រាជធានីភ្នំពេញ៖ បេក្ខនារីគួក ស្រីណូ បានជ្រុះចេញពីការប្រកួតជាលើកទី២ហើយក្នុងកម្មវិធី «Cambodia Idol» បន្ទាប់ពីបេក្ខនារីរូបនេះបានទទួលសំឡេងឆ្នោតតិចជាងគេពីទស្សនិកជនកាលពីសប្តាហ៍ទី៣ តែត្រូវគណៈកម្មការទាំង៤នាក់ផ្តល់ឱកាសរហូតដល់វគ្គ Live Show សប្តាហ៍ទី៦ ។
បេក្ខនារីគួក ស្រីណូ បានជ្រុះចេញពីកម្មវិធីជាលើកទី២កាលពីរាត្រីថ្ងៃទី៥ ខែធ្នូ ២០១៦ សប្តាហ៍ទី៦ បន្ទាប់ពីបេក្ខនារីរូបនេះច្រៀងបទ «ថ្ងៃណាបំភ្លេចបងបាន» ដែលជាសំនៀងដើមរបស់លោកហួរ ឡាវី ។
គួក ស្រីណូ បានទទួលសារគាំទ្រតិចជាងគេ ក្នុងចំណោមបេក្ខជន បេក្ខនារី៦នាក់ផ្សេងទៀត ក្នុងនោះបេក្ខជន២នាក់ដែលឈរលំដាប់បន្ទាប់ពីបេក្ខនារីរូបនេះមាននាង ប្រាក់សុគន្ធ និងរស់ ព្រួយ ។
ទោះបីជាធ្លាក់ចេញពីការប្រកួតនេះក្តី គួក ស្រីណូ ហាក់មិនបង្ហាញការខកចិត្តទេ តែបង្ហាញក្តីរីករាយដែលអាចមានឱកាសឈានមកដល់វគ្គនេះ ។ គួក ស្រី ណូ ថ្លែងអំណរគុណដល់គណៈកម្មការទាំង៤នាក់ដែលបានទទួលយកនាងឲ្យមានឱកាសមកដល់វគ្គនេះ និងថ្លែងអំណរគុណដល់ទស្សនិកជនទាំងអស់ដែលបានផ្ញើសារគាំទ្ររូបនេះជាបន្តបន្ទាប់ ។ ស្រីណូតាំងចិត្តនឹងមិនអស់សង្ឃឹមទេ ដោយនាងនឹងខិតខំបន្តទៀត បើទោះបីជានាងបានចាកចេញពីកម្មវិធីក៏ដោយ ។
តាមរយៈកម្មវិធីមួយនេះគួក ស្រីណូ ថានាងបានទទួលបទពិសោធន៍ច្រើនដែលអាចធ្វើឲ្យនាងវិវឌ្ឍខ្លួនយ៉ាងល្អ ហើយនាងជូនពរដល់បេក្ខជន បេក្ខនារីដែលនៅសល់ឲ្យខិតខំបន្ថែមទៀត ។
គណៈកម្មការកញ្ញា ឱក សុគន្ធកញ្ញា និយាយថា «ពួកយើងពិតជាគ្មានឱកាសជួយដល់គួក ស្រីណូ ជាលើកទី២ឱ្យដល់សប្តាហ៍ក្រោយមែន ប៉ុន្តែពួកយើងនៅតែស្រឡាញ់ និងពេញចិត្តសមត្ថភាពស្រីណូ ។ រាល់ការខិតខំរបស់ប្អូនបានបង្ហាញឲ្យឃើញពីបេក្ខនារីម្នាក់ពិតជាមិនចុះចាញ់ ហើយបានដុសខាត់សមត្ថភាពរបស់ខ្លួន នៅក្នុងកម្មវិធី Cambodia Idol រដូវកាលទី២នេះ ផ្តល់បទពិសោធន៍ដល់បេក្ខជនគ្រប់រូប ក៏ដូចជាអ្នកដែលស្រឡាញ់វិស័យសិល្បៈ ជាពិសេសផ្នែកចម្រៀង ដើម្បីក្រោកឈរឡើងខំប្រឹង ព្រោះគ្មានជ័យជម្នះណាមួយដែលមិនបានឆ្លងកាត់ការលំបាកនោះទេ ដូច្នេះរាល់បទពិសោធន៍ដែលប្អូនបានទទួលពីកម្មវិធីមួយនេះនឹងធ្វើឲ្យប្អូនទទួលបានជោគជ័យទៅថ្ងៃអនាគត» ។
រហូតមកដល់ពេលនេះកម្មវិធីប្រឡងចម្រៀងលំដាប់ថ្នាក់ពិភពលោក Cambodia Idol បានរកឃើញបេក្ខជន បេក្ខនារីចំនួន៦នាក់ដែលអាចឈានជើងទៅកាន់វគ្គ Live Show សប្តាហ៍ទី៧ ក្នុងនោះមានកញ្ញាម៉ង់ ចាន់កញ្ញា, ឈិន ម៉ានិច, នួន សុធារ័ក្ស, ហ៊ិន លីដា, រស់ ព្រួយ និងនាង ប្រាក់សុគន្ធ ។
បេក្ខជន និងបេក្ខនារី៣នាក់នៅតែស្ថិតក្នុងភាគរយខ្ពស់បំផុតពីការទស្សន៍ទាយរបស់ទស្សនិកជនលើកពានរង្វាន់គឺកញ្ញាម៉ង់ ចាន់កញ្ញា, នួន សុធារ័ក្ស និងហ៊ិន លីដា ៕
ចែករំលែកព័តមាននេះ