រាជធានីភ្នំពេញ៖ តំណាងអយ្យការអមសាលាដំបូងរាជធានីភ្នំពេញ នាថ្ងៃទី៤ ខែមេសា ឆ្នាំ២០២២ បានសម្រេចធ្វើការចោទប្រកាន់ស្ត្រីម្នាក់ ដែលមានតួនាទីជាបុគ្គលិកគណនេយ្យទីផ្សារនៃក្រុមហ៊ុនមួយ ពីបទរំលោ.ភលើទំនុកចិត្ត និងបានចេញមូលប្បទានបត្រ មានទឹកប្រាក់ជាង២ម៉ឺនដុល្លារអាមេរិក ។
ស្ត្រីរូបនេះឈ្មោះ ឆោម ម៉ារ៉ាឌី អាយុ២៣ឆ្នាំ ជាបុគ្គលិកគណនេយ្យរបស់ក្រុមហ៊ុន ROYAL VSNN SUPPLY Co.Ltd ស្នាក់នៅផ្ទះលេខ៤៧៩ ផ្លូវលំ ភូមិកោះដាច់ សង្កាត់កោះដាច់ ខណ្ឌជ្រោយចង្វា រាជធានីភ្នំពេញ ។ ក្រោយពីតំណាងអយ្យការធ្វើការចោទប្រកាន់ជាផ្លូវការហើយនោះ សំណុំរឿងបានចាត់បញ្ជូនទៅចៅក្រមស៊ើបសួរ ដើម្បីសម្រេចឃុំខ្លួនឬមិនឃុំខ្លួនដែលជាឆន្ទានុសិទ្ធិរបស់ចៅក្រម ។
សូមរំឭកថា នារសៀលថ្ងៃទី៤ ខែមេសា ឆ្នាំ២០២២នោះ កម្លាំងនគរបាលនាយកដ្ឋានព្រហ្មទណ្ឌ បានចាប់បញ្ជូនជនសង្ស័យទៅសាលាដំបូងរាជធានីភ្នំពេញ ពាក់ព័ន្ធនឹងពាក្យបណ្តឹងរបស់ឈ្មោះ ណៃ ស្រីនិក ពីបទរំលោភលើទំនុកចិត្ត។
តាមពាក្យបណ្តឹងបានលើកឡើងថា កាលពីថ្ងៃទី៨ ខែមីនា ឆ្នាំ២០២១ ជនឈ្មោះ ឆោម ម៉ារ៉ាឌី បានចូលបម្រើការងារនៅក្រុមហ៊ុនខាងលើនេះ ដោយមានតួនាទីផ្នែកគណនេយ្យ ទទួលបានប្រាក់ខែ៣៣០ដុល្លារអាមេរិកក្នុង១ខែ ។ នៅថ្ងៃទី១៨ ខែមីនា ឆ្នាំ២០២២ ជនសង្ស័យបានទំនាក់ទំនងទៅក្រុមហ៊ុនចិនមួយទៀត ស្ថិតនៅស្រុកសំរោងទង ខេត្តកំពង់ស្ពឺ ឃុបឃិតគ្នាធ្វើទុយោលក់ ដោយដាក់ឈ្មោះក្រុមហ៊ុន ROYAL VSNN SUPPLY co.Ltd ដែលមានទឹកប្រាក់ប្រមាណ២៧.០០០ដុល្លារអាមេរិក ព្រមទាំងបានលួចចេញមូលប្បទានបត្រ២សន្លឹក លើទឹកប្រាក់រាប់សែនដុល្លារឲ្យទៅក្រុមហ៊ុនមួយនោះទៀតផង ។
នៅចំពោះមុខសមត្តកិច្ច ជនសង្ស័យបានសារភាពនិងទទួលស្គាល់នូវរាល់សកម្មភាពដែលខ្លួនបានប្រព្រឹត្ត ប៉ុន្តែថាប្រាក់ទាំងអស់នោះត្រូវបានយកទៅចំណាយផ្សេងៗអស់ហើយ ។ ដូច្នេះសំណុំរឿងនេះមានតែអនុវត្តតាមផ្លូវច្បាប់ជាធរមានតែប៉ុណ្ណោះ ៕
ចែករំលែកព័តមាននេះ