ជោគជតារាសីឆ្នាំទាំង១២ មាន៨ឆ្នាំ កប់ពពក ខណៈ៤ទៀតធ្លាក់ចុះខ្លាំង
- ភ្នំពេញ
រាជធានីភ្នំពេញ ៖ មកដឹងពីជោគជតារាសីមនុស្សប្រុសស្រីដែលកើតឆ្នាំទាំង១២នេះនៅថ្ងៃនេះមានឆ្នាំ៨ដែលល្អ ល្អមធ្យម និងល្អបង្គួរ ខណៈមាន៤ឆ្នាំទៀតរាសីធ្លាក់ចុះយ៉ាងខ្លាំង ។
ឆ្នាំជូត ៖ រាសីថ្ងៃនេះខ្ពស់ត្រដែត ។ លោកអ្នកនឹងមានលាភដោយការប្រើសំដីវោហារសាស្ត្រទោះជាបាននិយាយស្តីអ្វីក៏ដោយ ក៏មានការគាំទ្រពីអ្នកដទៃជានិច្ច ហើយបើមានបេសកកម្មត្រូវទៅបំពេញការងារនៅទីណានោះ ទោះជិតក្តីឆ្ងាយក្តីក៏នឹងបានជោគជ័យជាទីគាប់ចិត្ត ។ បើជាអ្នកប្រកបមុខរបរជំនួញវិញ មានការរីកលូតលាស់ទៅមុខជាលំដាប់ ។ រីឯបញ្ហាស្នេហា គូស្នេហ៍មានការរីករាយរកគ្នា ។
ឆ្នាំឆ្លូវ ៖ រាសីថ្ងៃនេះធ្លាក់ចុះ ។ លោកអ្នកច្រើនជួបនឹងការរារាំងក្នុងការបំពេញការងារសម្រាប់ថ្ងៃនេះ ទាំងការចេញទៅទាក់ទងនៅក្រៅអង្គភាព ហើយបើមានការធ្វើដំណើរតាមផ្លូវទឹកនោះក៏ត្រូវមានការប្រុងប្រយ័ត្នផងដែរ ។ បើជាអ្នកប្រកបមុខរបររកស៊ីវិញ លោកអ្នកមិនគួរប្រថុយប្រថានដាក់ទុនធំពេកនោះទេ ព្រោះអាចនាំឱ្យមានការខាតបង់ ។ រីឯបញ្ហាស្នេហាគូស្នេហ៍ច្រើនពាក់មុខយក្សដាក់គ្នាខុសទំនង ។
ឆ្នាំខាល ៖ រាសីថ្ងៃនេះមធ្យម ។ រាល់កិច្ចការសព្វបែបយ៉ាង នៅថ្ងៃនេះលោកអ្នកអាចជួបនឹងបញ្ហារកាំចិត្តខ្លះៗដោយសារតែលោកអ្នកមានសុខភាពមិនប្រក្រតី ហើយធ្វេសប្រហែសប៉ុន្តែមិនធ្ងន់ធ្ងររហូតដល់បាត់បង់ផលប្រយោជន៍ទាំងស្រុងនោះទេ ។ បើជាអ្នកប្រកបមុខរបររកស៊ីវិញ រកប្រាក់កំរៃបានមិនគ្រប់គ្រាន់ទេ ហើយលោកក៏មិនគួរបោះទុនអ្វីដែរ ។ រីឯបញ្ហាស្នេហាគឺដូចធម្មតាមិនមានអ្វីប្លែកឡើយ ។
ឆ្នាំថោះ ៖ រាសីថ្ងៃនេះឡើងខ្ពស់ ។ លោកអ្នកត្រូវបានអ្នកធំជឿទុកចិត្ត និងផ្តល់ការសរសើរ ឬតម្លើងឋានៈ ប៉ុន្តែក្នុងនោះក៏មានមនុស្សខ្សត់ទ្រព្យ ឬអ្នកចូលចិត្តប្រើអំណាចរំលោភបំពានខ្លះដែរតែមិនជាបញ្ហាអ្វីនោះទេ ។ បើជាអ្នកប្រកបមុខរបររកស៊ីវិញ ប្រាក់ចំណេញបានមកសមស្របទៅនឹងដើមទុនដែលបានដាក់ចេញ ។ ឯបញ្ហាស្នេហា គូស្នេហ៍ស្រុះស្រួលនិងចេះយល់ចិត្តគ្នាល្អណាស់ ។
