីអាក្រក់មកផាត់ជំនួសសេចក្តីល្អវិញ»៕
ចែករំលែកព័តមាននេះ