ខេត្តប៉ៃលិន ៖ វាក្លាយជាទម្លាប់ទៅហើយសម្រាប់កសិផលរបស់ខ្មែរ មិនថាតែដំឡូងមី សណ្ដែក ឬស្រូវនោះទេ នៅពេលដល់រដូវប្រមូលផល តែងជួបបញ្ហារឿងតម្លៃត្រូវបានគេទម្លាក់ដល់កម្រិត ធ្វើឲ្យកសិករជួបទុក្ខវេទនាមិនចេះចប់មិនចេះហើយ ។ នេះគឺដោយសារតែពុំមានគោលនយោបាយច្បាស់លាស់ណាមួយ សម្រាប់ជួយដោះស្រាយដល់ពួកគាត់ ។ ចំណែកពេលនេះ កសិករដែលដាំដំឡូងមីនៅតំបន់ជាប់ព្រំដែនកម្ពុជា-ថៃ កំពុងព្រួយបារម្ភនិងរអ៊ូរទាំគ្រប់គ្នា ដោយសារតែតម្លៃដំឡូងមីរបស់ពួកគាត់ត្រូវបានទម្លាក់ថ្លៃយ៉ាងគំហុក ស្របពេលប្រទេសថៃដែលជាទីផ្សារនាំចេញដំឡូងមីស្រស់របស់ពួកគាត់នោះ នៅឆ្នាំនេះត្រូវបានហាមមិនឱ្យនាំចូលទៅប្រទេសគេ ដោយអនុញ្ញាតនាំចូលតែដំឡូងមីស្ងួត ឬកែច្នៃទៅជាម្សៅមីរួចប៉ុណ្ណោះ ។
បើតាមប្រភពពីឈ្មួញកណ្តាលជាច្រើននាក់រស់នៅក្នុងខេត្តប៉ៃលិន បានឱ្យដឹងថា រាល់ឆ្នាំការទិញដំឡូងមីពីប្រជាពលរដ្ឋទាំងស្រស់ទាំងស្ងួត ទៅលក់នៅប្រទេសថៃ គឺមិនមានការហាមប្រាមអ្វីទេ គ្រាន់តែបង់ប្រាក់ឱ្យថ្លៃក្បាលរថយន្តជាការស្រេច ។ ប៉ុន្តែនៅឆ្នាំនេះ ពិតជាមានការលំបាក ព្រោះខាងថៃ គេហាមដាច់ខាតមិនឱ្យនាំដំឡូងមីស្រស់ទៅប្រទេសរបស់គេទេ ដោយអនុញ្ញាតតែចំណិតដំឡូងមីស្ងួត ហើយត្រូវកំណត់ទម្ងន់ថែមទៀត បើលើសទម្ងន់ត្រូវគេផាកពិន័យ និងដកហូតយករថយន្តតែម្ដង ។ កត្តានេះហើយធ្វើឱ្យតម្លៃដំឡូងមីកាន់តែចុះថោកទៅៗ ។ ម្យ៉ាងវិញទៀត ការទិញដំឡូងមីស្រស់ពីកសិករ ត្រូវទម្លាក់ថ្លៃចុះថោកដែរ ព្រោះថ្លៃឈ្នួលកម្មករកាប់ចិញ្ច្រាំ ថ្លៃហាល ថ្លៃចូលម៉ាស៊ីនឡសំងួត និងថ្លៃដឹកជញ្ជូនផ្សេងៗជាដើម ។
ក្រុមឈ្មួញទាំងនោះ ក៏បានសំណូមពរឱ្យអាជ្ញាធរពាក់ព័ន្ធប្រចាំច្រកទ្វារអន្តរជាតិព្រំ មេត្តាជួយសម្របសម្រួល និងរកដំណោះស្រាយជួយពួកគាត់ឱ្យបាននាំដំឡូងមីស្រស់ចូលទៅលក់ដូរនៅទីផ្សារប្រទេសថៃផងដែរ ព្រោះកម្ពុជានាំចូលទៅប្រទេសថៃ មានតែកសិផលបន្តិចបន្តួចប៉ុណ្ណោះ ដូចជា ពោត សណ្តែក ដំឡូងមី ផ្លែស្វាយ និងកសិផលផ្សេងៗមួយចំនួនទៀតតាមរដូវកាល ។ ចំណែកខាងថៃវិញ បាននាំទំនិញចូលមកកម្ពុជា ដូចជា គ្រឿងដែក ស៊ីម៉ង់ត៍ សម្ភារប្រើប្រាស់កសិកម្មឧស្សាហកម្មគ្រប់ប្រភេទ ជាពិសេស គ្រឿងឧបភោគបរិភោគដឹកចូលរាប់សិបតោនក្នុង១ថ្ងៃៗ តែមិនត្រូវបានភាគីខ្មែរផ្អាក ឬមានវិធានការអ្វីឡើយ ។
