ខេត្តត្បូងឃ្មុំ ៖ រថយន្តប្រភេទយីឌុប១គ្រឿងម៉ាកហ៊ីយ៉ានដាយ ពាក់ស្លាកលេខកំពង់ចាម3A-4788ដឹកផលអនុផលព្រៃឈ(ជំនៀរទ្រៀក) បំរុងឆ្លងដែនទៅវៀតណាមនោះ ត្រូវបានកម្លាំងសមត្ថកិច្ចចម្រុះមាន នគរបាលស្រុកមេមត់ រដ្ឋបាលព្រៃឈើ និងទាហានសឹករងស្រុកមេមត់ធ្វើការបង្ក្រាប វេលាម៉ោង០១ និង៣០នាទីយប់រំលងអធ្រាត្រ ឈានចូលព្រឹកថ្ងៃទី២៦ កញ្ញា ស្ថិតត្រង់ចំណុចតាមបណ្តោយផ្លូវជាតិលេខ៧ ក្នុងភូមិក្តុល ឃុំទន្លូង ស្រុកមេមត់ ដែលមានទម្ងន់រាប់សិបតោនឯណោះ ។
លោកយី សុខហេង នាយផ្នែករដ្ឋបាលព្រៃឈើមេមត់ប្រាប់ដឹងថា នៅពេលដែលរថយន្តប្រភេទយីឌុបខាងលើកដឹកដើមទ្រាំង ចេញពីដីខេត្តក្រចេះ ចូលមកដល់ត្រង់ចំណុចឃុំទន្លូង ស្រុកមេមត់ ដែលបានដាក់ឡើងពេញទ្រុងខាងក្រោយ ដោយមិនមានច្បាប់ដឹកជញ្ជូននោះទេ ក៏ត្រូវបានមន្ត្រីរដ្ឋបាលសង្កាត់រដ្ឋបាលព្រៃឈើមេមត់ សហការជាមួយនឹងកម្លាំងប្រដាប់អាវុធបង្ក្រាប ក្នុងពេលដែលរថយន្តនេះកំពុងតែបើកបរតាមផ្លូវជាតិ ។
លោកយី សុខហេង នាយសង្កាត់រដ្ឋបាលព្រៃឈើមេមត់ប្រាប់បន្តថា ដោយសារតែមិនឃើញមានច្បាប់ដឹកជញ្ជូនផល-អនុផលព្រៃឈើនោះទេ ក៏ត្រូវបានលោកនាយរដ្ឋខណ្ឌរដ្ឋបាលព្រៃឈើត្បូងឃ្មុំ ក៏ដូចជាស្ថាប័នពាក់ពន្ធឲ្យរឹបអូសឈើ១រថយន្តធំនេះ ដោយបានបើកយករក្សាទុកនៅឃ្លាំងទន្លេបិទ។
ឈើទ្រៀកទាំងនោះអាចត្រូវបានគេដឹកចេញមកពីខេត្តក្រចេះ ឬខេត្តស្ទឹងត្រែង ភាគច្រើនតែដុះនៅតាមជ្រលងភ្នំ ដោយគេកាប់យកមកសម្រាប់កែច្នៃធ្វើជាចង្កឹះ រនាបគ្រែមានសភាពរលោងល្អ និងវែកបាយសម្រាប់បំរើសេចក្តីត្រូវការក្នុងគ្រួសារ ។
លោកព្រហ្ម វុទ្ធី មេបញ្ជាការកងរាជអាវុធហត្ថស្រុកមេមត់វិញប្រាប់ឲ្យដឹងដែរថា កន្លងទៅក៏មានរថយន្តប្រភេទយីឌុប១គ្រឿងបានដឹកឈើទ្រៀក កាលពីវេលាម៉ោង២យប់រំលងអាធ្រាត្យក្នុងខែកញ្ញា២០១៦នេះ ត្រង់ចំណុចច្រករបៀង ស្ថិតនៅភូមិដូង ឃុំរូង ស្រុកមេមត់ ខណៈពេលដែលបំរុងឆ្លងដែនយកទៅលក់នៅប្រទេសវៀតណាមនោះ ។
ប្រតិបត្តិការបង្ក្រាបដឹកនាំដោយលោកឧត្តមសេនីយ៏ត្រីវ៉ា សារិទ្ធ មេបញ្ជាការកងរាជអាវុធហត្ថខេត្ត ត្រូវបានបញ្ជូនមករក្សាទុកនៅឃ្លាំងទន្លេបិទដែរ ។
ចែករំលែកព័តមាននេះ