រាជធានីភ្នំពេញ ៖ លោក ហុក ពៅ ចៅក្រមស៊ើបសួរនៃសាលាដំបូងរាជធានីភ្នំពេញ នារសៀលថ្ងៃទី១៥ ខែមីនា ឆ្នាំ២០២២ បានបើកការស៊ើបសួរ រួចសម្រេចឃុំខ្លួនមន្ត្រីក្រសួងប្រៃសណីយ៍ម្នាក់ ដាក់ពន្ធនាគារជាបណ្តោះអាសន្ន ពាក់ព័ន្ធករណីប្រើប្រាស់មូលប្បទានប័ត្រអត់សាច់ប្រាក់ (សែកស្អុយ) ប្រមាណជាង៥ម៉ឺនដុល្លារអាមេរិក ។
ជនសង្ស័យមានឈ្មោះ សួស សុខា ភេទប្រុស អាយុ៤៩ឆ្នាំ ជាមន្ត្រីបម្រើការងារក្រសួងប្រៃសណីយ៍ មានទីលំនៅផ្ទះលេខ៥៧Z ផ្លូវលេខ៤០២ ស្ថិតក្នុងភូមិ៣ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ ។
ជនសង្ស័យខាងលើនេះ ត្រូវបានកម្លាំងនាយកដ្ឋាននគរបាលព្រហ្មទណ្ឌនៃក្រសួងមហាផ្ទៃ បានធ្វើការឃាត់ខ្លួន និងបញ្ជូនទៅកាន់សាលាដំបូងរាជធានីភ្នំពេញ ក្រោមការចោទប្រកាន់ពីបទ.ឆបោ.ក បទរំលោ.ភលើទំនុកចិត្ត និងបទ.មិនបំពេញកាតព្វកិច្ចចំពោះឧបករណ៍អាចជួញដូរបាន ដែលប្រព្រឹត្តិនៅរាជធានីភ្នំពេញ កាលពីអំឡុងខែវិច្ឆិកា ឆ្នាំ២០១៩ តាមបញ្ញត្តិមាត្រា ៣៧៧, មាត្រា ៣៧៨. មាត្រា ៣៩១ និងមាត្រា ៣៨២ នៃក្រមព្រហ្មទណ្ឌ និងមាត្រា ២៣១ នៃច្បាប់ស្តីពីឧបករណ៍ដែលអាចជួញដូរបាន និងប្រតិបត្តិការទូទាត់សងប្រាក់ ។
ការចាប់ខ្លួនជនសង្ស័យខាងលើ ត្រូវសមត្ថកិច្ចបានអនុវត្តតាមអំណាចដីកាបញ្ជាឱ្យចាប់ខ្លួនលេខ ២៦០ ក១ ដចន របស់លោក ហុក ពៅ ចៅក្រមស៊ើបសួរសាលាដំបូងរាជធានីភ្នំពេញ ។ ក្រោយពីចាប់ខ្លួន សមត្ថកិច្ចបាននាំជនសង្ស័យទៅបង្ហាញចំពោះមុខចៅក្រមស៊ើបសួរ រួចចៅក្រមស៊ើបសួរបានចេញដីកាសម្រេចឃុំខ្លួនមន្ត្រីក្រសួងប្រៃសណីយ៍រូបនោះ ដាក់ពន្ធនាគារជាបណ្តោះអាសន្ន ដើម្បីរង់ចាំថ្ងៃសវនាការជំនុំជម្រះក្តីលើសំណុំរឿងនេះ ៕
ចែករំលែកព័តមាននេះ