ខេត្តពោធិ៍សាត់ ៖ បើតាមសេចក្តីរាយការណ៍បានឱ្យដឹងថា កាលពីថ្ងៃអង្គារ៍ ទី១២ ខែមេសា ឆ្នាំ២០២២ វេលាម៉ោង៦និង១៥នាទីល្ងាច ជនសង្ស័យម្នាក់ ត្រូវបានសមត្ថកិច្ចនគរបាលឃាត់ខ្លួនពីបទប្រើអំពើហិ.ង្សាក្នុងគ្រួសារ ដោយបានជេរប្រមាថប្រពន្ធ និងយកកាំបិតចែត មកគំរា.មរកកា.ប់សម្លា.ប់ទៅលើប្រពន្ធរបស់ខ្លួន នៅចំណុចផ្ទះជនរងគ្រោះ ស្ថិតនៅភូមិតាសាស់ ឃុំផ្ទះរុង ស្រុកតាលោសែនជ័យ ខេត្តពោធិ៍សាត់។
យោងតាមរបាយការណ៍របស់អធិការដ្ឋាននគរបាលស្រុកតាលោសែនជ័យ បានឲ្យដឹងថា ករណីនេះ សមត្ថកិច្ចនគរបាលបានទទួលពាក្យបណ្ដឹងពីឈ្មោះ កេន សារ៉ាន់ ភេទស្រី អាយុ៤០ឆ្នាំ មុខរបរកសិករ រស់នៅភូមិកើតហេតុខាងលើ បានប្តឹងទៅលើប្តីរបស់ខ្លួនឈ្មោះ ឡុញ ទឿម ភេទប្រុស អាយុ៤១ឆ្នាំ មុខរបរកសិករ រស់នៅជាមួយគ្នា ដែលជនសង្ស័យជាប្ដីបានជេរប្រមាថ និងយកកាំបិតចែត មកគំរា.មរកកា.ប់សម្លា.ប់ទៅលើខ្លួន កាលនៅថ្ងៃទី១២ ខែមេសា ឆ្នាំ២០២២ វេលាម៉ោង៥និង៣៥នាទីល្ងាច។
ក្រោយពីទទួលពាក្យបណ្ដឹងរួច សមត្ថកិច្ចប៉ុស្តិ៍នគរបាលរដ្ឋបាលផ្ទះរុង បានសហការជាមួយកម្លាំងអន្តរាគមន៍អធិការដ្ឋាននគរបាលស្រុកតាលោសែនជ័យ ដឹកនាំដោយលោកអនុសេនីយ៍ទោ មិត្ត ច័ន្ទសារី នាយរងប៉ុស្តិ៍នគរបាលរដ្ឋផ្ទះរុង បានចុះទៅដល់កន្លែងកើតហេតុ ត្រួតពិនិត្យនិងស្រាវជ្រាវសួរនាំ រហូតឈានដល់ការឃាត់ខ្លួនជនសង្ស័យឈ្មោះ ឡុញ ទឿម និងដកហូតវត្ថុតាង (កាំបិតចែត១) រួចបញ្ជូនមកកាន់ប៉ុស្តិ៍នគរបាលរដ្ឋបាលផ្ទះរុង ដើម្បីសួរនាំតាមនីតិវិធី។
តាមរបាយការណ៍បានឲ្យដឹងទៀតថា មូលហេតុដែលជនសង្ស័យប្រើអំពើហិ.ង្សាទៅលើប្រពន្ធរបស់ខ្លួន គឺដោយសារស្រវឹងស្រា។ ហើយបើតាមបណ្ដឹងរបស់ជនរងគ្រោះជាប្រពន្ធ គឺសូមឱ្យសមត្ថកិច្ចជួយធ្វើការអប់រំលើកទី១ នៅប៉ុស្តិ៍នគរបាលរដ្ឋបាលផ្ទះរុង។ ក្រោយពីការអប់រំ ប្រពន្ធនិងក្រុមគ្រួសារសាច់ញាតិបានធ្វើលិខិតធានាយកបុរសរូបនេះទៅផ្ទះវិញផងដែរ៕
ចែករំលែកព័តមាននេះ