រាជធានីភ្នំពេញ ៖ ក្នុងពិធីបើកសិក្ខាសាលាផ្សព្វផ្សាយ ស្តីពី « វឌ្ឍនភាពនៃការកែទម្រង់គោលនយោបាយ និងរដ្ឋបាលសារពើពន្ធ និងកាតព្វកិច្ចពន្ធលើប្រាក់ចំណេញប្រចាំឆ្នាំ២០១៦» ដែលបានរៀបចំនៅសណ្ឋាគារសូហ្វីតែល ភ្នំពេញភូគីត្រា កាលពីព្រឹកថ្ងៃទី១៦ ធ្នូ កន្លងទៅ មន្ត្រីជាន់ខ្ពស់នៃអគ្គនាយកដ្ឋានពន្ធដារលើកឡើងថា រដូវកាលនៃការប្រកាសបង់ពន្ធលើប្រាក់ចំណេញប្រចាំឆ្នាំ នឹងត្រូវឈានចូលមកដល់នៅថ្ងៃទី១ មករា និងបិទបញ្ចប់នៅថ្ងៃទី៣១ មីនា ២០១៧ ខាងមុខ។ នៅក្នុងសិក្ខាសាលានេះ ក៏មានសហគ្រាសជាង១ពាន់ចូលរួមផងដែរ ។
លោក គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ ថ្លែងថា ៖ « សិក្ខាសាលាដ៏មានសារសំខាន់នេះ នឹងរួមចំណែកខ្ពស់ក្នុងការពង្រឹងការអនុវត្តកាតព្វកិច្ចសារពើពន្ធ ។ តាមរយៈសិក្ខាសាលានេះ សិក្ខាកាមទាំងអស់នឹងទទួលបាននូវចំណេះដឹងថ្មីៗបន្ថែមទៀត ស្តីពីកាតព្វកិច្ចពន្ធលើប្រាក់ចំណេញប្រចាំឆ្នាំ ខណៈរដូវកាលនៃការប្រកាសបង់ពន្ធលើប្រាក់ចំណេញប្រចាំឆ្នាំ នឹងឈានចូលមកដល់នៅថ្ងៃទី១ ខែមករា និងបិទបញ្ចប់នៅថ្ងៃទី៣១ ខែមីនា ឆ្នាំ២០១៧ ខាងមុខ » ។
លោកបន្ដថា លទ្ធផលនៃការកែទម្រង់គោលនយោបាយសារពើពន្ធ និងរដ្ឋបាលសារពើពន្ធរបស់អគ្គនាយកដ្ឋានពន្ធដារក្នុងរយៈពេលប៉ុន្មានឆ្នាំចុងក្រោយនេះ គឺផ្តោតសំខាន់លើការកែលម្អ និងបំពេញបន្ថែមនូវបទប្បញ្ញត្តិ ស្តីពីពន្ធដារដែលនៅមានភាពខ្វះចន្លោះ ។ ការធ្វើទំនើបកម្មរដ្ឋបាលសារពើពន្ធ ការពង្រឹង និងបង្កើនសមត្ថភាពមន្ត្រីពន្ធដារ ធ្វើយ៉ាងណា ឲ្យមន្ត្រីរាជការកាន់តែជំនាញ ស្វាហាប់ ពូកែ ស្មោះត្រង់ មានភាពម្ចាស់ការ ដែលអនុវត្តការងារប្រកបដោយមនសិការវិជ្ជាជីវៈ សំដៅធានាបាននូវផលិតភាព និងប្រសិទ្ធភាពការងារ, ការប្រយុទ្ធប្រឆាំងនឹងអំពើពុករលួយ ដែលជាស្នូលនៃអភិបាលកិច្ចល្អ និងជាគន្លឹះនៃការបង្កើនប្រសិទ្ធភាព និងស័ក្តិសិទ្ធិភាពនៃសេវាសាធារណៈជូនអ្នកជាប់ពន្ធគ្រប់មជ្ឈដ្ឋាន ។
ទន្ទឹមនឹងការកែលម្អ និងពង្រឹងអភិបាលកិច្ចរបស់រដ្ឋបាលសារពើពន្ធ អគ្គនាយកដ្ឋានពន្ធដារក៏បាននិងកំពុងពង្រឹងអនុលោមភាពរបស់អ្នកជាប់ពន្ធផងដែរ សំដៅធ្វើយ៉ាងណា ឲ្យអ្នកជាប់ពន្ធកាន់តែយល់ច្បាស់ និងចូលរួមបំពេញកាតព្វកិច្ចពន្ធដោយស្ម័គ្រចិត្ត ដែលមិនសម្តែងការរអ៊ូរទាំ និងក្នុងន័យទប់ស្កាត់ លុបបំបាត់ការគេចវេះពន្ធ ការលួច
