ខេត្តមណ្ឌលគិរី ៖ បងប្អូនជនជាតិដើមភាគតិចដែលរស់នៅភូមិពូតាំង សង្កាត់រម្យនា ក្រុងសែនមនោរម្យ កំពុងមានការភ្ញាក់ផ្អើលយ៉ាងខ្លាំង ព្រោះតែមានពាក្យល្បីតពីមាត់មួយទៅមួយថា «មានអង្ករប្លាស្ទិក» កំពុងចរាចរក្នុងមូលដ្ឋានពួកគាត់ ដែលហេតុការណ៍នេះកើតឡើងកាលពីថ្ងៃទី២៥ ខែតុលា រហូតដល់ល្ងាចថ្ងៃទី២៦ ខែតុលា ឆ្នាំ២០១៦ ប្រជាពលរដ្ឋរួមនិងអាជ្ញាធរភូមិបានជួបជុំគ្នាធ្វើការពិសោធន៍ដើម្បីចង់ដឹងការពិតថា មានអង្ករជ័រ មែនឬអត់?
ប្រភពឱ្យដឹងថា ការភ្ញាក់ផ្អើលនេះ ក្រោយពីមានគ្រួសារបងប្អូនជនជាតិដើមភាគតិចមួយគ្រួសារបានទិញអង្ករចំនួន៣បាវ ស្មើនឹង១៥០គីឡូក្រាម ក្រោយមកគាត់បានយកអង្ករនោះទៅលីងដើម្បីធ្វើសម្លកកូរ ស្រាប់តែអង្ករនោះផ្ទុះ ។ ហើយគាត់បានយកអង្ករលីងនោះចាក់ទៅលើភ្លើងចង្ក្រានស្រាប់អង្ករបានរលាយចូលគ្នា ។
ប្រភពបន្តថា បន្ទាប់មកពួកគាត់បានទៅរាយការណ៍ជូនដល់អាជ្ញាធរមូលដ្ឋានពាក់ព័ន្ធទៅនឹងអង្ករដែលគាត់បានទិញខាងលើថាជាអង្ករប្លាស្ទិក ដែលធ្វើឱ្យប៉ះពាល់ដល់សុខភាពពួកគាត់ ។ ដោយសារតែមានបាតុភាពផ្អើលកាន់តែខ្លាំងទៅៗ នៅល្ងាចថ្ងៃទី២៦ ខែតុលា សមត្ថកិច្ចមូលដ្ឋានបានឲ្យគ្រួសារនោះយកអង្ករមកធ្វើតេស្តដោយលីងនៅមុខប្រជាពលរដ្ឋ ព្រមទាំងអ្នកសារព័ត៌មានផងដែរ តែអង្ករនោះមានលក្ខណៈធម្មតាទេ មិនដូចដែលគ្រួសារនេះបាននិយាយសង្ស័យថា ជាអង្ករប្លាស្ទិកទេ ។
លោកមេភូមិពូតាំងបានប្រាប់ដល់អ្នកភូមិថា សូមកុំឲ្យមានការភ្ញាក់ផ្អើលបន្តទៅទៀត អង្ករនេះក្រោយពីធ្វើការពិសោធន៍ទៅជាអង្ករធម្មតាទេ ដូច្នេះនេះគ្រាន់តែជាការភាន់ច្រឡំតែប៉ុណ្ណោះ ធម្មតាអង្ករយកទៅលីងតែងតែផ្ទុះអីចឹងហើយ ។
យ៉ាងណាក៏ដោយ ករណីខាងលើនេះ លោក ចាន់ វាសនា ប្រធានសាខាកាំកុងត្រូលខេត្ត អ្នកយកព័ត៌មាននៅមិនទាន់ទទួលបានការបំភ្លឺពីលោកនៅឡើយទេ ៕
ចែករំលែកព័តមាននេះ