រាជធានីភ្នំពេញ ៖ ដើមលឿងរាជដែលមានទំហំធំៗល្មមចំនួនពីរដើមដែលមន្ទីរសារធារណការ និងដឹកជញ្ជូនរាជធានីភ្នំពេញ ដាំលំអរនៅតាមផ្លូវសារធារណៈនៅខាងមុខផ្ទះលេខ៤ ផ្លូវលេខ២៩៤ ក្នុងសង្កាត់ទន្លេបាសាក់ ខណ្ឌចំការមននោះ ត្រូវបានគេប្រទះឃើញជ្រុះស្លឹក និងងាប់បាត់ទៅហើយ ដោយសារតែគេយកវត្ថុរឹងទៅក្រឡឹងគល់ និងចាក់ទឹកអាស៊ីតសម្លាប់រាប់ខែមកហើយ តែអាជ្ញាធរខណ្ឌចំការមនហាក់បីដូចជាមើលមិនឃើញឡើយ។
លោក ខាត់ ណារិទ្ធ ចៅសង្កាត់ទន្លេបាសាក់ បានប្រាប់កោះសន្តិភាពតាមទូរស័ព្ទថា ពាក់ព័ន្ធទៅនឹងការងាប់ដើមលឿងរាជ ដែលមានទំហំធំៗល្មមទាំងពីររដើមនៅខាងមុខផ្ទះខាងលើនេះដែរ គឺបានធ្វើឡើងដោយអ្នកមកជួលផ្ទះទីនេះ ស៊ីលក់ផ្កាម្នាក់ ដោយបានប្រើប្រាស់វត្ថុរឹងទៅក្រឡឹង និងចាក់ទឹកអាស៊ីតគល់ថែមទៀតផង។ ក្រោយពីបានធ្វើឱ្យដើមលឿងរាជទាំងពីរដើមខាងលើនេះងាប់រួចហើយ អ្នកជួលផ្ទះលក់ផ្កាម្នាក់នោះ ត្រូវបានម្ចាស់ផ្ទះជួលខាងលើធ្វើការបញ្ឈប់ និងដេញចេញទៅបាត់ហើយ ក្រោយពីបានធ្វើឱ្យដើមឈើទាំងពីរដើមនោះងាប់រួចមក។ លោកក៏បានប្រាប់បន្តទៀតថា ផ្ទះលេខ ៤ ផ្លូវលេខ ២៩៤ ខាងលើនេះ ជារបស់លោក ដេវីត ឆាយណាវ៉ា ហើយរូបលោកក៏ធ្លាប់បានហៅយកមកធ្វើការសាកសួរពាក់ព័ន្ធទៅនឹងការធ្វើឱ្យដើមឈើទាំងពីរដើមខាងលើនេះងាប់ដែរ តែត្រូវលោកប្រាប់ថា នឹងយកដើមលឿងរាជដែលមានទំហំធំប៉ុនដើមលឿងរាជទាំងពីរដើមដែលបានងាប់នេះ មកដាំនៅថ្ងៃបន្ទាប់ពីបុណ្យអ៊ុំទូករួច។ អ្នកជួលផ្ទះលក់ផ្កាដែលធ្វើឱ្យដើមឈើទាំងពីរដើមនោះងាប់ ត្រូវបានលោក ដេវីត ឆាយណាវ៉ា បានធ្វើការបញ្ឈប់ និងបណ្តេញចេញទៅបាត់ហើយ ទាំងមិនបានបង់ប្រាក់ថ្លៃផ្ទះជួល និងភ្លើងផងដែរ។
គួរបញ្ជាក់ថា ក្នុងចំណោមដើមលឿងរាជទាំងពីរដើម ដែលជាសម្បត្តិសាធារណៈនោះត្រូវបានគេធ្វើឱ្យងាប់ដោយចេតនានេះ ត្រូវបានគេប្រទះឃើញជ្រុះស្លឹក និងងាប់ជាបន្តបន្ទាប់រាប់ខែមកហើយ តែមិនដែលឃើញមានអាជ្ញាធរមូលដ្ឋានខណ្ឌចំការមនណាម្នាក់ចុះមកមើលឡើយ និងថែមទាំងធ្វើជាមិនដឹងមិនឮទៀតផង។
ពាក់ព័ន្ធទៅនឹងការធ្វើឱ្យងាប់ដើមឈើទាំងពីរដើមខាងលើនេះដែរ តាមរយៈទូរស័ព្ទលោក ព្រុំ សំខាន់ អភិបាលខណ្ឌចំការមន បានប្រាប់ថា លោកមិនបានដឹងទេ អំពីរឿងនេះ ឱ្យធ្វើការសួរទៅលោក ប៊ុន សុភក្តិ អភិបាលរងខណ្ឌវិញ ព្រោះលោកទទួលបន្ទុកផ្នែកនោះ ហើយក៏ព្យាយាមទូរស័ព្ទទៅជាច្រើលើកដែរ តែមិនចូលឡើយ ទំនងជាជាប់រវល់ប្រជុំហើយមើលទៅ?
ចែករំលែកព័តមាននេះ