រាជធានីភ្នំពេញ ៖ សម្រាប់វិនិយោគិនចិន និងកូរ៉េកាន់លិខិតឆ្លងដែនធម្មតាដែលមកវិនិយោគនៅកម្ពុជា ត្រូវបានប្រមុខរាជរដ្ឋាភិបាលសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្រេចផ្ដល់
រាជធានីភ្នំពេញ ៖ សម្រាប់វិនិយោគិនចិន និងកូរ៉េកាន់លិខិតឆ្លងដែនធម្មតាដែលមកវិនិយោគនៅកម្ពុជា ត្រូវបានប្រមុខរាជរដ្ឋាភិបាលសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្រេចផ្ដល់សុពលភាពទិដ្ឋាការមានរយៈពេលរហូតដល់៣ឆ្នាំ ។
សម្ដេចនាយករដ្ឋមន្ត្រីថ្លែងបែបនេះនៅក្នុងឱកាសអញ្ជើញជាអធិបតីបើកវេទិកាធុរកិច្ច និងហិរញ្ញវត្ថុ កម្ពុជា-ចិន ដែលប្រារព្ធធ្វើកាលពីថ្ងៃទី១ ធ្នូ ម្សិលមិញ នៅសណ្ឋាគារ Garden City រាជធានីភ្នំពេញ ។
សម្ដេចថ្លែងថា ៖ « ថ្ងៃនេះ បន្ទាប់ពីមានការស្នើសុំរបស់ក្រសួងទេសចរណ៍ ដោយពិគ្រោះយោបល់ជាមួយក្រសួងមហាផ្ទៃ ក្រសួងការបរទេស និងសហប្រតិបត្តិការអន្តរជាតិ និងក្រសួងសេដ្ឋកិច្ច និងហិរញ្ញវត្ថុ ខ្ញុំបានសម្រេចផ្ដល់ជូនសម្រាប់អ្នកវិនិយោគដែលមកពីចិន និងកូរ៉េ នូវទិដ្ឋាការចេញចូលច្រើនដង និងរយៈពេលវែងសម្រាប់អ្នកកាន់លិខិតឆ្លងដែនធម្មតា រយៈពេល៣ឆ្នាំតែម្ដង ។ អីចឹង ចាប់ពីពេលនេះតទៅ អ្នកវិនិយោគទាំងឡាយរបស់ចិនដែលកាន់លិខិតឆ្លងដែនធម្មតា គឺមិនចាំបាច់ត្រូវការសុំវីសា (ទិដ្ឋាការ) ទៀតទេ ហើយក៏មិនចាំបាច់បង់ថ្លៃទៀតដែរ ក្នុងរយៈពេល៣ឆ្នាំ ដោយគ្រាន់តែបោះត្រាចេញ-ចូលតែប៉ុណ្ណោះ» ។
ការសម្រេចបែបនេះ ដើម្បីផ្ដល់ភាពងាយស្រួលដល់បណ្ដាវិនិយោគិនចិន និងកូរ៉េ ដែលងាយស្រួលចេញ-ចូលមកវិនិយោគនៅកម្ពុជា ក៏ដូចជាទាក់ទាញវិនិយោគិនបរទេសមកបណ្ដាក់ទុនរកស៊ីនៅកម្ពុជាផងដែរ ។
ក្នុងឱកាសនោះ សម្ដេចតេជោ ហ៊ុន សែន ក៏បានថ្លែងអំពីការរីកចម្រើនលើគ្រប់វិស័យនៃប្រទេសកម្ពុជាដែលបានកើតចេញពីកិច្ចខិតខំប្រឹងប្រែងរបស់រាជរដ្ឋាភិបាល និងប្រជាជនកម្ពុជា ហើយក៏មិនអាចកាត់ផ្ដាច់បាននូវជំនួយឧបត្ថម្ភពីបណ្ដាប្រទេសជាមិត្ត ជាពិសេស ប្រទេសចិន តាមរយៈការផ្ដល់ហិរញ្ញប្បទានអភិវឌ្ឍន៍ផ្លូវការ ទាំងហិរញ្ញប្បទានឥតសំណង និងហិរញ្ញប្បទានសម្បទានយ៉ាងច្រើនសន្ធឹកសន្ធាប់ ។