បន្លំពន្ធតាមគ្រប់រូបភាព ដើម្បីធានាបាននូវបរិយាកាសធុរកិច្ច និងការប្រកួតប្រជែងដោយស្មើភាពគ្នាចំពោះគ្រប់ធុរជន ក្នុងគោលដៅប្រមូលចំណូលពន្ធប្រកបដោយតម្លាភាព ប្រសិទ្ធភាព ស័ក្ដិសិទ្ធិភាព និងសមធម៌ ។
កិច្ចខិតខំប្រឹងប្រែងអនុវត្តគោលនយោបាយនៃការកែទម្រង់ គឺបានស្តែងចេញឲ្យឃើញតាមរយៈលទ្ធផលនៃការគ្រប់គ្រងប្រមូលចំណូលពន្ធដែលទទួលបានគ្រប់ និងលើសផែនការក្នុងរយៈពេល៥ឆ្នាំជាប់ៗគ្នាចុងក្រោយ ។ លទ្ធផលទាំងនេះពិតជាមិនអាចកាត់ផ្តាច់បាននូវការចូលរួមពីសំណាក់អ្នកជាប់ពន្ធឡើយ ។ ការផ្តល់កិច្ចសហការខ្ពស់ពីសំណាក់អ្នកជាប់ពន្ធ ការគោរពប្រតិបត្តិយ៉ាងខ្ជាប់ខ្ជួននូវបទប្បញ្ញត្តិស្តីពីពន្ធដារ គឺជាកិច្ចការចម្បងដែលអ្នកជាប់ពន្ធគ្រប់រូបត្រូវប្រកាន់យក ហើយត្រូវបោះបង់ចោលនូវទម្លាប់ចាស់ ដែលកន្លងមកតែងតែស្នើសុំលើកលែងពន្ធ ដោយលើកយកហេតុផលផ្សេងៗ និងប្រែក្លាយការគោរពប្រតិបត្តិច្បាប់មិនទាន់បានខ្ជាប់ខ្ជួន និងមិនទាន់ត្រឹមត្រូវ ឲ្យមកគោរពប្រតិបត្តិច្បាប់ដោយខ្ជាប់ខ្ជួន និងត្រឹមត្រូវ ព្រមទាំងមកដាក់លិខិតប្រកាស និងបង់ពន្ធឲ្យបានទាន់ពេលវេលាផងដែរ ។
លោក គង់ វិបុល ក៏បានផ្តាំផ្ញើដល់សិក្ខាកាមអ្នកជាប់ពន្ធនូវសារសំខាន់ៗមួយចំនួនដូចជា ៖ ពង្រឹងការកាន់កាប់បញ្ជីគណនេយ្យ និងការដាក់របាយការណ៍សវនកម្មហិរញ្ញវត្ថុ, ការតម្រូវមកធ្វើបច្ចុប្បន្នភាពព័ត៌មានសហគ្រាសឲ្យបានគ្រប់ៗសហគ្រាស និងទាន់ពេលវេលា, ការពង្រឹង និងអនុវត្តតាមការណែនាំ, ការប្រើប្រាស់ភា្នក់ងារសេវាកម្មពន្ធដារ, ការពង្រឹង និងបង្កើនកិច្ចសហការជាមួយរដ្ឋបាលសារពើពន្ធ ជាពិសេសកិច្ចការផ្ដល់ឯកសារសម្រាប់ការងារសវនកម្មឲ្យបានត្រឹមត្រូវស្របតាមច្បាប់ ទាន់ពេលវេលា ប្រកបដោយតម្លាភាព និងបន្តផ្តល់កិច្ចសហការខ្ពស់ក្នុងការបង្កើតវប្បធម៌ជជែកពិភាក្សា ផ្តល់យោបល់ ផ្តល់ការរិះគន់ក្នុងន័យស្ថាបនាគ្នាទៅវិញទៅមក ដើម្បីអភិវឌ្ឍន៍សមត្ថភាពទាំងរដ្ឋបាលសារពើពន្ធ ទាំងអ្នកជាប់ពន្ធ ដោយពង្រឹងភាពប្រកួតប្រជែងរបស់យើងទាំងអស់គ្នាក្នុងក្របខ័ណ្ឌនៃសមាហរណកម្មសេដ្ឋកិច្ចអាស៊ានឆ្នាំ២០១៥ ក៏ដូចជាក្នុងក្របខ័ណ្ឌតំបន់ និងពិភពលោក ៕
ចែករំលែកព័តមាននេះ