ក្រោយថ្ងៃមង្គលរបស់កូនប្រុសច្បងបញ្ចប់ទៅដោយក្តីរីករាយ អ្នកនាងគង់ សុជាតិ និងស្វាមីវ័យក្មេង បានសម្តែងការថ្លែងអំណរគុណដល់ភ្ញៀវកិត្តិយសដែលបានចូលរួមក្នុងថ្ងៃរៀបអាពាហ៍ពិពាហ៍កូនរបស់ខ្លួន។ អ្វីដែលពិសេសនោះ
រាជធានីភ្នំពេញ៖ ក្រោយថ្ងៃមង្គលរបស់កូនប្រុសច្បងបញ្ចប់ទៅដោយក្តីរីករាយ អ្នកនាងគង់ សុជាតិ និងស្វាមីវ័យក្មេង បានសម្តែងការថ្លែងអំណរគុណដល់ភ្ញៀវកិត្តិយសដែលបានចូលរួមក្នុងថ្ងៃរៀបអាពាហ៍ពិពាហ៍កូនរបស់ខ្លួន។ អ្វីដែលពិសេសនោះ អាពាហ៍ពិពាហ៍កូនប្រុសរបស់អ្នកនាង គង់ សុជាតិ ជាមួយប្តីមុន គឺពិតជាមិនធម្មតានោះទេ ព្រោះមានវត្តមានរបស់ប្អូនស្រីបង្កើតរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជាចូលរួមផង និងវត្តមានដ៏ខ្ពង់ខ្ពស់របស់លោកជំទាវជាន់ខ្ពស់ អ្នកឧកញ្ញា និងអ្នកសិល្បៈជួរមុខជាច្រើនដួង រួមទាំងវត្តមានពិធីការិនីល្បីឈ្មោះរួមជំនាន់ អ្នកនាង យុគ ចិន្តា។
កូនកម្លោះឈ្មោះ ម៉ៅ សាលភាពបុត្រ គឺជាកូនប្រុសច្បងរបស់អ្នកនាង គង់ សុជាតិ ពិធីការិនីចាស់វស្សា និងល្បីឈ្មោះមួយរូបនៅកម្ពុជា ជាមួយនឹងអតីតស្វាមី និងកូនក្រមុំឈ្មោះ ឈន ពុទ្ធាវីន បានរៀបអាពាហ៍ពិពាហ៍កាលថ្ងៃទី១៨ ខែមិថុនា ឆ្នាំ២០២២។ ក្រឡេកមើលទៅអ្នកនាងគង់ សុជាតិ និងស្វាមីបច្ចុប្បន្ន លោក ជា វិបុល ពិតជាញញឹមបិទមាត់មិនជិតនោះទេ ព្រោះអាពាហ៍ពិពាហ៍របស់កូនមានការចូលរួមយ៉ាងច្រើនកុះករពីថ្នាក់ដឹកនាំ និង ឯកឧត្តម លោកជំទាវ លោកឧកញ្ញា ជាច្រើន។
អ្វីដែលពិសេសនោះ គឺវត្តមានរបស់លោកជំទាវ ហ៊ុន ស៊ីណាត ប្អូនស្រីបង្កើតរបស់សម្តេចតេជោ ហ៊ុន សែន ដែលលោកជំទាវបានចូលរួមជាភ្ញៀវកិត្តិយសផង ជាអ្នកដឹកដៃកូនកំលោះ ខណៈកែ គឹមយ៉ាន ម៉ៅ ម៉ាល័យ ក៏បានចូលរួមដឹកដៃកូនក្រមុំដ៏ស្រស់សោភាផងដែរ។
