ខេត្តកំពង់ចាម ៖ អាណាព្យាបាលសិស្សសាលាបឋមសិក្សាកោះថ្មី បានទទួចស្នើសុំដល់ការិយាល័យអប់រំស្រុក ក៏ដូចជាមន្ទីរអប់រំយុវជន និងកីឡាខេត្តកំពង់ចាម មេត្តាផ្តល់នូវគ្រូបង្រៀនទៅតាមតម្រូវការចាំបាច់ក្នុងការអប់រំកូនចៅជំនាន់ក្រោយអោយមានគុណភាពខ្ពស់ ព្រោះបច្ចុប្បន្នសាលាមានតែគ្រូតែ៣នាក់ គិតទាំងនាយិកាផង បានបង្រៀន សិស្សរហូតដល់៦ថ្នាក់រយៈពេលជាច្រើនឆ្នាំមកហើយ ។
ការទទូចស្នើសុំនេះ បន្ទាប់ពីកូនចៅរបស់ពួកគាត់រៀនអត់ចេះ ព្រោះតែការបង្រៀនមិនបានដិតដល់ ហើយថ្ងៃខ្លះ នាយិកាមានធុរៈទៅប្រជុំ ឬគ្រូជាប់រវល់បានអោយសិស្សឈប់សំរាកឬក៏អោយរៀនគួបបញ្ជូលគ្នាក៏មានដែរ។
សាលាបឋមសិក្សាកោះថ្មី ស្ថិតនៅភូមិទី១ ឃុំកោះសូទិន ស្រុកកោះសូទិន ខេត្តកំពង់ចាម ស្ថិតនៅលើដីកោះ ដែលមានទឹកព័ទ្ធជុំវិញនារដូវវស្សា ។
តាមអាណាព្យាបាលសិស្សជាច្រើននាក់បានអោយកោះសន្តិភាពដឹងថា សាលាបឋមសិក្សាកោះថ្មី គ្រូបង្រៀន មិនបានដិតដល់នោះទេ ដោយសារតែសាលាមានគ្រូតែ៣នាក់ គិតទាំងនាយិកាផង បានបង្រៀន៦ថ្នាក់ពីថ្នាក់ទី១រហូតដល់ទី៦ ។ ក្នុងការបង្រៀនបានបែងចែងជា២វេន ព្រឹកនិងល្ងាច ហើយគ្រូ៣នាក់ ម្នាក់ៗបង្រៀន២ថ្នាក់ ។នៅពេលលោកគ្រូអ្នកគ្រូមានធុរៈជាប់រវល់ ឬឈឺសិស្សត្រូវឈប់សម្រាក់ ថ្ងៃខ្លះអោយគ្រូបង្រៀនបញ្ចូលគ្នាក៏មានជាហេតុធ្វើអោយសិស្សច្របូកច្របល់ចាប់មិនបានរៀនមិនចេះ ។
អាណាព្យាបាលសិស្សក៏បានអោយដឹងទៀតថា ដោយសារតែការបង្រៀន មិនបានដិតដល់ ក្មេងរៀនមិនចេះ បានធ្វើអោយអាណាព្យាបាលមួយចំនួន ដែលភាគច្រើនជាជីតា យាយ បានអោយកូនរបស់ខ្លួន មកយកចៅទៅរៀនសាលាផ្សេងវិញ ។ តាមព័ត៌មានអោយដឹងថា គ្រូសាលាបឋមសិក្សាកោះថ្មី ទាំង៣នាក់នោះ ១.ឈ្មោះឆោម សាវ៉ានជានាយិកា,២.អ្នកគ្រូលី ចាន់នៅនិង៣.លោកគ្រូឆេន គឹមឆេង ។ កន្លងមក មានកូនចៅអ្នកភូមិដែលបានរៀនចប់គរុកោសល្យ បានស្នើសុំទៅបង្រៀននៅស្រុកកំណើតតែមិនបានសម្រេច ដោយខ្លះអះអាងថា សាលានោះបិទខ្ទប់ ព្រោះតែចង់ស៊ីប្រាក់ខែឌុប។
លោកស្រី ឆោម សាវ៉ាន នាយិកា សាលាបឋមសិក្សាកោះថ្មី បានអោយដឹងថា សាលារៀនថ្នាក់បឋមសិក្សាទាំង៧ នៅក្នុងឃុំកោះសូទិន ខ្វះគ្រូគ្រប់កន្លែង ជាហេតុធ្វើអោយគាត់ជានាយិកា តម្រូវអោយបង្រៀន២ពេល។កន្លងមក គាត់ក៏បានជួបប្រជុំជាមួយក្រុមប្រឹក្សាឃុំកោះសូទិន ដើម្បីស្នើសុំគ្រូចំនួន៣នាក់បន្ថែមទៀតដើម្បីតម្រូវការចាំបាច់តែមិនបាន។ ការស្នើសុំនោះគឺរាល់ខែតែម្តង។
លោកនាយិកាបានអោយដឹងទៀតថា ជាច្រើនឆ្នាំមកហើយ ដែលគាត់បានបង្រៀន២វេន ព្រោះខ្វះគ្រូ ។នៅពេលដែលគាត់ជាប់រវល់ទៅប្រជុំពេលព្រឹក ត្រូវអាក់ខានបង្រៀនគាត់មានការអាណិតសិស្សហើយរួសរាន់មកបង្រៀនពេលល្ងាច ដោយបង្រៀនគួប ដាក់បញ្ជូលគ្នាតែម្តង ។ លោកនាយិកាបានបញ្ជាក់ទៀតថា សាលាឋបមសិក្សាកោះថ្មី មានសិស្ស១៥៥នាក់ មាន៦ថ្នាក់ហើយ លោក គ្រូមានតែ៣នាក់ គីបង្រៀន២វេន ។
នៅមុនចូលឆ្នាំថ្មីនេះ គាត់មានធុរៈការកូន និងជាប់រវល់ទៅសិក្ខាសាលា ហើយអ្នកគ្រូលីចាន់នៅក៏បានជាប់រវល់ការកូន និងកាត់ចំណងដៃទៀតធ្វើអោយមានការអាក់ខានបង្រៀនច្រើន ជាហេតុធ្វើអោយអាណាព្យាបាលសិស្សមួយចំនួនមានប្រតិកម្ម ។ នៅក្នុងការបង្រៀន២វេននេះ មិនបានប្រាក់ខែឌុបដូចការចោទប្រកាន់នោះទេ គីបានតែប្រាក់ឧបត្ថម្ភតែប៉ុណ្ណោះ ។ លោកនាយិកាក៏ដូចជាអាណាព្យាបាលសិស្ស ក៏បានទទួចស្នើសុំអោយមន្ទីរ ក៏ដូចជាក្រសួងអប់រំយុវជននិងកីឡា មេត្តាចាត់ចែងបញ្ជូនគ្រូទៅតាមតម្រូវការចាំបាច់របស់សាលាបឋមសិក្សា កោះថ្មីផង ។
ចែករំលែកព័តមាននេះ