រាជធានីភ្នំពេញ ៖ ដោយមានការគាំទ្រពីសាលារាជធានីភ្នំពេញ និងបណ្តាក្រុមហ៊ុនដៃគូផ្សេងទៀត ភីធីជី អ៊ិនធើណេសេនណល បានសហការជាមួយភ្នំពេញស៊ីធីសេនធ័រ គ្រោងរៀបចំព្រឹត្តិការណ៍ បុណ្យដំណាច់ឆ្នាំរាជធានីភ្នំពេញ
រាជធានីភ្នំពេញ ៖ ដោយមានការគាំទ្រពីសាលារាជធានីភ្នំពេញ និងបណ្តាក្រុមហ៊ុនដៃគូផ្សេងទៀត ភីធីជី អ៊ិនធើណេសេនណល បានសហការជាមួយភ្នំពេញស៊ីធីសេនធ័រ គ្រោងរៀបចំព្រឹត្តិការណ៍ បុណ្យដំណាច់ឆ្នាំរាជធានីភ្នំពេញ និងស្វាគមន៍ឆ្នាំថ្មី ២០១៧ ចាប់ពីថ្ងៃទី២៥-៣១ ធ្នូ ស្ថិតនៅភ្នំពេញស៊ីធីសេនធ័រខាងជើងក្តាន់ពីរ ដោយមានចូលរួមពីតារាចម្រៀង សិល្បៈករ សិល្បៈការិនីល្បីៗប្រចាំកម្ពុជា។
លោក អេឡា ម៉ារេន រ៉ាម៉េស អនុប្រធានគម្រោង និងសំណង់របស់ក្រុមហ៊ុនភ្នំពេញស៊ីធីសេនធ័របានឱ្យដឹងក្នុងពិធីសន្និសីទសារព័ត៌មានកាលពីថ្ងៃទី១៦ ធ្នូ នៅភ្នំពេញស៊ីធីសេនធ័រថា «យើងពិតជាមានភាពសប្បាយរីករាយដែលមានឱកាសធ្វើជាដៃគូសហការរៀបចំព្រឹតិ្តការណ៍ដំណាច់ឆ្នាំរាជធានីភ្នំពេញនេះឡើង។ ព្រឹត្តិការណ៍ធំមួយនេះ បានផ្តល់ឱ្យពួកយើងនូវឱកាសបង្ហាញពីវិសាលភាពរបស់យើងក្នុងការផ្សាភ្ជាប់ទំនាកទំនងដោយផ្ទាល់ជាមួយភាគីវិនិយោគទុនបច្ចុប្បន្ន និងអនាគតក្នុងភាពប្រាកដជាក់ស្តែង ដែលអាចធ្វើឱ្យពួកគេអាចមានបទពិសោធន៍ជាមួយផាសុខភាពនៃទីក្រុងទំនើប ដែលភ្នំពេញស៊ីធីសេនធ័រ (PPCC) នឹងបង្កើតឡើងនាពេលខាងមុខនេះ»។
តំណាងក្រុមហ៊ុន ភីធីជី បានលើកឡើងថា គោលបំណងក្នុងកិច្ចសហការបង្កើតនូវព្រឹត្តិកាណ៍នេះឡើង៖
១-ចង់ឱ្យភ្ញៀវទេសចរណ៍ក្នុងតំបន់មានភាពសប្បាយរីករាយតាមរយៈការចូលរួមព្រឹត្តិការណ៍ផ្សេងៗ ដែលរៀបចំឡើងតាមបណ្តាក្រុមហ៊ុននានា ឬតាមកន្លែងកម្សាន្តក្នុងតំបន់ ដែលធ្វើឱ្យភ្ញៀវទេសចរណ៍ក្នុងស្រុកគ្រប់វ័យមិនចាំបាច់រៀបចំដំណើរកម្សាន្តទៅក្រៅប្រទេស។
២ -ឱកាសពាណិជ្ជកម្មគ្រប់វិស័យតាមរយៈការទំនាក់ទំនងកើតចេញពីការជួបជុំ ការប្រាស្រ័យទាក់ទងគ្នា ការកម្សាន្តសប្បាយជាមួយគ្នា ឈានទៅដល់ការចែករំលែកបទពិសោធន៍ជំនាញ និងបច្ចេកទេសក្នុងកិច្ចការធុរកិច្ចផ្សេងៗ។
៣- ការបង្កើតឱ្យមានការកម្សាន្តសម្រាប់ប្រជាពលរដ្ឋកម្ពុជា តាមរយៈព្រឹត្តិការណ៍ធំ គឺកម្មវិធី ដំណាច់ឆ្នាំរាជធានីភ្នំពេញដែលមានទីតាំងនៅក្នុងតំបន់ភ្នំពេញស៊ីធីសេនធ័រ។
៤- ការសម្លឹងឃើញគម្រោងអភិវឌ្ឍន៍ ក្នុងចក្ខុវិស័យច្បាស់លាស់ និងរឹងមាំទាំងក្នុងពេលបច្ចុប្បន្ន និងនាពេលអនាគត ដែលអាចជួយជំរុញដំណើរនៃវិស័យពាណិជ្ជកម្មតាមរយៈការវិនិយោគទុនជាមួយដៃគូពាណិជ្ជកម្មជាតិនិងអន្តរជាតិ។
សម្រាប់ព្រឹត្តិការណ៍នេះ ក្រុមហ៊ុនសង្ឃឹមថា នឹងអាចទាក់ទាញភ្ញៀវជាតិ និងអន្តរជាតិបានប្រមាណ១០ម៉ឺននាក់មកចូលរួមកម្សាន្ត និងបង្កើតមិត្តភាពថ្មី និងអនុស្សាវរីយ៍ជាច្រើនជាមួយគ្នា។ លើសពីនេះព្រឹត្តិការណ៍នេះ ក៏បានបង្ហាញពីសក្តានុពលសេដ្ឋកិច្ច និងគំរោងអចលនទ្រព្យធំៗដែលកំពុងអភិវឌ្ឍនៅចំកណ្តាលរាជធានីភ្នំពេញស៊ីធីសេនធ័រ៕
ចែករំលែកព័តមាននេះ