ឥទ្ធិពលកូនក្មួយលោកធំ គេហ៊ានសង់ស្ថានីយប្រេង ក្រោមកំហឹងពលរដ្ឋតវ៉ា
រាជធានីភ្នំពេញ ៖ ស្ថានីយប្រេងឥន្ធនៈមួយកន្លែងកំពុងសាងសង់នៅលើទីតាំងដីឡូត៍មួយស្ថិតនៅផ្លូវលេខ១៤៣កែងផ្លូវលេខ៣១០ ស្ថិតក្នុងសង្កាត់អូឡាំពិក
រាជធានីភ្នំពេញ ៖ ស្ថានីយប្រេងឥន្ធនៈមួយកន្លែងកំពុងសាងសង់នៅលើទីតាំងដីឡូត៍មួយស្ថិតនៅផ្លូវលេខ១៤៣កែងផ្លូវលេខ៣១០ ស្ថិតក្នុងសង្កាត់អូឡាំពិក ខណ្ឌចំការមន
ត្រូវបានអ្នកជិតខាងប្តឹងបែកផ្សែងហាមឃាត់មិនឱ្យមានការសាងសង់ តែពេលនេះស្ថានីយដ៏មានឥទ្ធិពលមួយកន្លែងនេះ ត្រូវគេសាងសង់ជិតរួចរាល់ជាស្ថាពរហើយ ក្រោមកម្ដៅចិត្តកំពុងពុះពោរបំផុតពីប្រជាពលរដ្ឋ ។
ជុំវិញបញ្ហាខាងលើនេះ តាមប្រភពព័ត៌មានពីមន្ត្រីមូលដ្ឋានបានបង្ហើបឱ្យដឹងថា មូលហេតុដែលស្ថានីយប្រេងឥន្ធនៈខាងលើនេះសាងសង់ ឡើងបាន គឺដោយសារកូនក្មួយអ្នកធំរត់ការ ។ ជាមួយគ្នានោះដែរ មន្ត្រីមូលដ្ឋានបានបញ្ជាក់ថា ថ្នាក់មូលដ្ឋានបានចុះហត្ថលេខាលើឯកសារសុំច្បាប់សាងសង់បញ្ជូនទៅរួចរាល់ហើយ ដោយសារមានការឯកភាពពីថ្នាក់លើ ប៉ុន្តែមិនដឹងថា ខាងក្រសួងពាក់ព័ន្ធ ឬក៏មន្ទីរជំនាញ រួមជាមួយសាលារាជធានីភ្នំពេញ កំណត់ច្បាប់ឱ្យសាងសង់កម្រិតណានោះឡើយ ។
ទោះជាយ៉ាងណាក៏ដោយ កន្លងមកគេតែងឮសូរថា អាជ្ញាធរសាលារាជធានីព្រមានដាច់ខាត មិនឱ្យសាងសង់ស្ថានីយប្រេងឥន្ធនៈក្នុងរាជធានីភ្នំពេញតទៅទៀតទេ តែប្រជាពលរដ្ឋឆ្ងល់ថា ហេតុអ្វីបានជាស្ថានីយប្រេងមួយកន្លែងនេះ ដែលទីតាំងមិនមានស្តង់ដារត្រឹមត្រូវតាមបទដ្ឋានបច្ចេកទេស បែរជាត្រូវបានសាងសង់ឡើង ដោយរលូនយ៉ាងដូច្នេះ?
ប្រភពពីមន្ត្រីតូចតាចមួយបានបង្ហើបថា មូលហេតុដែលស្ថានីយនេះបានសាងសង់ឡើង មិនខ្វល់ពីពាក្យបណ្តឹងរបស់អ្នកជិតខាង ដោយសារតែឥទ្ធិពលកូនក្មួយលោកធំ ។ ជុំវិញបញ្ហាចោទប្រកាន់ខាងលើនេះ អ្នកនាំពាក្យសាលារាជធានីភ្នំពេញពុំអាចទំនាក់ទំនងសុំការបំភ្លឺបានទេ ។
បើទោះជាយ៉ាងណាក៏ដោយ ទីតាំងស្ថានីយប្រេងឥន្ធនៈដែលកំពុងបោះជំរំធ្វើអាជីវកម្មជិតរួចរាល់ទៅហើយនោះ មិនមានលក្ខណៈត្រឹមត្រូវតាមស្តង់ដារបច្ចេកទេសទេ ពោលគឺទីតាំងតូចចង្អៀត ដូច្នេះអ្នករស់នៅជុំវិញមានការព្រួយបារម្ភខ្លាំងណាស់ពីសុវត្ថិភាពទៅថ្ងៃមុខ ។ ម្យ៉ាងទៀតស្ថានីយប្រេងដ៏រឹងមាំមួយនេះបានសាងសង់រំលោភយកចំណីផ្លូវអ្នកស្រុកដើរចូលទៅក្រោយអស់ប្រមាណជិតកន្លះម៉ែត្រទៅហើយ រីឯអាជ្ញាធរមូលដ្ឋានបានត្រឹមតែសម្របសម្រួលគឺមិនហ៊ានហាមឃាត់តែម្តង។ ចំណែកម្ចាស់ស្ថានីយខាងលើនេះក៏មិនអាចទំនាក់ទំនងសុំការបំភ្លឺបានដែរ ។
គួរបញ្ជាក់ថា នៅខណ្ឌចំការមនបាតុភាពរឿងសាងសង់ស្ថានីយប្រេងឥន្ធនៈកើតមានស្ទើរគ្រប់សង្កាត់ ពិសេសសង្កាត់ផ្សារដើមថ្កូវ ប៉ុន្តែបណ្តឹងប្រជាពលរដ្ឋត្រូវសាបដូចទឹកទន្លេ ។ ចាំមើលដល់ថ្ងៃបោះឆ្នោតក្រុមប្រឹក្សាសង្កាត់ខាងមុខនេះ លោកចៅសង្កាត់ទាំងអស់នោះធ្វើមុខយ៉ាងម៉េច ហាមាត់និយាយបែបណាដាក់ម្ចាស់ឆ្នោត ។ ចំពោះការលើកឡើងនេះ គឺជាចេតនាមិនចង់ឲ្យពួកគាត់ចាញ់ឆ្នោតតែប៉ុណ្ណោះ សូមកុំយល់ច្រឡំ ៕
ចែករំលែកព័តមាននេះ