រាជធានីភ្នំពេញ ៖ នៅទីបំផុតតារាកំប្លែងនាយ ក្រូច បានសម្រេចបញ្ចប់កុងត្រាការងារនៅក្នុងស្ថានីយទូរទស្សន៍ CTN ហើយ បន្ទាប់តារាកំប្លែងរូបនេះ បានបម្រើការងារនៅទីនេះប្រមាណជាជាង១០ឆ្នាំ។
ការដើរចេញពី នាយ ក្រូច នាពេលនេះ បានធ្វើឡើងបន្តបន្ទាប់គ្នា រួមជាមួយនឹងតារាកំប្លែងនាយ ពាក់ មី ដែលបានសម្រេចបញ្ចប់ការងារនៅ CTN នេះដូចគ្នា ក្រោមហេតុផលមិនពេញចិត្តពីការដឹកនាំអ្នកគ្រប់គ្រងថ្មីជាជនជាតិឥណ្ឌា ដែលមានការរិតត្បិតខ្លាំងពេក។
តាមរយៈវីដេអូខ្លីមួយ ដែលបានបង្ហោះតាមហ្វេសប៊ុកនៅថ្ងៃនេះ នាយ ក្រូច បានលើកឡើងថា «ថ្ងៃជាថ្ងៃដែលខ្ញុំបានចាកចេញពីក្រុមហ៊ុន CBS ហើយ ហើយក៏ជាថ្ងៃដែលខ្ញុំមកបញ្ចប់កុងត្រាជាផ្លូវការនៅទីនេះដែរ»។ លោកថា «ប្រសិនបើខ្ញុំទៅទីណាទៀត ចាំខ្ញុំបងប្អូនទស្សនាវីដេអូក្រោយទៀត ហើយថ្ងៃនេះដែរ ខ្ញុំបានយកកុងត្រា និងស្លាកលេខចេញចូល CTN អោយគេវិញអស់ហើយ»។
លោកបញ្ជាក់ថា «លោកបានចុះហត្ថលេខាផ្តាច់កុងត្រាជាមួយ CBS រួចហើយ ហើយលោកក៏ទទួលបានលិខិតបញ្ជាក់ការងារដែលបានបម្រើការនៅទីនេះប្រមាណជាង១០ឆ្នាំមកនេះ ដើម្បីរកការងារថ្មីធ្វើ»។
យ៉ាងណា បើតាម នាយ ក្រូច ថា បានសម្តែងការអរគុណដល់ CTN ដែលបានជួយឲ្យលោកមានភាពល្បីល្បាញលើវិថីសិល្បៈតាំងពីដើមរហូតដល់សព្វថ្ងៃនេះ ហើយបើមិនមាន CTN លោកក៏មានថ្ងៃនេះដែរ។
ជាការកត់សម្គាល់ កន្លងមក នាយ ពាក់ មី បានធ្វើការប្រកាសជាសាធារណៈថា លោក និងតារាកំប្លែងរួមក្រុមដទៃទៀត និងដើរចេញពី CTN ប្រសិនបើគ្មានដំណោះស្រាយពីថ្នាក់ដឹកនាំ ចំពោះអ្នកដឹកនាំថ្មីជាជនជាតិបរទេស ដែលមានការរឹតត្បិតការងារខ្លាំងពេក។
លោកក៏បានបញ្ជាក់ថា មិនមែនតែក្រុមកំប្លែងរូបលោកនោះទេ ដែលត្រូវដើរចេញ ដោយនៅក្នុងនោះក៏មានពិធីករល្បីៗផ្នែកកីឡាមួយចំនួនក៏បានដើរចេញដូចគ្នា ខណៈពេលដែលលិខិតលាឈប់ពី CTN និងចេញជាផ្លូវការនៅក្នុងពេលឆាប់ៗខាងមុខនេះ។
យ៉ាងណា រហូតមកទល់នាពេលនេះ គេសង្កេតឃើញមានតែ នាយ ពាក់ មី និងនាយ ក្រូច ប៉ុណ្ណោះ ដែលបានប្រកាសដើរចេញពី CTN ជាសាធារណៈ ក្នុងពេលដែលតារាកំប្លែងរួមក្រុម ក្នុងនោះមានអ្នកដឹកនាំកម្មវិធីកំសាន្តលោក សុវណ្ណ រិទ្ធី ហៅតា វ៉ិច ទ័រ នៅមិនទាន់ឃើញប្រកាសជាផ្លូវការឡើយ។
ក្រោយការចាកចេញពីតារាកំប្ហែងនាយ ពាក់ មី នាពេលនេះ គេឃើញកម្មវិធីមួយចំនួនដែលលោកធ្លាប់កាន់នោះ ត្រូវបានផ្លាស់ប្តូរ ក្នុងនោះកម្មវិធី សំណើចតាមភូមិ ត្រូវបានជំនួសដោយលោក ដួង សុខគា ៕
ចែករំលែកព័តមាននេះ