ស្ត្រីចំណាស់ម្នាក់ប៊ិះក្លាយជាចំណីបិសាចតណ្ហា
រាជធានីភ្នំពេញ ៖ ស្ត្រីចំណាស់ម្នាក់ខណៈកំពុងហាលខោអាវ ស្រាប់តែបុរសម្នាក់ដើរមកសួររកបងប្អូន គាត់មិនទាន់ទាំងបានឆ្លើយផង ស្រាប់តែបុរសរូបនោះ …
រាជធានីភ្នំពេញ ៖ ស្ត្រីចំណាស់ម្នាក់ខណៈកំពុងហាលខោអាវ ស្រាប់តែបុរសម្នាក់ដើរមកសួររកបងប្អូន គាត់មិនទាន់ទាំងបានឆ្លើយផង ស្រាប់តែបុរសរូបនោះចាប់អូសដៃរុញចូលបន្ទប់រួចចាប់ផ្ដួលធ្វើសកម្មភាពរំលោភ ប៉ុន្តែត្រូវបានគាត់រើបម្រះ និងស្រែកហៅឲ្យគេជួយ ធ្វើឲ្យបុរសនោះខឹងយ៉ាងខ្លាំងក៏បានចាប់វាយ រួចបោកគាត់ទៅនឹងជញ្ជាំង ហើយរត់គេចខ្លួនបាត់ ។ ហេតុការណ៍នេះកើតឡើងកាលពីវេលាម៉ោង៨យប់ថ្ងៃទី២៩ ខែវិច្ឆិកា ឆ្នាំ២០១៦ នៅចំណុចបន្ទប់ផ្ទះជួលជាន់ទី២ ស្ថិតក្នុងភូមិត្រពាំងពោធិ៍ សង្កាត់ចោមចៅ ខណ្ឌពោធិ៍សែនជ័យ ។
ជនសង្ស័យមិនត្រូវបានគេស្គាល់ឈ្មោះនោះឡើយ ចំណែកស្ត្រីចំណាស់រងគ្រោះឈ្មោះ ប៊ូ ច្រឹប អាយុ៤៥ឆ្នាំ មុខរបរកម្មការិនីរោងចក្រកាត់ដេរ ស្នាក់នៅបន្ទប់ជួលលេខ៤០ ជាន់ទី២ នៃផ្ទះជួលកើតហេតុ និងមានស្រុកកំណើតនៅក្នុងភូមិសំរោង ឃុំសំរោង ស្រុកសំរោង ខេត្តតាកែវ ។
ស្ត្រីរងគ្រោះបានឲ្យដឹងថា មុនពេលកើតហេតុគាត់បានប្រមូលសម្លៀកបំពាក់ទៅបោកនៅមុខបន្ទប់ជួល លុះគក់រួចបានយកទៅហាល ដោយដើរកាត់បន្ទប់ជួលនោះ ។ ពេលកំពុងហាល ជនសង្ស័យធ្វើជាដើរទៅសួររកបងប្អូន ហើយពេលនោះគាត់មិនទាន់បានឆ្លើយផង ស្រាប់តែជននោះចាប់អូសដៃរុញគាត់បញ្ចូលក្នុងបន្ទប់ រួចដាក់គន្លឹះទ្វារ ហើយចាប់គាត់ប្រុងរំលោភ ខណៈនោះគាត់បានខំរើបម្រះ និងស្រែក ធ្វើឲ្យជននោះខឹងយ៉ាងខ្លាំងបានវាយធ្វើបាប និងចាប់បោកគាត់ផ្ទប់ជញ្ជាំងបណ្ដាលឲ្យរងបួសប៉ោងភ្នែក និងប៉ោងក្បាលយ៉ាងដំណំ បន្ទាប់មកជនសង្ស័យក៏រត់គេចខ្លួនបាត់ស្រមោលតែម្តង ។
ក្រោយពេលកើតហេតុ ស្ត្រីរងគ្រោះមិនបានទៅប្ដឹងនគរបាលភ្លាមៗទេ រហូតដល់វេលាម៉ោង៤ និង៤៥នាទីល្ងាចថ្ងៃទី៣០ ខែវិច្ឆិកា ឆ្នាំ២០១៦ ទើបគាត់ទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចោមចៅ សុំឲ្យនគរបាលជួយអន្តរាគមន៍ ៕
ចែករំលែកព័តមាននេះ