ខេត្តកែប ៖ លោក វ៉ៅ សុខា អភិបាលរងខេត្ត និងជាអ្នកនាំពាក្យរបស់សាលាខេត្ត បានឲ្យដឹងថា ផ្ទះសំណាក់ បឹងហ្គាឡូ និងសណ្ឋាគារនៅខេត្តកែប ទទួលបានការកក់ពីភ្ញៀវដែលត្រៀមមកលេងកំសាន្តនាឱកាសបុណ្យចូលឆ្នាំថ្មីប្រពៃណីខ្មែរខាងមុខនេះរួចរាល់បានប្រមាណជា៧០% ហើយ នេះបើគិតមកដល់ថ្ងៃទី០៣ ខែមេសា ឆ្នាំ២០២២នេះ។
លោកវ៉ៅ សុខា បានឲ្យដឹងទៀតថា រដ្ឋបាលខេត្តបានត្រៀមលក្ខណៈរួចរាល់ ដើម្បីរៀបចំសន្តិសុខសណ្តាប់ធ្នាប់សាធារណៈ ក្នុងនោះយើងក៏បានត្រៀមនូវចំណតយានយន្តគ្រប់ប្រភេទ ដែលក្រុមការងារយើងកំពុងរៀបចំទីតាំងយ៉ាងល្អ ដើម្បីធានានូវសុវត្ថិភាពជូនភ្ញៀវ។
ជាមួយគ្នានេះដែរ អ្វីដែលសំខាន់ជាងគេនោះ មន្ទីរជំនាញក៏បានចុះទៅណែនាំដល់ប្រតិបត្តិករទេសចរណ៍ឲ្យដាក់បង្ហាញតារាងតម្លៃដល់ភ្ញៀវឲ្យបានច្បាស់លាស់ ចៀសវាងការកើតបញ្ហាផ្សេងៗ។ ហើយក្រៅពីនោះ ក្រុមការងារមន្ទីរជំនាញ ពាក់ព័ន្ធក៏បានចុះទៅធ្វើការណែនាំដល់បងប្អូនប្រជាពលរដ្ឋ និងក្រុមអាជីវករផងដែរ នូវការអនុវត្តវិធានការរបស់ក្រសួងសុខាភិបាល ៣ការពារ និង៣កុំ ដើម្បីបង្ការ និងទប់ស្កាត់ការឆ្លងរីករាលដាលនៃជំងឺកូវីដ១៩ ជាពិសេសមេរោគបំប្លែងថ្មី អូមីក្រុង ។
រីឯមន្ទីរទេសចរណ៍ខេត្ត លោក សោម ចិន្តា ក៏បានឲ្យអ្នកយកព័ត៌មានយើងដឹងនៅថ្ងៃទី៣ ខែមេសា ឆ្នាំ២០២២នេះដែរថា ភ្ញៀវដែលមកកក់ផ្ទះសំណាក់សម្រាប់សម្រាកកំសាន្តនាឱកាសបុណ្យចូលឆ្នាំប្រពៃណីខ្មែរខាងមុខនេះ គឺភ្ញៀវបានមកកក់ផ្ទះសំណាក់បានច្រើនពិតមែនមកដល់ថ្ងៃនេះ គឺប្រមាណ ៧០%។
ចំណែកម្ចាស់ផ្ទះសំណាក់ សណ្ឋាគារ បឹងហ្គាឡូ រមណីយដ្ឋាន និងអាហារដ្ឋាន ក៏បានឲ្យដឹងដែរថា មកដល់ពេលនេះ បន្ទប់គេងនៅផ្ទះសំណាក់ បឹងហ្គាឡូ សណ្ឋាគាររបស់ពួកគាត់ ត្រូវបានភ្ញៀវទេសចរណ៍កក់អស់ច្រើនក៏ពិតមែន សំរាប់ថ្ងៃបុណ្យចូលឆ្នាំខាងមុខនេះ តែតម្លៃគឺមិនឡើងថ្លៃហួសហេតុនោះទេ ។ គឺសម្រាប់បន្ទប់គេងរបស់ពួកគាត់ដំឡើងថ្លៃមិនលើសពី៥ដុល្លារនោះទេក្នុងមួយបន្ទប់ ដោយឡែកសម្រាប់ម្ហូបអាហារវិញ ហាងរបស់លោកក៏មិនដំឡើងថ្លៃនោះដែរ៕
ចែករំលែកព័តមាននេះ