រាជធានីភ្នំពេញ ៖ បើទោះបីជាចំណងស្នេហ៍ឈានដល់ផ្លូវបែកបាក់ប្រមាណជាង១ឆ្នាំក៏ដោយ ប៉ុន្តែតារាសម្តែងលោក ឆឹម សក្កដា បានធ្វើអោយមហាជនមានការភ្ញាក់ផ្អើល បន្ទាប់ពីលោកបានធ្វើរឿងមួយចំពោះតារាចម្រៀងនាង ពេជ្រ សោភា ។
រឿងដែលគួរអោយភ្ញាក់ផ្អើលនោះ គឺលោក ឆឹម សក្កដា បានផ្ញើនំខេក អមជាមួយនឹងពាក្យពេចន៍ជូនពរយ៉ាងចាក់ដោតទៅអោយនាង ពេជ្រ សោភា ក្នុងថ្ងៃខួបកំណើតរបស់នាង នៅថ្ងៃទី៩ ខែមិថុនា ឆ្នាំ២០២២នេះ ។
នៅលើគណនេយ្យហ្វេសប៊ុករបស់លោក ឆឹម សក្កដា កាលពីម្សិលមិញបានបង្ហោះនូវសារជូនពរទៅកាន់ពេជ្រ សោភា បើទោះបីជាសារនោះ លោកមិនបានបញ្ជាក់ឈ្មោះអោយច្បាស់ក៏ដោយ ។ សារនោះបានបង្ហោះឡើងស្របពេលចំថ្ងៃខួបកំណើតរបស់ ពេជ្រ សោភា ដែលបានប្រារព្ធធ្វើឡើងរៀងរាល់ឆ្នាំ ខណៈពេលកាលពីឆ្នាំកន្លងទៅខួបកំណើតនាងក៏មានវត្តមានលោក ឆឹម សក្តដា ផងដែរ ។
ជាការកត់សម្គាល់នៅក្រោយពេលដែលលោក ឆឹម សក្តដា បានបង្ហោះសារជូនពរនៅលើបណ្តាញសង្គមហ្វេសប៊ុកនោះ ប៉ុន្មានក្រោយមក ពេជ្រ សោភា ក៏បានបង្ហោះនំខេកមួយដែលមានសរសេរសារជូនពរដូចទៅនឹងសារលោក ឆឹម សក្តដា បានបង្ហោះនោះដែរ ។
យ៉ាងណាជាមួយរូបភាពនំខេកមួយនេះ ពេជ្រ សោភា ក៏បានភ្ជាប់ជាមួយនឹងសារបង្ហោះថា គ្មានឈ្មោះពាក្យជូនពរដូចធ្លាប់បានឃើញរកនឹកដែរ តែគិតមិនចេញ យ៉ាងណាអរគុណម្ទាស់នំអត់ឈ្មោះ ។
តាមរយៈសកម្មភាពខាងលើនេះ មានន័យថា បើទោះបីជា ឆឹម សក្កដា បានបែកបាក់ស្នេហ៍ជាមួយ និងពេជ្រ សោភា ក៏ដោយប៉ុន្តែក្នុងចិត្តតារាប្រុសរូបនេះហាក់នៅមិនទាន់ភ្លេចនូវស្នាកស្នាមអនុស្សាវរីយស្នេហាចាស់នៅឡើយទេ ។
ជាពិសេសជាងនេះទៅទៀត គឺថ្ងៃខួបកំណើតរបស់ ពេជ្រ សោភា ដែលលោកនៅតែចងចាំ និងបង្ហោះសារជូនពរដូចជាពេលនេះ ។
កន្លងមក ឆឹម សក្កដា ធ្លាប់លើកឡើងថា បើទោះបីជាលោក និងពេជ្រ សោភា បានបែកបាក់ស្នេហាគ្នាក៏ដោយ ប៉ុន្តែលោកក៏នៅរាប់អាននាងជាមិត្តភក្តិធម្មតាដដែល ។ លោកបញ្ជាក់ថា ប្រសិនបើលោកមានស្នេហាថ្មីនោះលោកទំនងជាមិនយកអ្នកសិល្បៈដូចគ្នាឡើយ ស្របពេលដែលពេជ្រ សោភា ក៏បានលេចដំណឹងមានស្នេហាថ្មីផងដែរ ៕
ចែករំលែកព័តមាននេះ