ភ្នំពេញ៖ មុនពេលអញ្ជើញបន្តចូលរួមកិច្ចប្រជុំកំពូលពិសេសអាស៊ាន-អាមេរិក នៅទីក្រុងវ៉ាស៊ីនតោន នាយប់ថ្ងៃទី១៣ ខែឧសភា ឆ្នាំ២០២២ នេះ ម៉ោងនៅកម្ពុជា ហើយនៅសហរដ្ឋអាមេរិក គឺជាពេលព្រឹកព្រលឹម ថ្ងៃទី១៣ឧសភា សម្តេចតេជោ នាយករដ្ឋមន្ត្រី ហ៊ុន សែន បានចេញសារពិសេសជាសំឡេង ជូនជនរួមជាតិ។
សម្តេចតេជោ ហ៊ុន សែន បានប្រកាសថា រយៈពេល ៧ថ្ងៃហើយ គិតត្រឹមថ្ងៃទី១៣ ខែឧសភា ឆ្នាំ២០២២ នេះ ដែលកម្ពុជាយើង មិនមានករណីឆ្លងកូវីដ១៩ ឡើយ។ ទោះជាមិនមានឆ្លង ៧ថ្ងៃមកហើយ តែសម្តេចតេជោ ហ៊ុន សែន បានប្រកាសបន្តលើកទឹកចិត្តដល់ប្រជាពលរដ្ឋកម្ពុជាយើង សូមបន្តអនុវត្តវិធានការការពារខ្លួន តាមវិធានសុខាភិបាល ហើយសម្តេចតេជោ ក៏បានប្រកាសលើកទឹកចិត្តដល់ប្រជាពលរដ្ឋ ធ្វើការសម្រេចដោយខ្លួនឯង ថាបន្តពាក់ម៉ាស ឬមិនពាក់ម៉ាស ខណៈដែលកាតព្វកិច្ចពាក់ម៉ាស ត្រូវបានដកចេញនៅទីសាធារណៈ ក្នុងប្រទេសកម្ពុជាយើង ក៏ដោយ។
ទន្ទឹមនឹងនេះ សម្តេចតេជោ ហ៊ុន សែន ក៏បានបន្តប្រកាសអំពាវនាវដល់ប្រជាពលរដ្ឋខ្មែរយើង ដែលមិនទាន់ចាក់វ៉ាក់សាំង និងដល់ពេលត្រូវចាក់វ៉ាក់សាំង មិនថា ដូសទី១ ដូសទី២ ដូសទី៣ និងដូសទី៤ ទេ គឺសូមអញ្ជើញទៅទទួលយកវ៉ាក់សាំង ឱ្យបានឆាប់តាមដែលអាចធ្វើទៅបាន។
សម្តេចតេជោ ហ៊ុន សែន គូសបញ្ជាក់ជាថ្មីថា កម្ពុជាយើង មិនខ្វះថ្នាំវ៉ាក់សាំងបង្ការជំងឺកូវីដ១៩នោះទេ ហើយក្នុងកិច្ចប្រជុំរវាងសម្តេច មេដឹកនាំអាស៊ាន និងប្រធានាធិបតីសហរដ្ឋអាមេរិក នៅមុននេះ ក៏អាមេរិក បន្តសន្យាផ្តល់ថ្នាំវ៉ាក់សាំង ដល់កម្ពុជា ក៏ដូចជាបណ្តាប្រទេសអាស៊ាន ថែមទៀត។ ដូច្នេះសូមបងប្អូនជនរួមជាតិ អញ្ជើញទៅចាក់វ៉ាក់សាំង ដែលជាវ៉ាក់សាំងការពារខ្លួនផង និងជាវ៉ាក់សាំងការពារជាតិយើងផង៕
ចែករំលែកព័តមាននេះ