ឆ្នាំរោង ៖ រាសីថ្ងៃនេះល្អបង្គួរ ។ រាល់កិច្ចការសព្វសារពើរបស់លោកអ្នកមានការរីកចំរើនទៅមុខ ប៉ុន្តែទោះបីជាយ៉ាងណាក៏ដោយ លោកអ្នកគួរមានការប្រយ័ត្នក្នុងការឯកភាពតាមមតិអ្នកដែលឱ្យយោបល់ ព្រោះប្រសិនបើមានការភ្លាត់ស្នៀតតែបន្តិចអាចនឹងខូចខាតប្រយោជន៍ច្រើន ។ បើជាអ្នកប្រកបមុខរបររកស៊ីវិញ មានការលូតលាស់ទៅមុខដោយអន្លើ។ រីឯបញ្ហាគូស្នេហ៍ច្រើនយល់ចិត្តគ្នាទៅវិញទៅមក ។
ឆ្នាំម្សាញ់ ៖ រាសីថ្ងៃនេះល្អបង្គួរ ។ រាល់ការបំពេញភារកិច្ចនៅថ្ងៃនេះមានសភាពរលូនទៅមុខដូចសព្វដង ប៉ុន្តែក្នុងនោះក៏ទាមទារឱ្យលោកអ្នកមានការប្រយ័ត្នប្រយែងបន្តិចដែរ ដើម្បីឱ្យបានសម្រេចដល់គោលដៅដែលចង់បាន ។ បើជាអ្នកប្រកបមុខរបររកស៊ីវិញ ប្រាក់កំរៃបានមកកាក់កបគ្រាន់បើអាចឱ្យលោកអ្នកសន្សំទុកបានខ្លះ ។ ឯបញ្ហាស្នេហា ការចេះយល់ចិត្តគ្នា គឺជាវិធីដ៏ប្រសើរបំផុត ។
ឆ្នាំមមី ៖ រាសីថ្ងៃនេះធ្លាក់ចុះ ។ លោកអ្នកអាចជួបនឹងគ្រោះភ័យជាយថាហេតុ ប្រសិនបើធ្វេសប្រហែសដោយប្រការណាមួយ ដូច្នេះមិនគប្បីធ្វើដំណើរទៅទីឆ្ងាយដែលមិនចាំបាច់ឡើយ ព្រោះអាចមានសត្រូវប៉ងយាយីធ្វើឱ្យរំខាន ។ បើជាអ្នកប្រកបមុខរបររកស៊ីវិញ ថ្ងៃនេះមិនគួរប្រញាប់ប្រញាល់ចាប់ផ្តើមដាក់ទុននោះទេ។ រីឯបញ្ហាស្នេហាច្រើនតែចាប់កំហុសគ្នាទៅវិញទៅមក សូមមេត្តាអត់ធ្មត់ ។
ឆ្នាំមមែ៖ រាសីថ្ងៃនេះមធ្យម ។ រាល់ការបំពេញការងារផ្សេងៗរបស់លោកអ្នកនៅក្នុងថ្ងៃនេះមិនមានបញ្ហាអ្វីចោទនោះទេ គឺអាចដោះស្រាយបាន ប៉ុន្តែក្នុងនោះសូមប្រយ័ត្នកុំយកអាសាមនុស្សភេទផ្ទុយឱ្យសោះ ព្រោះនាំឱ្យកើតរឿងសៅហ្មងទៅថ្ងៃក្រោយ ។ បើជាអ្នកប្រកបមុខរបររកស៊ីវិញ ផលកំរៃបានមកកាក់កបគ្រាន់បើ និងអាចសន្សំទុកបានមួយចំនួន ។ រីឯបញ្ហាស្នេហាគឺគូស្នេហ៍មានស្ថានភាពដូចធម្មតាទេ ។
