រាជធានីភ្នំពេញ ៖ ស្ថាប័នហិរញ្ញវត្ថុនានាបានបង្កើនការប្រុងប្រយ័ត្ន និងផ្តល់ឥណទានរបស់ខ្លួនកាន់តែមានភាពទទួលខុសត្រូវខ្ពស់ជាងមុន ស្របពេលកំណើនឥណទានកើនឡើងខ្ពស់ធៀបនឹងផលទុនជាតិសរុប ។
លោកឧកញ៉ា ហួត អេងតុង ប្រធានសមាគមមីក្រូហិរញ្ញវត្ថុកម្ពុជា បានថ្លែងឲ្យដឹងតាមទូរស័ព្ទនៅព្រឹកថ្ងៃទី២៤ វិច្ឆិកាថា ស្ថាប័នមីក្រូហិរញ្ញវត្ថុនានាមិនបានរឹតបន្តឹងក្នុងការផ្តល់ឥណទាននោះទេ ។ ប៉ុន្តែយើងបានផ្តល់ឥណទានប្រកបដោយការទទួលខុសត្រូវខ្ពស់ជាងមុន ដើម្បីសុខភាពរួមនៃវិស័យទាំងមូល ព្រោះយើងមិនចង់ឲ្យមានហានិភ័យក្នុងវិស័យនេះ ។ បច្ចុប្បន្ន ស្ថាប័នមីក្រូហិរញ្ញវត្ថុនានាបានផ្តល់ឥណទានតែលើអតិថិជនណាដែលមានមុខរបរ និងជំនួញច្បាស់លាស់ ។
លោកបន្តថា ៖ « ចំនួនទឹកប្រាក់ផ្តល់កម្ចី ឬទំហំឥណទានផ្តល់ជូនប្រជាពលរដ្ឋ មិនថមថយនោះទេ ប្រសិនជាពិនិត្យលើទំហំសាច់ប្រាក់ ប៉ុន្តែបើមើលជាភាគរយ គឺតូចជាងមុន។ នៅពេលការផ្តល់ឥណទានកាន់តែមានការទទួលខុសត្រូវ ធ្វើឲ្យសុខភាពឥណទានកាន់តែល្អប្រសើរ ការប្រកួតប្រជែងកាន់តែមានតម្លាភាព និងធ្វើឲ្យវិស័យនេះមានការអភិវឌ្ឍប្រកបដោយនិរន្តរភាព » ។
សមាគមមីក្រូហិរញ្ញវត្ថុកម្ពុជា បច្ចុប្បន្នមានគ្រឹះស្ថានមីក្រូហិរញ្ញវត្ថុជាសមាជិកសរុបចំនួន៥៨ ។
លោក អិុន ចាន់នី អគ្គនាយកប្រតិបត្តិធនាគារអេស៊ីលីដា បានថ្លែងថា តាមពិត គ្រឹះស្ថានហិរញ្ញវត្ថុនីមួយៗ រាប់ទាំងមីក្រូហិរញ្ញវត្ថុ និងធនាគារ គឺពួកគេបានប្រុងប្រយ័ត្នក្នុងការផ្តល់ឥណទានរួចទៅហើយ ព្រោះប្រសិនជាមានឥណទានខូច ឬសងត្រឡប់មិនទាន់ពេលវេលាច្រើន នឹងធ្វើឲ្យពួកគេខាតបង់ និងខូចឈ្មោះដល់ស្ថាប័នរបស់ខ្លួន ។ ស្ថាប័នទាំងនេះប្រុងប្រយ័ត្នខ្លួនឯង ព្រោះវាពាក់ព័ន្ធនឹងសុខុមាលភាពរបស់ស្ថាប័ន និងដៃគូរបស់ខ្លួន ។ លោកបន្តថា ៖ « ប្រសិនជាឥណទានខូចច្រើន វានឹងខូចឈ្មោះដល់ប្រទេសរបស់យើង ហើយការរឹតបន្តឹងឥណទាន គឺអាស្រ័យលើគ្រឹះស្ថានហិរញ្ញវត្ថុនីមួយៗ ព្រោះបើមិនប្រុងប្រយ័ត្ន មានន័យថា ជាការផ្តល់ឥណទានខុស » ។
លោក អិុន ចាន់នី បន្ថែមថា ឥណទានមានពីរប្រភេទ គឺឥណទានសម្រាប់អាជីវកម្ម ជាប្រភេទឥណទានដើម្បីបង្កើនប្រាក់ចំណូល និងមានសុវត្ថិភាពសម្រាប់ការរីកចម្រើនដល់អ្នកទទួលបានឥណទានផង និងអាចសងមកធនាគារ ឬមីក្រូហិរញ្ញវត្ថុនានាផង ។ ចំណែកឥណទានប្រើប្រាស់ ជាប្រភេទឥណទានយកមកទិញរបស់ប្រណីតដូចជា រថយន្ត ទូរស័ព្ទដៃ និងទូរទស្សន៍ជាដើម ។ ឥណទានប្រភេទនេះ ជាប្រភេទឥណទានគ្រោះថ្នាក់ និងមានហានិភ័យខ្ពស់ ប៉ុន្តែវាមានទំហំតូចនៅឡើយ គឺមានប្រមាណ៥%នៃឥណទានសរុប ដូច្នេះ វាមិនមានសញ្ញាគ្រោះថ្នាក់នៅឡើយទេ ។
លោក ឆារស៍ វ៉ាន់ ប្រធានស្តីទីសមាគមធនាគារកម្ពុជា បានថ្លែងថា ការផ្តល់ឥណទានបច្ចុប្បន្នមិនមែនជាការរឹតបន្តឹងនោះទេ ផ្ទុយទៅវិញ ការផ្តល់ឥណទានបច្ចុប្បន្នមានការប្រុងប្រយ័ត្នជាងមុនប៉ុណ្ណោះ ។
សេដ្ឋវិទូជាន់ខ្ពស់កម្ពុជា លោកបណ្ឌិត ម៉ី កល្យាណ បានថ្លែងដែរថា ឥណទានប្រៀបដូចជាខ្លាញ់នៅក្នុងខ្លួនមនុស្ស រាងកាយមនុស្សត្រូវការខ្លាញ់ដើម្បីដំណើរការ ប៉ុន្តែក៏មិនត្រូវការខ្លាញ់ច្រើនពេកនោះដែរ ។ ហេតុនេះទាមទារឲ្យមានការថ្លឹងថ្លែងក្នុងការផ្តល់ឥណទានកុំឲ្យកើនឡើងខ្ពស់ពេក តែក៏កុំឲ្យមានការរឹតបន្តឹងខ្លាំងពេក ព្រោះការរឹតបន្តឹងឥណទានខ្លាំងពេក មិនមានលំហូរសាច់ប្រាក់ដល់សេដ្ឋកិច្ចជាតិ ក៏ធ្វើឲ្យសេដ្ឋកិច្ចមិនដំណើរការបានល្អដែរ ៕
ចែករំលែកព័តមាននេះ