ពាក់ព័ន្ធនឹងបញ្ហានេះ លោក សុខ សាវុធ ប្រធានការិយាល័យច្រកទ្វារអន្តរជាតិព្រំ បានឱ្យដឹងថា ការនាំចេញ នាំចូលនៅបើកដំណើរការជាធម្មតា សំខាន់គឺត្រូវមានឯកសារត្រឹមត្រូវទៅតាមផ្លូវច្បាប់ ។ ចំណែកឯការហាមនាំដំឡូងមីស្រស់ចូលទៅលក់ដូរនៅប្រទេសថៃ គឺមិនមាននោះទេ ។
លោក សុខ សាធីម ប្រធានមន្ទីរពាណិជ្ជកម្មខេត្ត បានឱ្យដឹងថា បញ្ហាដំឡូងមីស្រស់ដែលគេហាមនាំចូលទៅលក់ដូរនៅប្រទេសថៃនោះ ព្រោះប្រទេសទាំងពីរធ្លាប់ចុះអនុស្សរណៈយោគយល់រវាងខេត្តជាប់ព្រំដែនទាំងពីរ ដោយហាមមិនឱ្យនាំដំឡូងមីស្រស់ចូលទៅលក់នៅប្រទេសថៃឡើយ ព្រោះចង់ឱ្យកសិករខ្មែរយើងមានការងារធ្វើ ដូចជា ការចិញ្ច្រាំដំឡូងមីហាល ឬកែច្នៃទៅជាម្សៅមីរួចរាល់ ទើបអាចនាំទៅលក់ដូរនៅទីនោះបាន ។
បើយោងតាមសារព័ត៌មានប្រទេសថៃ បានឲ្យដឹងថា ដើម្បីការពារកុំឱ្យតម្លៃដំឡូងមីធ្លាក់ចុះក្នុងពេលរដូវប្រមូលផលនេះ ក្រសួងពាណិជ្ជកម្មថៃ នឹងបង្ខំឱ្យឈ្មួញដំឡូងមីរក្សាស្តុកបន្ថែមទៀត ព្រមទាំងកាត់បន្ថយការនាំចេញ ។
ចាប់ពីដើមឆ្នាំថ្មីនេះរហូតដល់ចុងខែមេសា ឈ្មួញនឹងត្រូវរក្សាស្តុកដំឡូងមីខណៈពួកគេនាំចេញដំឡូងមី១០០តោន គឺត្រូវរក្សាក្នុងស្តុក១៥០តោន ។
លោក Duangporn Rodphaya អគ្គនាយកនៃនាយកដ្ឋានពាណិជ្ជកម្មបរទេសរបស់ក្រសួងពាណិជ្ជកម្ម ថ្លែងថា ៖ « វិធានការនេះនឹងជួយឲ្យការផ្គត់ផ្គង់ និងតម្រូវការដំឡូងមីក្នុងអំឡុងរដូវប្រមូលផលមានតុល្យភាព ហើយរក្សាតម្លៃមិនឲ្យធ្លាក់ចុះច្រើនពេក » ។
នាយកដ្ឋាននឹងបញ្ជូនភ្នាក់ងារទៅពិនិត្យឃ្លាំង២ដងក្នុងមួយខែដើម្បីធានាថា ឈ្មួញទាំងអស់គោរពតាមបទប្បញ្ញត្តិនេះ ។ លើសពីនេះទៀត អនុស្សរណៈនៃការយោគយល់គ្នាមួយត្រូវបានចុះហត្ថលេខាដោយសហព័ន្ធអ្នកដាំដំឡូងមី និងសមាគមផលិតអេតាណុលថៃ ដើម្បីធានាថា យ៉ាងហោចណាស់ ដំឡូងមី១.២០០តោនត្រូវបានទិញពីកសិករក្នុង១ថ្ងៃ មានតម្លៃ១.៩០បាតក្នុង១គីឡូក្រាម ។
ក្រសួងពាណិជ្ជកម្មថៃ ឲ្យដឹងថា អនុស្សរណៈនេះនឹងមានប្រសិទ្ធភាពចាប់ពីខែមករា ដល់ខែមីនា អំឡុងពេលដែលដំឡូងមីមានចំនួនសរុប១០៨ពាន់តោនសម្រាប់ផ្គត់ផ្គង់ក្នុងការផលិតអេតាណុល ។ ក្រសួងព្យាករថា នៅឆ្នាំក្រោយដំឡូងមីសរុបចំនួន៣១លានតោន នឹងត្រូវដាំដុះប្រមាណ១៧លានតោនក្នុងអំឡុងត្រីមាសទី១ ។
នៅអំឡុងពេល១០ខែដំបូងឆ្នាំនេះ ប្រទេសថៃបាននាំចេញផលិតផលដំឡូងមី៨,៩លានតោន ក្នុងតម្លៃ២,៣៨ប៊ីលានដុល្លារអាមេរិក (៨៥,៧ប៊ីលានបាត) ធ្លាក់ចុះ១០,៤%ពីមួយឆ្នាំទៅមួយឆ្នាំនៃបរិមាណ និង២០,២៩%នៃតម្លៃ ៕
ចែករំលែកព័តមាននេះ