តារាសម្តែងលោក យុទ្ធ ឋានះ បានបញ្ចេញសារជាលើកដំបូងរបស់ខ្លួនដោយប្រើពាក្យយ៉ាងចាក់ដោតទៅកាន់ភរិយា គឺអ្នកនាង សូដានីតា បន្ទាប់ពីចំណងស្នេហ៍ជាប្តីប្រពន្ធរបស់ពួកគេត្រូវបានផ្សារភ្ជាប់ឡើងវិញ ក្រោយផ្ទុះរឿងរ៉ាវ
រាជធានីភ្នំពេញ ៖ តារាសម្តែងលោក យុទ្ធ ឋានះ បានបញ្ចេញសារជាលើកដំបូងរបស់ខ្លួនដោយប្រើពាក្យយ៉ាងចាក់ដោតទៅកាន់ភរិយា គឺអ្នកនាង សូដានីតា បន្ទាប់ពីចំណងស្នេហ៍ជាប្តីប្រពន្ធរបស់ពួកគេត្រូវបានផ្សារភ្ជាប់ឡើងវិញ ក្រោយផ្ទុះរឿងរ៉ាវប្រកាសពីបែកបាក់យ៉ាងកក្រើកមហាជន។
«ប្រពន្ធសម្លាញ់ អូនត្រូវតែរឹងមាំ ដើម្បីគ្រួសារតូចមួយនេះរបស់ពួកយើង» នេះជាសារដែលលោក យុទ្ធ ឋានះ បានបង្ហោះលើបណ្តាញសង្គមរបស់លោកដោយលើកទឹកចិត្ត សូដា នីតា ក្រោយពីចំណងអាពាហ៍ពិពាហ៍របស់ពួកគេបានជួបភាពអាប់អួរនាពេលកន្លងមក។
ចាត់ទុកថា នេះជាសារលើកដំបូងដែលលោក យុទ្ធ ឋានះ បានបង្ហោះពាក់ព័ន្ធនឹងគ្រួសារ ក្នុងពេលដែលអំឡុងជួបបញ្ហារកាំរកូសគ្នានោះ តារាប្រុសរូបនេះហាក់មិនបានចេញមុខនិយាយអ្វីច្រើននៅលើបណ្តាញសង្គមរបស់លោកនោះឡើយ។
យ៉ាងណាតាមរយៈសារខាងលើនេះ មានន័យថា លោក យុទ្ធ ឋានះ កាន់តែយល់ចិត្តភរិយាកាន់តែខ្លាំង ក្នុងពេលដែលមួយរយៈចុងក្រោយនេះ សូដា នីតា បានជាប់នូវរឿងរ៉ាវមិនល្អមួយចំនួន និងបានរាលដាលទៅដល់បញ្ហាគ្រួសារ រហូតធ្វើឲ្យនាងហ៊ានប្រកាសចែកផ្លូវជាមួយលោក យុទ្ធ ឋានះ ជាសាធារណៈផងដែរ។
យ៉ាងណាពាក្យចាស់ពោលថា ក្រោយភ្លៀងមេឃក៏ស្រឡះ នៅទីបំផុតចំណងស្នេហាជាប្តីប្រពន្ធរបស់តារាមួយគូនេះ បានឈានដល់ការផ្សះផ្សារជាថ្មីឡើងវិញ ដោយសារអ្នកទាំងពីរយល់ព្រមដកថយមួយជំហ៊ានម្នាក់ ព្រោះនឹកគិតពីអនាគតកូនប្រុសតែមួយរបស់ពួកគេដែលកំពុងនៅតូចនៅឡើយ។
ជាការកត់សម្គាល់ មុនពេលចំណងស្នេហ៍បានផ្សះភ្ជាប់ឡើងវិញនោះ សូដា នីតា បានបង្ហោះសារតាមគណនេយ្យរបស់ខ្លួនថា «ព្រោះតែក្តីស្រលាញ់មិនអាចកាត់ចោលបានចំណង៥ប្រការ ដូចនេះនាងព្រមត្រូវគ្នាជាមួយស្វាមីវិញហើយ ក៏ព្រោះតែកូនតូច ហើយគិតដល់រឿងពេលកូនធំឡើងពិបាក ដូចនេះនាងព្រមលើកលែងដោយមិនគិតច្រើន ដោយព្រមថយម្នាក់១ជំហាន ដើម្បីកូន»។ ហើយសូដា នីតា ក៏បានអរគុណបងៗមិត្តភក្តិដែលបានឆាតជួយប្រាប់ពន្យល់ណែនាំពីបញ្ហាជីវិតគ្រួសារឲ្យនាង។
គួរបញ្ជាក់ថា ក្រោយពីប្រកាសជះកំហឹងដាក់លោក យ៉ែម សំអូន ទាក់ទងនឹងការងារមិនចុះសម្រុងនឹងគ្នានោះរួចមក សូដា នីតា ក៏ធ្លាយរឿងដ៏រសើបមួយទៀតទាក់ទងនឹងជីវិតឯកជនរបស់នាង នោះគឺរឿងលែងលះស្វាមី។ សូដា នីតា បានសរសេរសារបង្ហោះតាមហ្វេសប៊ុកកាលពីថ្ងៃទី២៩ ខែមីនា ឆ្នាំ២០២២ថា ខ្លួនអាចសម្រេចរឿងធំដល់ទៅពីរ នោះគឺ ៖ ១- រឿងលែងលះប្ដី និងទី២- ឈប់ធ្វើការងារជាមួយយ៉ែម សំអូន និងក្រុមការងារ Dara Entertainment ដែលសារនេះ បានធ្វើឲ្យមហាជនសម្តែងការភ្ញាក់ផ្អើលយ៉ាងខ្លាំង។
ទោះជាយ៉ាងណាក៏ដោយ ពាក់ព័ន្ធបញ្ហាខាងលើនេះទាំង សូដា នីតា និងលោក យុទ្ធ ឋានះ មិនបានចេញមុខបកស្រាយណាមួយជុំវិញរឿងរ៉ាវដែលនាំឲ្យឈានដល់ការលែងលះនាពេលនោះឡើយ រហូតមកទល់ពេលដែលពួកគេបានផ្សារភ្ជាប់ចំណងស្នេហ៍ឡើងវិញនាពេលនេះ៕
ចែករំលែកព័តមាននេះ