រាជធានីភ្នំពេញ ៖ មិនខុសពីអ្នកសិល្បៈមួយចំនួនទៀតឡើយ តារាចម្រៀង ឌីជេ ឃ្លាំង បានចេញមុខនិយាយរឿងបេក្ខជន ទុំ រដ្ឋា (ឬហៅទុំ សុវត្ថិ) ដែលបានធ្លាក់ជុំដំបូងពីការប្រឡងកម្មវិធី Cambodia Idol ក្រោមសំលេងរិះគន់ពីមហាជន។ ដោយមិននិយាយអ្វីវែងឆ្ងាយ ប៉ុន្តែ ពូ ឃ្លាំង បានបង្ហាញការគាំទ្រ ការសម្រេចរបស់គណៈកម្មការ ដោយលោកយល់ថា ការសម្រេចនេះ គឺកើតចេញពីការច្បាស់លាស់ ខណៈពេលគណៈកម្មការទាំង៤សុទ្ធតែមានបទពិសោធន៍ជាច្រើនឆ្នាំក្នុងអាជីពចម្រៀងមួយនេះ។
យ៉ាងណា ពូឃ្លាំង ក៏បានផ្តល់ឱកាសអោយបេក្ខជន ទុំ រដ្ឋា (ឬហៅទុំ សុវត្ថិ) នៅក្នុងការបញ្ចេញសមត្ថភាពច្រៀងនៅក្នុងផលិតកម្មផ្ទាល់ខ្លួនរបស់លោកផងដែរ។
តារាចម្រៀង ពូឃ្លាំង បានលើកឡើងតាមគណនេយ្យហ្វេសប៊ុកថា «ខ្ញុំទើបតែបានដឹងរឿងរបស់ប្អូនប្រុសម្នាក់ដែលបានចូលរួមកម្មវិធីប្រឡងមួយ ហើយក៏មានចិត្តរំភើបជាមួយការតស៊ូរបស់ប្អូន ទុំ រដ្ឋា នឹងសំលេងដែលស្តាប់ទៅពីរោះម្យ៉ាងរបស់ប្អូន» ។
លោកបញ្ជាក់ថា «តាមពិតខ្ញុំគិតថា ការសំរេចចិត្តរបស់គណៈកម្មការប្រហែលជាគេបានគិតច្បាស់ហើយ នឹងបានឃើញពីចន្លោះខ្វះខាតរបស់ប្អូនត្រង់ណាមួយ ព្រោះប្អូន រាជ រិទ្ធ កញ្ញា នឹង លីន សុទ្ធតែជាអ្នកមានបទពិសោធន៍លើចម្រៀងរាប់ឆ្នាំ និងមានបទពិសោធន៍ធ្វើគណៈកម្មការ កម្មវិធី ប្រឡងពិភពលោកនេះជាច្រើនដងមកហើយ ក៏ដូចជាការរៀបចំរបស់អ្នករៀបចំកម្មវិធី ឬយ៉ាងណា បានគេសំរេចចិត្តបែបនេះ ។ យ៉ាងណា ខ្ញុំសប្បាយចិត្តណាស់ ដែលឃើញ ប្អូនឧកញ៉ា សេរីមន្ត និង ខាន់ ជេម ដែលជាសិល្បកររៀមច្បង មានចិត្តជួយទៅកាន់ប្អូនប្រុសម្នាក់នោះ លើកទឹកចិត្តទៅដល់គ្នា ដែលអាចរាប់ថា ជាមនុស្សដែលមានសមត្ថភាព ដែលតែគ្មានឱកាស»។
លោកថា «សំរាប់ខ្ញុំដូចគ្នា ខ្ញុំមាន Media ផ្ទាល់ខ្លួនរបស់ខ្ញុំមួយឈ្មោះថា ណយណយណា ដែលមានផលិតបទ Original នឹង MV ឬ Short film សូមលើកទឹកចិត្តប្អូនដើរទៅមុខបន្ត កុំបោះបង់ នឹងបាក់ទឹកចិត្ត» ។
លោកបន្ថែមថា «មិនថាប្អូនប្រុស ទុំ រដ្ឋា (ទុំ សុវត្ថិ) ឬបេក្ខជនដែលបានធ្លាក់ទាំងអស់គ្នា ដែលគិតថា ខ្លួនពិតជាមានសមត្ថភាព ឆន្ទៈនៃការខំប្រឹង ពូ ឃ្លាំង សូមស្វាគមន៍មកកាន់គ្រួសារ ណយណយណា ខ្ញុំនឹងរីករាយជួយមនុស្សដែលខំប្រឹងពិតប្រាកដ ។ ខ្ញុំយល់អារម្មណ៍ដែលមានសមត្ថភាព តែគ្មានឱកាស ព្រោះសំរាប់ខ្ញុំក៏អាចរាប់ថា ជាអ្នកស្រលាញ់សិល្បៈម្នាក់ដែល ដែលស្មើនឹងជីវិតទី២របស់ខ្ញុំ បន្ទាប់ពីប្រពន្ធ នឹងកូន ហើយបានឆ្លងកាត់រឿងរ៉ាវជាច្រើន ទំរាំបានរកខ្លូនឯងឃើញ ។ ចុងក្រោយ គ្មានអ្វីក្រៅពីពាក្យថាអរគុណដែលឃើញខ្មែរ ស្រលាញ់ខ្មែរ នឹងចេះជួយគ្នាបែបនេះ អរណាស់»៕
ចែករំលែកព័តមាននេះ