«ជាថ្មីម្តងទៀតយើងខ្ញុំ និងក្រុមគ្រួសារពិតជាមានមហាកិត្តយសបំផុតដែលបានផ្តល់ការផ្តល់វត្តមានចូលរួម មង្គលជយ័របស់កូនប្រុសស្រីរបស់យើងទាំងពីរសូមគោរដល់គ្រប់ថ្នាក់ដឹកនាំ និង ឯកឧត្តម លោកជំទាវ លោកឧញ្ញា អស់លោក លោកស្រីទាំងអស់ យើងខ្ញុំ និង គ្រួសារពិតជាសូមគោរពថ្លែងអំណរគុណ សម្រាប់ការចំណាយពេលវេលាចូលរួម និង សូមជូនពរជយ័សរិសរីសួស្តីកើតមានដល់អស់លោកអ្នកគ្រប់ៗគ្នា »។ នេះជាសារដែលអ្នកនាងគង់ សុជាតិ បានសរសេរសារលើបណ្តាញសង្គមហ្វេសប៊ុកផ្លូវការរបស់អ្នកនាងកាលពីថ្ងៃម្សិលមិញ។
ងាកទៅលោក ជា វិបុល ពិធីករដ៏ស្រស់សង្ហា ទោះបីជាមិនមែនបីតាបង្កើតរបស់កូនកម្លោះក្តី តែលោកបានបង្ហាញនូវក្តីស្រលាញ់កូនៗរបស់អ្នកនាងគង់ សុជាតិ ជាមួយអតីតស្វាមីជាខ្លាំង ហើយលោកបានបង្ហាញនូវស្នាមញញឹមពេញដោយក្តីសុខ ដែលបានឃើញកូនប្រុសច្បងរៀបអាពាហ៍ពិពាហ៍និងសាងគ្រួសារមួយដ៏កក់ក្តៅ។
មិនខុសពីអ្នកនាងគង់ សុជាតិនោះទេ លោក ជាវិបុល បានបង្ហាញនូវក្តីរីករាយជាមួយនឹងវត្តមានរបស់ថា្នក់ដឹកនាំស្ថាន័យទូរទស្សន៍ហង្សមាស និងលោកជំទាវ លោកឧកញា និងភ្ញៀវកិតិ្តយសទាំងអស់ ជាមួយនឹងសំណេរដែលមានខ្លឹមសារទាំងស្រុងថា «ខ្ញុំបាទ និងភរិយាព្រមទាំងក្រុមគ្រួសារ ពិតជាចិត្តរំភើបរីករាយដ៏ក្រៃលែង និងជាពិសេសពិតជាមហាកិត្តិយសបំផុតសម្រាប់គ្រួសារយើងខ្ញុំ ដោយលោកជំទាវ អ្នកម្តាយហ៊ុន ស៊ីណាត (Sinath Hun) និងលោកជំទាវឧប អ្នកម្តាយ កែ គឹមយ៉ាន ម៉ៅ ម៉ាល័យ បានផ្តល់នូវវត្តមានដ៏ខ្ពង់ខ្ពស់ អញ្ជើញចូលរួមផ្តល់នូវកិត្តិយសដឹកដៃកូនកំលោះ កូនក្រមុំពិធីមង្គលការកូនប្រុសស្រីយើងខ្ញុំ ហើយខ្ញុំបាទនិងក្រុមគ្រួសារ សូមគោពថ្លែងអំណរគុណចំពោះវត្តមានដ៏ឧត្តុងឧត្តមរបស់ ឯកឧត្តមបណ្ឌិត ថោង ខុន វត្តមានលោកជំទាវគឹង ចាន់ឌីគន់គីម លោកជំទាវ យឹម ឆៃលីន ព្រមទាំងវត្តមានឯកឧត្តម អ្នកឧកញ៉ា លោកឧកញ៉ា លោកជំទាវ អស់លោក លោកស្រីភ្ញៀវកិត្តិយសទាំងអស់។ សូមគោរពជូនពរភ្ញៀវកិត្តយសទាំងអស់ មានសុខភាពល្អ សុភមង្គល ជោគជ័យ ព្រមទាំងពុទ្ធពរទាំង៤ប្រការ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ »។