សម្តេចថ្លែងថា ៖ « ដោយសារជំនួយឧបត្ថម្ភគាំទ្រទាំងនេះ ខ្ញុំអាចនិយាយបានថា មិត្តចិនជាអ្នកជួយកសាងផ្លូវវែងជាងគេនៅកម្ពុជា ដែលមានប្រវែងសរុប១.៥០០គីឡូម៉ែត្រ និងស្ពានសាងសង់រួចចំនួន៧ ដែលមានប្រវែងសរុបប្រមាណ៣.១០៤ម៉ែត្រ ។ ជាមួយគ្នានេះដែរ ក្នុងរយៈពេល១៤ឆ្នាំកន្លងទៅនេះ ការផ្គត់ផ្គង់ថាមពលអគ្គិសនីមានការកើនឡើង១១ដង ពី១៨០មេហ្គាវ៉ាត់នៅឆ្នាំ២០០២ ដល់១.៩៨៦មេហ្គាវ៉ាត់នៅឆ្នាំ២០១៥។ កំណើននៃការផ្គត់ផ្គង់ថាមពលអគ្គិសនីទាំងអស់នេះអាចសម្រេចទៅបាន ដោយមានការចូលរួមជាគំហុកផងដែរពីសំណាក់វិនិយោគិនចិននៅក្នុងការវិនិយោគវារីអគ្គិសនី តាមរូបភាពសាងសង់ អាជីវកម្ម និងផ្ទេរ » ។
ជាមួយគ្នានេះ សម្ដេចតេជោនាយករដ្ឋមន្ត្រី ក៏បានបញ្ជាក់ពីគោលដៅចំពោះមុខរបស់ប្រមុខដឹកនាំនៃប្រទេសទាំងពីរកម្ពុជា-ចិន ដោយបានដាក់ចេញនូវផែនការបង្កើនទំហំពាណិជ្ជកម្មសរុបរវាងប្រទេសទាំងពីរឲ្យសម្រេចបានជាទឹកប្រាក់ប្រមាណ៥ពាន់លានដុល្លារអាមេរិកនៅឆ្នាំ២០១៧ ខាងមុខ ។
តាមការបញ្ជាក់របស់ប្រមុខរាជរដ្ឋាភិបាលពាណិជ្ជកម្មសរុបរវាងកម្ពុជា-ចិន ក្នុងឆ្នាំ២០១៥ សម្រេចបានចំនួន៤.៣០០លានដុល្លារអាមេរិក គឺមានការកើនឡើង១៥,១៩% បើធៀបនឹងឆ្នាំ២០១៤ដែលសម្រេចបាន៣.៨០០លានដុល្លារអាមេរិក ។ ក្នុងនោះការនាំចេញរបស់កម្ពុជាទៅកាន់ប្រទេសចិននៅឆ្នាំ២០១៥ មានចំនួន៤០៥លានដុល្លារអាមេរិក ខណៈការនាំចូលរបស់កម្ពុជាពីប្រទេសចិន មានចំនួន៣.៩០០លានដុល្លារអាមេរិក គឺមានការកើនឡើង១៩,៧០% បើធៀបនឹងឆ្នាំ២០១៤ដែលមានចំនួន៣.៣០០លានដុល្លារអាមេរិក ។ នៅក្នុងក្របខ័ណ្ឌនៃវិនិយោគផ្ទាល់ពីបរទេស ផ្អែកតាមការកត់ត្រាពីក្រុមប្រឹក្សាអភិវឌ្ឍន៍ជនបទកម្ពុជាក្នុងរយៈពេល៥ឆ្នាំជាប់ៗគ្នា ពីឆ្នាំ២០១១ដល់ឆ្នាំ២០១៥ ប្រទេសចិនគឺជាប្រភពទុនវិនិយោគធំជាងគេនៅកម្ពុជាក្នុងបរិមាណសរុប៤.៩០០លានដុល្លារអាមេរិក ក្នុងនោះការវិនិយោគរបស់ចិននៅក្នុងតំបន់សេដ្ឋកិច្ចពិសេសមានចំនួនប្រមាណ៥៦០លានដុល្លារអាមេរិក ។ ដោយឡែក ត្រឹមខែតុលា ឆ្នាំ២០១៦នេះ គម្រោងវិនិយោគចិនដែលបានកត់ត្រាក្នុងក្រុមប្រឹក្សាអភិវឌ្ឍន៍កម្ពុជាមានចំនួន៨៤គម្រោង ដែលមានទុនវិនិយោគសរុបចំនួនប្រមាណ៧១៦លានដុល្លារអាមេរិក ស្មើនឹង២៤,៦៩%នៃទុនវិនិយោគសរុប ៕
ចែករំលែកព័តមាននេះ