រាជធានីភ្នំពេញ ៖ ប្រធានសមាគមសិល្បករខ្មែរលោកសុះ ម៉ាច បានពន្យល់ពីភាពផ្សេងគ្នារវាងសមាគមសិល្បករខ្មែរ និងសមាគម«មិត្តសិល្បៈស្ម័គ្រជួយសង្គម» ដែលគ្រប់គ្រងដោយអ្នកនាងចន ច័ន្ទលក្ខិណា
រាជធានីភ្នំពេញ ៖ ប្រធានសមាគមសិល្បករខ្មែរលោកសុះ ម៉ាច បានពន្យល់ពីភាពផ្សេងគ្នារវាងសមាគមសិល្បករខ្មែរ និងសមាគម«មិត្តសិល្បៈស្ម័គ្រជួយសង្គម» ដែលគ្រប់គ្រងដោយអ្នកនាងចន ច័ន្ទលក្ខិណា និងស្វាមីក្រោយរបស់នាង ។
ការពន្យល់ពីភាពខុសគ្នារវាងសមាគមសិល្បៈទាំងពីររបស់លោកសុះ ម៉ាច ធ្វើឡើង បន្ទាប់ពីមហាជនមួយចំនួនយល់ខុស និងងឿងឆ្ងល់ពីតួនាទី និងសកម្មភាពរបស់សមាគមទាំងពីរដែលកំពុងធ្វើសកម្មភាពនាពេលបច្ចុប្បន្ន ។
កាលពីពេល ថ្មីៗកន្លងមកលោកសុះ ម៉ាច ឱ្យដឹងថា សមាគមសិល្បករខ្មែរបង្កើតឡើងក្នុងឆ្នាំ២០០៦ក្រោមស្ថាបនិកផ្តួចផ្តើមដោយលោកខៀវ តុលា លោកជុំ កុសល លោកសយ សុភាព និងលោកអៀង ស៊ីធុល ហើយបានកោះអញ្ជើញសិល្បករសិល្បការិនី ចូលរួមប្រជុំ និងបោះឆ្នោតជ្រើសរើសប្រធាន ។ លោកអៀង ស៊ីធុលត្រូវបានបោះឆ្នោតជ្រើសរើសឱ្យធ្វើជាប្រធានដឹកនាំសមាគមសិល្បករខ្មែរ ។ សមាគមសិល្បករខ្មែរបានចុះបញ្ជីនៅក្រសួងមហាផ្ទៃ និងទទួលបានការអនុញ្ញាតឱ្យដំណើរការ ក្រោមការគាំទ្រពីប្រមុខរាជរដ្ឋាភិបាល ។ គោលបំណងរបស់សមាគមសិល្បករខ្មែរ គឺអភិរក្ស អភិវឌ្ឍន៍ លើកស្ទួយវិស័យសិល្បៈជាតិ និងជួយដោះស្រាយរាល់បញ្ហារបស់អ្នកសិល្បៈ ជាពិសេសជួយដល់អ្នកសិល្បៈចាស់ជរា ពិការបាត់បង់សមត្ថភាព និងបាត់បង់ជីវិត និងរួមចំណែកជួយដល់សង្គមជាតិជាដើម ។ នៅក្នុងលក្ខន្តិកៈរបស់សមាគមសិល្បករខ្មែរ គឺឈរលើជំហរអព្យាក្រឹតមិនលំអៀងទៅលើគណបក្សនយោបាយណាមួយឡើយ តែគោរពតាមរដ្ឋធម្មនុញ្ញ និងគោលនយោបាយរបស់រាជរដ្ឋាភិបាល ។
រហូតមកដល់ពេលនេះសមាគមសិល្បករខ្មែរបានដំណើរការអស់រយៈពេលជាង១០ឆ្នាំហើយ ឆ្លងកាត់ការដឹកនាំដោយប្រធាន៣រូបក្រោមការបោះឆ្នោត ក្នុងនោះមានលោក អៀង ស៊ីធុល (អាណត្តិទី១) លោកមិញ សុធីវណ្ណ (អាណត្តិទី២) តែលោកដឹកនាំបានតែពាក់កណ្តាលអាណត្តិប៉ុណ្ណោះក៏លាលែងដោយសាររវល់ការងារ ។ អាណត្តិទី៣ និងទី៤ គឺលោកសុះ ម៉ាច ជាប្រធាន រួមទាំងក្រុមប្រឹក្សាចាស់ ថ្មីទាំង១១ រូបដែលធ្វើការដោយស្ម័គ្រចិត្តគ្មានប្រាក់ខែឡើយ ។ ក្នុងមួយអាណត្តិៗមានរយៈពេលបីឆ្នាំ ។
ក្នុងអាណត្តិដែលដឹកនាំដោយប្រធាន នីមួយៗកន្លងមកបានបំពេញតួនាទីរបស់ខ្លួនទាំងក្នុងសង្គមសិល្បៈ និងសង្គមជាតិយ៉ាងច្រើនទោះបីមានបញ្ហា ខ្លះៗក៏ដោយ ។