ឆ្នាំវក ៖ រាសីថ្ងៃនេះធ្លាក់ចុះ ។ លោកអ្នកអាចជួបនឹងរឿងអាស្រូវ ឬការរំខានដោយសារតែការបំពេញតួនាទីមិនបានគិតគូរឱ្យបានដិតដល់ធ្វើឱ្យសហការីនិយាយដើម ហើយបើជាស្ត្រីភេទវិញនោះមិនគួរដើររហេតរហូតម្នាក់ឯងទេ គួរតែសម្ងំសុខមួយកន្លែងល្អជាង ។ បើជាអ្នកប្រកបមុខរបររកស៊ីវិញ មិនមានការរីកចម្រើនគួរកត់សម្គាល់ឡើយ ។ រីឯបញ្ហាស្នេហានៅក្នុងចិត្តច្រើនតែមានការមួម៉ៅច្រើន ។
ឆ្នាំរកា៖ រាសីថ្ងៃនេះឡើងខ្ពស់ត្រដែត ។ លោកអ្នកនឹងមានអំណាចដ៏លើសលប់ដោយសារព្រេងសំណាង ហើយមានគេជូនវត្ថុមានតម្លៃមិនធ្លាប់មាន ជាមួយនេះនឹងអាចក្លាយទៅជាមនុស្សដែលមានការស្ញប់ស្ញែងពីជនទូទៅ ។ បើជាអ្នកប្រកបមុខរបររកស៊ីវិញ ទោះបីចេញជួញដូរនៅទីណាក្តីមិនថា ជិតឬឆ្ងាយឡើយរមែងបានសមប្រកបទាំងអស់ ។ រីឯបញ្ហាស្នេហា គឺមានតែមានភាពផ្អែមល្ហែមនឹងគ្នា ។
ឆ្នាំច ៖ រាសីថ្ងៃនេះមធ្យម ។ លោកអ្នកអាចនឹងត្រូវមនុស្សចម្លែកសម្បុរខ្មៅមកបញ្ចុះបញ្ចូលចិត្តឱ្យដើរទៅរកផ្លូវមិនល្អ ហេតុនេះបើសិនជាមានមែននោះចូរកុំរវីរវល់ជាមួយឱ្យសោះ ពីព្រោះអាចឱ្យមានក្តីវិនាសដល់ខ្លួនបាន ។ បើជាអ្នកប្រកបមុខរបរជំនួញវិញ ទោះបីជាចេញទៅជួញដូរនៅទីណាក្តីមិនថាទីជិត ឬឆ្ងាយឡើយក៏ទទួលបានផលល្អដែរ ។ រីឯបញ្ហាស្នេហា គូស្នេហ៍អាចនឹងមានការរកាំរកូសនឹងគ្នាក៏សឹងថាបាន ។
ឆ្នាំកុរ ៖ រាសីថ្ងៃនេះធ្លាក់ចុះ ។ លោកអ្នកអាចនឹងត្រូវមនុស្សខ្លះដឹកនាំឱ្យដើរទៅរកផ្លូវអាចមានគ្រោះថ្នាក់ ហេតុនេះបើសិនជាមានមែននោះចូរប្រយ័ត្នប្រយែងជាមុន ព្រោះអាចបណ្តាលឱ្យមានក្តីអន្តរាយដល់ខ្លួនបាន ។ បើជាអ្នកប្រកបមុខរបររកស៊ីវិញ ទោះបីជាចេញទៅជួញដូរនៅទីណាក្តីគួរចៀសវាងការដាក់ទុនថ្មី ឬលង់ខ្លួនតាមអ្នកបបួលចូលហ៊ុនជាមួយ ។ រីឯបញ្ហាស្នេហា គូស្នេហ៍ច្រើនប្រចណ្ឌខុសរឿង ៕
ចែករំលែកព័តមាននេះ