រាជធានីភ្នំពេញ ៖ មន្ទីរពេទ្យកាល់ម៉ែតនាព្រឹកថ្ងៃទី១៩ ខែកញ្ញា ឆ្នាំ២០១៦ បានបើកកិច្ចប្រជុំថ្នាក់ដឹកនាំមន្ទីរពេទ្យនៃបណ្តាប្រទេសប្រើប្រាស់ភាសាបារាំងតំបន់អាស៊ីអាគ្នេយ៍ស្តីពី «ការរៀបចំគ្រប់គ្រងការថែទាំអ្នកជំងឺ» ដែលមានការចូលរួមពីលោក Herve d’ Oriano នាយកផ្នែកទំនាក់ទំនងអន្តរជាតិមន្ទីរពេទ្យ Marseille លោក Jean Charles Fanre Pierret នាយកមន្ទីរពេទ្យ sainte cyre au Mente d’or លោកសាស្ត្រាចារ្យឈាង រ៉ា អគ្គនាយកមន្ទីរពេទ្យកាល់ម៉ែតនិងជានាយកប្រតិបត្តិ REHASE មន្ទីរពេទ្យជាតិវៀតណាម ឡាវ ព្រមទាំងប្រធានមន្ទីរសុខាភិបាល ប្រធានមន្ទីរពេទ្យជាតិរាជធានី ខេត្ត និងប្រធានផ្នែកមន្ទីរពេទ្យកាល់ម៉ែតសរុប៧៨នាក់ ។
លោកសាស្ត្រាចារ្យ ឈាងរ៉ា អគ្គនាយកមន្ទីរពេទ្យកាល់ម៉ែត និងជានាយកប្រតិបត្តិ REHASE បានមានប្រសាសន៍ថា ការរៀបចំបង្កើតនូវបណ្តាញមន្ទីរពេទ្យនិយាយភាសាបារាំងនៅក្នុងតំបន់អាស៊ីអាគ្នេយ៍នេះ គឺជាកិត្តិយសរបស់កម្ពុជាដែលយើងចាត់ចែង ហើយទទួលបានអត្ថប្រយោជន៍ គឺថា ទន្ទឹមពេលដែលកម្ពុជាយើងកំពុង និងប្រទេសក្នុងតំបន់កំពុងត្រូវការអភិវឌ្ឍផ្នែកគ្រប់គ្រងមន្ទីរពេទ្យនេះ គឺជាបណ្តើរៗតាមរយៈបណ្តាញមន្ទីរពេទ្យ REHASE គឺយើងបានបណ្តុះបណ្តាលធនធានមនុស្សដែលជានាយក នាយករងរបស់មន្ទីរពេទ្យ ក៏ដូចជាថ្នាក់ដឹកនាំមន្ទីរពេទ្យ បានស្ទើរតែគ្រប់ចំណុច ហើយជាចំណុចគោលលធំៗ យើងកំពុងតែចាប់ផ្តើមលំអិតនៃគោលធំនីមួយៗឲ្យកាន់តែមានលក្ខណៈជាក់ស្តែងបន្ថែមទៀត ហើយយើងផ្លាស់ប្តូរយោបល់គ្នាមិនមែនតែមន្ទីរពេទ្យកម្ពុជាទេ ។
រាល់លើកមានមន្ទីរពេទ្យជាតិកម្ពុជា មានមន្ទីរពេទ្យបណ្តាលខេត្តមួយចំនួនជាក់ស្តែងនៅថ្ងៃនេះ គឺមានមន្ទីរពេទ្យជាតិទាំងអស់ មន្ទីរពេទ្យខេត្តធំៗចំនួន៦បន្ថែមទៀត មន្ទីរពេទ្យខាងប្រទេសវៀតណាម ឡាវ យើងបានពិភាក្សាកម្រិតថ្នាក់ដឹកនាំ ប្រធានផ្នែកដើម្បីរកវិធីឲ្យកាន់តែប្រសើរឡើង តាមការអនុវត្តថ្មីរបស់ប្រទេសជឿនលឿន ជាពិសេសប្រទេសបារាំង ។ ជាលទ្ធផលយើងបានជម្រុញថ្នាក់ដឹកនាំសំខាន់ៗរបស់មន្ទីរពេទ្យឲ្យចាត់ចែងការងារឲ្យបានកាន់តែប្រសើរ ស្របទៅតាមបច្ចេកទេស ឯកទេសដែលគ្រូពេទ្យយើងបណ្តុះបណ្តាលកាន់តែច្រើនឡើង ។
ចែករំលែកព័តមាននេះ