បន្ថែមពីលើនេះ អ្នកនាង គង់ សុជាតិ ក៏បានឱ្យដឹងផងដែរថា អ្នកនាងចង់បានកូនភ្លោះផង ចង់បានចៅពផង។ ពិធីការិនីដែលមានសម្រស់ក្មេងជាងវ័យរូបនេះបានបន្ត «ចង់បានចៅព ប្រសិនបើមានភ្លាមៗពិតជារីករាយណាស់»។ ពិធីការិនីគង់ សុជាតិ បានសម្ដែងក្ដីរីករាយដោយបានចិញ្ចឹមបីបាច់កូន រហូតឆ្លងមកដល់ពិធីរៀបការ។ កូនៗទាំងអស់របស់នាងដើរ តាមគន្លងធម៌ មិនដើរផ្លូវខុស គឺ ម្នាក់ៗខិតខំរៀនសូត្រ ។ ជាក់ស្ដែងកូនប្រុសដែលទើបរៀបការរួចនេះបានរៀនចប់ថ្នាក់អនុបណ្ឌិតនៅប្រទេសថៃ ហើយបានចេញធ្វើការងារ៧ឆ្នាំមកហើយ ។
អ្នកនាងគង់ សុជាតិ និងស្វាមីលោកជា វិបុល បានរៀបចំពិធីរៀបមង្គលការឲ្យកូន ប្រុសឈ្មោះម៉ៅ សាលភាពបុត្រ ជាមួយនាង ឈន ពុទ្ធាវីន នៅថ្ងៃទី១៨ ខែមិថុនា ឆ្នាំ២០២២ នៅរាជធានីភ្នំពេញ។ មង្គលការនេះរៀបចំទៅតាមប្រពៃណីខ្មែរទាំងអស់ ហើយនៅ ពេលព្រឹកមានភ្ញៀវកិត្តិយស ល្បីៗក្នុងសង្គមបានចូលរួមកាត់សក់ដល់កូនប្រុសស្រី ដូចជាលោកឧកញ៉ាលាង ឃុន និងលោកជំទាវ ,លោកឧកញ៉ាអ៊ឹង ឆៃងួន និងលោកជំទាវ ជាអគ្គនាយក ក្រុមហ៊ុនហង្សមាស,លោកជំទាវហ៊ុន ស៊ីណាត ,ឯកឧត្តមជុំ កុសល និងលោក ជំទាវ ,អ្នកនាងយុគ ចិន្ដា ,ឱក សុគន្ធកញ្ញា ,សុគន្ធ នីសា ,អេដា , សុខ សីឡាលីន ,នៅ ស៊ីនឿន និងឃុំ ប៉ុណ្ណាដែត ជាដើម ។ លោកជា វិបុល បានឡើងប្រកាសលើឆាកតំណាងឲ្យក្រុមគ្រួសារទាំងសងខាងថា ភ្ញៀវទាំងអស់ដែលលោកនិងគ្រួសារបានអញ្ជើញគឺមកទាំងអស់ គ្មានអ្នកណាខកខានទេ ។
នៅថ្ងៃរៀបការកូនទី១របស់អ្នកនាងគង់ សុជាតិ នោះ ក៏មានការអញ្ជើញចូលរួមពីអតីតស្វាមីដែរ គឺលោកម៉ៅ សាលភាព ដែលជាឪពុកបង្កើតរបស់កូនកំលោះ ។ អ្នកនាងគង់ សុជាតិ ថាចង់បានចៅពភ្លាមក្រោយកូនប្រុសរូបនេះរៀបការ ។ ចំណែករូបនាងផ្ទាល់កន្លងមកបានបង្ហាញពីបំណងចង់បានកូនភ្លោះថែមទៀតផងដែរ ។ អ្នកនាងគង់ សុជាតិ និងលោកជា វិបុល នៅតែចិញ្ចឹមចិត្តចង់បានកូនប្រុសភ្លោះជាបន្តទៀត បើទោះបីជាវ័យអ្នកទាំងពីរកាន់តែច្រើនក្តី ៕
ចែករំលែកព័តមាននេះ