បណ្ឌិត សុខ ទូច សាកល្បងធ្វើស្រាពីផ្លែព្រីង ផ្ទុះការរិះគន់ផង និងការគាំទ្រផង
- ភ្នំពេញ
រាជធានីភ្នំពេញ ៖ ធ្លាប់តែលឺស្រាធ្វើពីផ្លែឈើ ដូចជា ផ្លែទំពាំងបាយជូរជាដើម ពេលនេះ លោកបណ្ឌិត សុខ ទូច សាកល្បងធ្វើស្រាដែលផលិតឡើងពីផ្លែព្រីង…
រាជធានីភ្នំពេញ ៖ ធ្លាប់តែលឺស្រាធ្វើពីផ្លែឈើ ដូចជា ផ្លែទំពាំងបាយជូរជាដើម ពេលនេះ លោកបណ្ឌិត សុខ ទូច សាកល្បងធ្វើស្រាដែលផលិតឡើងពីផ្លែព្រីង ។
តាមរយៈទំព័រហ្វេសប៊ុកផ្លូវការរបស់លោក បណ្ឌិត សុខ ទូច ប្រធានរាជបណ្ឌិតសភាកម្ពុជា កាលពីពេលថ្មីៗនេះ លោកបានបង្ហាញពីរូបភាព និងវីដេអូនៃបច្ចេកទេសផលិតស្រាដែលផ្សំឡើងពីផ្លែព្រីង ដោយលោកបានសរសេររៀបរាប់ថា សាកល្បងធ្វើស្រាពីផ្លែព្រីង កុំនិយាយអំពីទីផ្សារ ត្រូវតែកែច្នៃវា ហើយអាចទុកបានកាន់តែយូរកាន់តែឆ្ងាញ់ កាន់តែថ្លៃ ។ សាកល្បងធ្វើសម្រាប់ខ្លួនឯង និងចែកជូនភ្លក់ ។ សារធាតុផ្សំមានព្រីង៣គីឡូក្រាម ទឹក៦លីត្រ មេដាក់ធ្វើនំបុ័ង១០ក្រាម ស្ករអំពៅ១.៨គីឡូក្រាម ។
តាមរយៈការខមិនឆ្លើយតបជាមួយមហាជន ប្រធានរាជបណ្ឌិតសភាកម្ពុជា លោកបណ្ឌិត សុខ ទូច បានបញ្ជាក់ថា សារធាតុផ្សំមាន ព្រីង៣គីឡូក្រាម ទឹកធម្មតា៦លីត្រ មេធ្វើនំបុ័ង១០ក្រាម (ដំបែរ) ស្ករអំពៅ១.៨គីឡូក្រាម ។ បន្ទាប់មកយកព្រីងមកច្របាច់ អោយបែក ច្របាច់នឹងដៃ ឬយកមកត្រដោសនឹងកញ្ច្រែងក៏បាន ច្របាច់រួចចាក់ទឹកចូល (យកទាំងគ្រាប់ ទាំងសាច់) ។ បន្ទាប់មកចាក់ស្ករចូល កូរអោយសព្វ រួចចាក់មេនំបុ័ងចូលកូរម្តងទៀត អោយរលាយមេអស់ទៅ ចាំដួសដាក់ចូលក្រឡ ឬធុង ។ ដាក់ចូលធុងត្រូវទុកចន្លោះកុំអោយពេញធុងពេក ទុកចន្លោះប្រហែល១ឬ២លីត្រ វាអាចរីកមាឌ ។ ធុងត្រូវមានរន្ធចេញខ្យល់ ដូចក្នុងវីឌីអូ ។ ខ្ញុំច្នៃដោយយកវ៉ាល់កង់ម៉ូតូមកប្រើ ។ ដាក់ដូចក្នុងវីឌីអូ ខ្យល់ចេញពីធុងបាន ប៉ុន្តែខ្យល់ចូលមិនបាន ធ្វើអោយស្រាមិនខូចគុណភាព ឬជូរផ្អូម ។
លោកបញ្ជាក់ទៀតថា ចន្លោះពេល គឺអាស្រ័យនឹងកាបូនឌីអុកស៊ីតឈប់ភាយ បានន័យថា ខ្យល់នៅក្នុងទុយោលែងចេញខ្យល់ធ្វើអោយមានរំពុះទឹក ។ ក្រោយឃើញលែងចេញខ្យល់ចំនួន២ ឬ៣ថ្ងៃហើយ យើងបង្ហូរទឹកដាក់ក្នុងឱទិន ឬក្រឡ ដែលមិនធ្វើពីជ័រ ដើម្បីរក្សាទុក អាចនិយាយថា បន្ទុំទុកបានកាន់តែយូរ ស្រាកាន់តែមានរសជាតិឆ្ងាញ់ ប៉ុន្តែបើរក្សាទុកចាប់ពី៣ខែ អាចពិសាបានហើយ តែបើទុកយូរបានកាន់តែល្អ ។
