រាជធានីភ្នំពេញ ៖ បន្ទាប់ពីទទួលបានដៃគូធ្វើអាជីវកម្មបែប Franchise នៅកម្ពុជា ចំនួន៥ក្រុមហ៊ុនកាលពីឆ្នាំកន្លងមក ទីប្រឹក្សាគម្រោងអភិវឌ្ឍន៍ Franchise ឆ្ពោះទៅកាន់បរទេសរបស់អគ្គនាយកដ្ឋានអភិវឌ្ឍន៍ធុរកិច្ចពាណិជ្ជកម្ម
រាជធានីភ្នំពេញ ៖ បន្ទាប់ពីទទួលបានដៃគូធ្វើអាជីវកម្មបែប Franchise នៅកម្ពុជា ចំនួន៥ក្រុមហ៊ុនកាលពីឆ្នាំកន្លងមក ទីប្រឹក្សាគម្រោងអភិវឌ្ឍន៍ Franchise ឆ្ពោះទៅកាន់បរទេសរបស់អគ្គនាយកដ្ឋានអភិវឌ្ឍន៍ធុរកិច្ចពាណិជ្ជកម្មនៃក្រសួងពាណិជ្ជកម្មថៃ គ្រោងនឹងរៀបចំកម្មវិធីចាប់ដៃគូធ្វើអាជីវកម្មបែប Franchise បន្ថែមនៅកម្ពុជានាពេលខាងមុខ ដោយនាំក្រុមហ៊ុនចំនួន៣៣ មកស្វែងរកដៃគូ ។
អ្នកស្រី ណាក់ផាផន សែងធានឆាយ ទីប្រឹក្សាគម្រោងអភិវឌ្ឍន៍ Franchise ឆ្ពោះទៅកាន់បរទេសនៃក្រសួងពាណិជ្ជកម្មថៃ បានមានប្រសាសន៍ក្នុងសន្និសីទកាសែតកាលពីថ្ងៃទី១៩ តុលា នៅភោជនីយដ្ឋានទន្លេបាសាក់២ថា ៖ « ការធ្វើអាជីវកម្មបែប Franchise របស់ថៃ យើងបានសម្លឹងឃើញថា ប្រទេសដែលកំពុងមានការអភិវឌ្ឍដូចជា កម្ពុជា ភូមា និងឡាវ គឺមានឱកាសច្រើនសម្រាប់ធ្វើអាជីវកម្មប្រភេទនេះ ព្រោះការធ្វើពាណិជ្ជកម្មជាមួយគ្នាមានការកើនឡើង ។
កន្លងមក យើងមានអ្នកជំនួញកម្ពុជាច្រើនបានទៅទំនាក់ទំនងជាមួយម្ចាស់ក្រុមហ៊ុន Franchise នៅថៃ ដើម្បីនាំអាជីវកម្មនេះមកកាន់ប្រទេសកម្ពុជា ដោយទាក់ទងដោយផ្ទាល់ និងពាណិជ្ជករកម្ពុជាខ្លះទៀតបានទាក់ទងតាមរយៈតំណាងពាណិជ្ជកម្មថៃប្រចាំស្ថានទូតថៃ » ។
អ្នកស្រីលើកឡើងថា ៖ « ក្រសួងពាណិជ្ជកម្មថៃ មានគោលបំណងអភិវឌ្ឍន៍ការធ្វើពាណិជ្ជកម្មជាមួយប្រទេសជិតខាង ។ ក្រៅពីការធ្វើពាណិជ្ជកម្មនាំចេញ-នាំចូល គឺយើងព្យាយាមបង្កើតពាណិជ្ជកម្មប្រភេទថ្មី ដែលជាការវិនិយោគរួមគ្នាទៅតាមលក្ខណៈម្ចាស់ក្រុមហ៊ុន Franchise មានន័យថា អ្នកជំនួញថៃនាំយកបច្ចេកវិទ្យា គំនិត និងទស្សនៈនៃការធ្វើជំនួញថ្មីៗក្នុងការបង្កើតអាជីវកម្មដល់ពាណិជ្ជករកម្ពុជា ដែលមានការចាប់អារម្មណ៍ធ្វើពាណិជ្ជកម្មរួមគ្នាបែប Franchise នេះ » ។
បើតាមទីប្រឹក្សាគម្រោងអភិវឌ្ឍន៍ Franchise ឆ្ពោះទៅកាន់បរទេសបញ្ជាក់ថា មុននឹងម្ចាស់ក្រុមហ៊ុន Franchise មកកាន់កម្ពុជា គឺគាត់បានសិក្សាពីទីផ្សារ និងច្បាប់ទម្លាប់នៃការឆ្លងកាត់ពាណិជ្ជកម្មលក្ខណៈ Franchise តាមរយៈក្រសួងពាណិជ្ជកម្មថៃ និងសមាគមពាណិជ្ជករថៃនៅកម្ពុជា ព្រោះការធ្វើមុខជំនួញបែបនេះ វាមិនងាយស្រួលដូចការលក់ទំនិញនោះទេ ព្រោះត្រូវការពេលវេលា និងសិក្សាពីប្រព័ន្ធនេះឱ្យបានច្បាស់លាស់ ។
អ្នកស្រីបន្តថា ក្រុមហ៊ុនបែប Franchise របស់ថៃ ដែលគ្រោងមកស្វែងរកការចាប់ដៃគូជាមួយពាណិជ្ជករកម្ពុជានាពេលខាងមុខ គឺក្រុមហ៊ុន Franchise មានលក្ខណៈចម្រុះ ទាំងខ្នាតតូច មធ្យម និងធំ និងពុំមែនមានលក្ខណៈអន្តរជាតិនោះទេ ប៉ុន្តែជាប្រភេទក្រុមហ៊ុនមានឈ្មោះល្បីៗក្នុងប្រទេសថៃសព្វថ្ងៃ ៕
ចែករំលែកព័តមាននេះ