លោកសុះ ម៉ាច បញ្ជាក់ថា សមាគមដំណើរការទៅបានរហូតសព្វថ្ងៃ ដោយការជួយឧបត្ថម្ភជ្រោមជ្រែងពីសប្បុសជននានា ក្នុងនោះរួមមានដូចជា លោកកែប ជុតិម៉ា អតីតអភិបាលរាជធានីផ្តល់ទីតាំងសមាគម ឧកញ៉ាបណ្ឌិតជា រតនា ៤០លានរៀល ជួយដល់អ្នកសិល្បៈចាស់ជរា៤០រូប ក្រុមហ៊ុនសប្បាយសម្ភារប្រើប្រាស់ អាណាចក្រតារា១៦លានរៀល ព្រមទាំងអស់លោក មន្ត្រីរាជការ ឯកឧត្តម ឧកញ៉ា លោកជំទាវ លោក លោកស្រី អ្នកនាងកញ្ញា ពលរដ្ឋ ក្នុងនិងក្រៅប្រទេស ជាច្រើនទៀត ។
សមាគមជោគជ័យទាំងក្នុងសង្គមសិល្បៈ និងសង្គមជាតិ រហូតទទួលបានការគាំទ្រ និងកោតសរសើរពីគ្រប់មជ្ឈដ្ឋាននានាទាំងក្នុង និងក្រៅប្រទេស ។ ទោះជាយ៉ាងណាក្តីមួយរយៈក្រោយនេះ ដោយសារមានអ្នកសិល្បៈខ្លះភ្ជាប់ខ្លួនទៅនឹងគណបក្សនយោបាយដែលពួកគេមានសិទ្ធិគាំទ្រ និងបម្រើដូចប្រជាពលរដ្ឋដទៃដែរ ។ តែដោយសារតែអ្នកសិល្បៈខ្លះបានរិះគន់ និងវាយប្រហារទៅលើគណបក្ស និងមេដឹកនាំគណបក្សផ្សេងហួសពីព្រំដែននៃក្រមសីលធម៌ និងសុជីវធម៌ ធ្វើឱ្យទទួលរងការរិះគន់ និងវាយប្រហារយ៉ាងធ្ងន់ពីពលរដ្ឋដែលប្រកាន់និន្នាការគណបក្សនយោបាយ ព្រមទាំងប្រជាពលរដ្ឋដែលមានជំហរអព្យាក្រឹត និងការឈ្លោះតតាំងគ្នាជាសាធារណៈរវាងអ្នកសិល្បៈ និងមហាជន រវាងអ្នកសិល្បៈ និងអ្នកសិល្បៈជាដើម ។ វាធ្វើឱ្យបាត់បង់នូវការគាំទ្រ បាត់បង់នូវតម្លៃនៃសិល្បៈ វាធ្វើឱ្យប៉ះពាល់កិត្តិយសដល់អ្នកសិល្បៈដទៃដែលស្អាតស្អំ ថ្លៃថ្នូរបំពេញតួនាទីសក្តិសមជាមនុស្សគំរូរបស់សាធារណជន ។
ដោយឡែកពាក់ព័ន្ធទៅនឹងសមាគម«មិត្តសិល្បៈស្ម័គ្រចិត្តជួយសង្គម» ដែលបង្កើតឡើងក្រោមការគ្រប់គ្រងរបស់អ្នកនាងចន ច័ន្ទលក្ខិណា នោះវិញ លោកសុះ ម៉ាច បញ្ជាក់ថា គឺមិនមានជាប់ពាក់ព័ន្ធ និងក្រោមដំបូលតែមួយជាមួយសមាគមសិល្បករខ្មែរឡើយ ។
សមាគម «មិត្តសិល្បៈស្ម័គ្រជួយសង្គម»ដែលបានបង្កើតឡើងនាពេលនេះលោកមិនបានដឹងច្បាស់ទេថា តើបង្កើតឡើងដោយការបោះឆ្នោត ឬក៏ការកៀរគរអ្នកសិល្បៈឲ្យចូលរួម ហើយគេធ្វើជាប្រធាននោះ ឬយ៉ាងណាឡើយ ។
លោកសុះ ម៉ាច គិតថា ប្រសិនបើនាំគ្នារួបរួមនៅក្នុងសមាគមសិល្បករខ្មែរតែមួយហើយធ្វើសកម្មភាពមនុស្សធម៌ ដោយមិនប្រកាន់និន្នាការនយោបាយ ដើម្បីធ្វើជាគំរូដល់សិល្បករជំនាន់ក្រោយនោះជាការល្អបំផុត ។
បើតាមលោកសុះ ម៉ាច ប្រសិនបើអ្នកសិល្បៈណាចង់ធ្វើជាប្រធានសមាគមសិល្បៈករខ្មែរ គឺអាចឈរឈ្មោះបាន ព្រោះនៅពាក់កណ្តាលខែកញ្ញា នឹងមានការបោះឆ្នោតជ្រើសរើសប្រធានថ្មី ៕
ចែករំលែកព័តមាននេះ