ពាក់ព័ន្ធនឹងការសាកល្បងធ្វើស្រាដែលផលិតឡើងពីផ្លែព្រីង មហាជនជាច្រើនចូលរួមបញ្ចេញមតិយោបល់ខ្លួន ដោយមានទាំងអ្នកគាំទ្រ និងអ្នកដែលមិនគាំទ្រ ក្នុងរួមមាន ៖ លោកបណ្ឌិតមិនខ្វះប្រធានបទទេ មិនគួរបង្រៀនរឿងធ្វើស្រាទេ យុវជនច្រើនណាស់ តាមដានគំនិតល្អៗជាងនេះពីលោកបណ្ឌិត! ។ អ្នកខ្លះទៀតបាននិយាយថា ប្រយ័ត្នចេញជាស្រាពុល តាមថា មិនគួរញុំាស្រាទេ ថ្លើមសាសន៍អាស៊ី ប្រហែល៤០% ខ្វះអង់ហ្ស៊ីមរំលាយ ឬកំទេចជាតិអាល់កុលពេលផឹកចូលខ្លួន ម្ល៉ោះហើយជាតិអាល់កុលទៅផ្ទុកបំពុលបំផ្លាញកោសិកានៃសរីរាង្គផ្សេងៗក្នុងខ្លួនយើង ជាពិសេសបំផ្លាញថ្លើមហ្នឹងជាចំបង ហើយអាចនាំទៅកើតមហារីកបំពង់ក ពោះវៀន ក្រពះ ។ល។ និង ។ល។
ដោយឡែកផ្សេងទៀតបានបញ្ជាក់ថា ខ្ញុំផ្ញើអត្ថបទស្រួលអានមួយលើរឿងអាស៊ីញុំានេះ មុននិយាយសូមទោសទុកជាមុនចា៎ សូមកុំប្រើដបប្លាស់ស្ទិចឲ្យសោះ សូមប្រើកូនពាង ឬកាទិន ឬដបកែវធំមកប្រើ ផ្លាស់ស្ទិចអាចចេញជាតិពុលនៅពេលដាក់ស្រាចូលពេលទុកយូ អាចមានគ្រោះថ្នាក់ ឬពុល សូមអភ័យទោសផងនាងខ្ញុំនិយាយច្រើន មុនចែកចាយបរិភោគ សូមពិនិត្យលើគុណភាពចំណីអាហារជាមុន ជៀសវាងការពុលស្រាជាយថាហេតុ ។
បើទោះបីជាមានមហាជនជាច្រើនបានចូលរួមបញ្ចេញមតិរិះគន់ទៅលើការសាកល្បងផលិតស្រាដែលផ្សំឡើងពីផ្លែព្រីងរបស់លោកបណ្ឌិត សុខ ទូច ក៏ដោយ ប៉ុន្តែក៏មានមហាជនជាច្រើនផ្សេងទៀតបានចូលរួមអបអរសាទរចំពោះគំនិតច្នៃប្រឌិតរបស់លោកបណ្ឌិត ដែលអាចផលិតស្រាដែលធ្វើពីផ្លែព្រីងផងដែរ ។
មហាជនដែលគាំទ្រលោកបណ្ឌិតបានបញ្ចេញយោបល់ថា លោកបណ្ឌិតតែងតែបំផុសនូវរាល់គំនិតថ្មីៗ ចែកជូនដល់អ្នកដែលស្រលាញ់ និងអ្នកចូលចិត្ត ដើម្បីទុកជាការរៀនសូត្រ នឹងជួយថែរក្សាថែមទៀតផង ។ អ្នកខ្លះទៀតសរសេរថា លោកបណ្ឌិតតែងតែមានការចែករំលែកព័ត៌មាន គំនិតផ្តួចផ្តើម សិក្សាស្រាវ និងអភិវឌ្ឍន៍ ខ្ញុំបានរៀនសូត្រច្រើន សូមអរគុណ ។
ចំពោះសាកលវិទ្យាល័យភូមិន្ទកសិកម្ម (ហៅសាលាកសិកម្មចំការដូង) ក៏បានផលិតចេញជាផលិតផលផ្លូវការហើយ លោកគ្រូបើអាច ចងក្រងសៀវភៅចែកផ្សាយជាផ្លូវការ ជាសាធារណៈទៅលោកគ្រូ ។ ចំពោះនិស្សិត ចំការដូងធ្វើបានយូរហើយ និងមានច្រើនប្រភេទទៀតផង តែគ្មានអ្នកផ្សព្វផ្សាយអោយល្បីនោះទេ ៕
ចែករំលែកព័តមាននេះ