បាកកក-ប្រទេសថៃ ៖ ក្រុមហ៊ុនអាកាសចរណ៍ AirAsia បានប្រកាសនៅពេលកន្លងមកថា ក្រុមហ៊ុននឹងផ្ដល់ជូនការជិះយន្តហោះរបស់ក្រុមហ៊ុនអាកាស AirAsia ដោយឥតគិតថ្លៃសម្រាប់កីឡាករជ័យលាភីទទួលបានមេដាយទាំងបីប្រភេទ ក្នុងព្រឹត្តិការណ៍កីឡាអូឡាំពិកអាស៊ាន គឺមេដាយមាស មេដាយប្រាក់និងមេដាយសំរឹទ្ធ ។ ហើយកាលពីថ្ងៃទី០៨ កញ្ញា ២០១៦កន្លងទៅនេះ នៅសណ្ឋាគារ JW Marriot ទីក្រុងបាងកកប្រទេសថៃ ក្រុមហ៊ុនអាកាសចរណ៍ AirAsia បានប្រគល់សិទ្ធិនេះជូនកីឡាករជ័យលាភីរបស់អាស៊ានជាផ្លូវការចំនួន ១៨នាក់ តែវត្តមានកីឡាករមកទទួលផ្ទាល់តែចំនួន១៥នាក់ប៉ុណ្ណោះ ។
បើតាមលោក Tony Fernandes នាយកប្រតិបត្តិក្រុមហ៊ុនអាកាសចរណ៍ AirAsia បានឱ្យដឹងថា កីឡាករជ័យលាភីទាំងអស់នៅក្នុងបណ្ដាប្រទេសអាស៊ាន ក្នុងការប្រកួតកីឡា អូឡាំពិកអាស៊ាន នឹងទទួលបានការជិះយន្តហោះឥតគិតថ្លៃទៅតាមប្រភេទមេដាយ ក្នុងនោះកីឡាករទទួលបានមេដាយមាស នឹងជិះយន្តហោះរបស់ក្រុមហ៊ុនអាកាសចរណ៍ AirAsia ឥតគិតថ្លៃពេញមួយជីវិត កីឡាករទទួលបានមេដាយប្រាក់ ក្នុងការប្រកួតនឹងទទួលបានការជិះយន្តរបស់ AirAsia ឥតគិតថ្លៃរយៈពេល ៥ឆ្នាំ និងកីឡារជ័យលាភីមេដាយសំរឹទ្ធនឹងទទួលបានការជិះយន្តហោះរបស់ក្រុមហ៊ុនអាកាសចរណ៍ AirAsia ឥតគិតថ្លៃរយៈពេល ៣ឆ្នាំ ។
លោកបន្តថាការជិះយន្តហោះនេះ មិនមែនជិះតែក្នុងប្រទេសអាស៊ានទេ តែពួកគេអាចជិះយន្តធ្វើដំណើរការទៅកាន់ពិភពលោកទាំងមូលដែលពួកគេចង់ទៅតែសម្រាប់តែប្រទេសដែលមានជើងហោះហើររបស់ AirAsia ប៉ុណ្ណោះនិងគ្រប់ពេលវេលា ដែលពួកគេចង់ធ្វើដំណើរការផងដែរ ។
លោកស្រី Chavadee Tongroach អនុរដ្ឋមន្ត្រីក្រសួងទេសចរណ៍ និងកីឡាប្រទេសថៃ បានឱ្យដឹងថា វាជារឿងដែលគួរឱ្យរីករាយណាស់ ដែលកីឡាកររបស់អាស៊ានទទួលបានមេដាយចំនួន១៨ ក្នុងនោះ មេដាយមាសចំនួន៥ មេដាយប្រាក់ចំនួន១០ និងមេដាយសំរឹទ្ធចំនួន៣ ។ ទាំងនេះគឺការខិតខំប្រឹងប្រែងរបស់កីឡាករឆ្នើមរបស់អាស៊ានយើង ទើបទទួលបានលទ្ធផលបែបនេះ ។
គួរបញ្ជាក់ថា ក្រុមហ៊ុនអាកាសចរណ៍ AirAsia គឺជាក្រុមហ៊ុនដឹកអ្នកដំណើរតម្លៃទាបធំជាងគេបំផុតនៅអាស៊ីដោយគិតលើចំនួនអ្នកដំណើរដែលខ្លួនបានដឹកនិងចំនួនយន្តហោះដែលខ្លួនមានជាមួយនឹងចំនួននៃការហោះហើរច្រើនដាច់គេ ។ AirAsia ក៏ជាក្រុមហ៊ុនអាកាសចរណ៍តែមួយគត់ផងដែរដែលធ្វើការហោះហើរទៅកាន់បណ្តាប្រទេសក្នុងអាស៊ានទាំង ១០ រួមទាំងផ្លូវហោះហើរពិសេសជាង៦០ ថែមទៀតនៅក្នុងតំបន់ ។
ក្នុងនាមជាអ្នកត្រួសត្រាយផ្លូវមួយនៅក្នុងការធ្វើដំណើរ និងបច្ចេកវិទ្យា AirAsia ផ្តល់ជូននូវផលិតផលប្រកបដោយភាពច្នៃប្រឌិតដ៏សម្បូរបែបដូចជា កម្មវិធីសម្រាប់ទូរសព្ទ ជម្រើសនៃការប្រើសេវាកម្មដោយខ្លួនឯងដ៏ទូលំទូលាយ ការប្រើ wifi ពេលកំពុងហោះហើរ មគ្គុទេសក៍សម្រាប់ការធ្វើដំណើរ កាហ្វេដ៏មានឱជារស ការទិញទំនិញរួចពន្ធតាមអ៊ីនធើណេត Premium Flex និង FlyThru ។ FlyThru អនុញាតឱ្យអ្នកដំណើរហោះហើរដោយមិនចាំបាច់ប្តូរយន្តហោះទៅកាន់គ្រប់ទិសដៅនៅក្នុងបណ្តាញធ្វើដំណើរដ៏ធំទូលាយរបស់ AirAsia ដោយឈប់តែមួយដងប៉ុណ្ណោះនៅកូឡាឡាំពួរប្រទេសម៉ាឡេស៊ី ដែលជាមណ្ឌលដឹកជញ្ជូនអ្នកដំណើរតម្លៃទាបនៅអាស៊ី និងមណ្ឌលប្តូរជើងហោះហើរដ៏ងាយស្រួលដទៃទៀតនៅក្នុងប្រទេសថៃ និងឥណ្ឌូនេស៊ីដោយមិនចាំបាច់ឆ្លងកាត់កន្លែងត្រួតពិនិត្យអន្តោប្រវេសន៍ រួមជាមួយការបញ្ជូនឥវ៉ាន់ទៅកាន់ទិសដៅចុងក្រោយតែម្តង ៕
ចែករំលែកព័តមាននេះ