ខេត្តកណ្ដាល ៖ បុរសម្នាក់បានហៅម៉ូតូឌុបជិះចុះជិះឡើងចុងក្រោយឲ្យឌុបទៅចម្ការស្វាយដែលជាកន្លែងស្ងាត់ក៏ដកពូថៅកា.ប់ក្បាលអ្នករត់ម៉ូតូឌុប២ពូថៅបណ្ដាលឲ្យហូរជោគក្បាល
ខេត្តកណ្ដាល ៖ បុរសម្នាក់បានហៅម៉ូតូឌុបជិះចុះជិះឡើងចុងក្រោយឲ្យឌុបទៅចម្ការស្វាយដែលជាកន្លែងស្ងាត់ក៏ដកពូថៅកាប់ក្បាលអ្នករត់ម៉ូតូឌុប២ពូថៅបណ្ដាលឲ្យហូរជោគក្បាល ដែលហេតុការណ៍នេះកើតឡើងកាលពីវេលាម៉ោង៧ និង៣៥នាទីព្រឹក ថ្ងៃទី២៤ ខែសីហា ឆ្នាំ២០១៦ នៅចំណុចចម្ការស្វាយមួយកន្លែងក្នុងភូមិបត្តាជី សង្កាត់ព្រែកហូរ ក្រុងតាខ្មៅ ខេត្តកណ្ដាល ។
សមត្ថកិច្ចបានឲ្យដឹងថា ជនសង្ស័យដែលត្រូវចាប់ខ្លួនឈ្មោះ ឈាន ឆុន ភេទប្រុស អាយុ៥៣ឆ្នាំ រស់នៅភូមិព្រែកហូរកើត សង្កាត់ព្រែកហូរ ក្រុងតាខ្មៅ ខេត្តកណ្ដាល ។ ចំណែកជនរងគ្រោះឈ្មោះ យិន ហ៊ន់ ភេទប្រុស អាយុ៣៤ឆ្នាំ មុខរបររត់ម៉ូតូឌុប មានទីលំនៅភូមិព្រែកហូរលិច សង្កាត់ព្រែកហូរ ក្រុងតាខ្មៅ ខេត្តកណ្ដាល ។
ប្រភពពីសមត្ថកិច្ចក្រុងតាខ្មៅបានឲ្យដឹងថា មុនពេលកើតហេតុ នៅវេលាម៉ោង៧ និង២០នាទីព្រឹក ថ្ងៃទី២៤ ខែសីហា ឆ្នាំ២០១៦ ជនសង្ស័យបានឲ្យជនរងគ្រោះឌុបពីមុខវត្តព្រែកហូរទៅកាន់ក្រុមហ៊ុន ហេង អភិវឌ្ឍន៍ ក្នុងតម្លៃ៣ពាន់រៀល ពេលទៅដល់គោលដៅជនសង្ស័យមិនចុះទេ ដោយឲ្យបន្តទៅស្ពានដែកជាប់ព្រំប្រទល់ព្រែកហួរ រួចឲ្យបន្តឌុបតាមផ្លូវ៦០ម៉ែត្រទៅចម្ការស្វាយរបស់គាត់ទៀត លុះដល់ចម្ការស្វាយហើយជនសង្ស័យក៏សួរជនរងគ្រោះម្តងទៀតថាយកថ្លៃប៉ុន្មាន? ពេលនោះជនរងគ្រោះប្រាប់ថា៣ពាន់រៀល ភ្លាមៗនោះជនសង្ស័យបានលូកដៃទៅក្នុងអាវទាញពូថៅមកកាប់ពីក្រោយចំក្បាល២ពូថៅបណ្ដាលឲ្យរយះហូរឈាមជោគក្បាល ។
ប្រភពបន្តទៀតថា ពេលនោះជនរងគ្រោះភ័យណាស់ក៏រត់ចោលម៉ូតូស្រែកឲ្យជួយ តែគ្មានអ្នកណាជួយឡើយ ជនរងគ្រោះក៏ត្រឡប់មកកន្លែងកើតហេតុវិញ ហើយយកមែកស្វាយវាយដៃជនសង្ស័យបណ្ដាលឲ្យជ្រុះពូថៅ ហើយរើសយករត់ឡើងជិះម៉ូតូមកប្តឹងសមត្ថកិច្ចតែម្តង ។
សមត្ថកិច្ចក្រុងតាខ្មៅបញ្ជាក់ថា បន្ទាប់ពីទទួលបានព័ត៌មានភ្លាម កម្លាំងអន្តរាគមន៍ក៏បានចុះទៅធ្វើការឃាត់ខ្លួនជនសង្ស័យនៅកន្លែងកើតហេតុបានភ្លាមផងដែរ ។
នៅចំពោះមុខសមត្ថកិច្ច ជនសង្ស័យនិយាយគ្មានដឹងខុសត្រូវឡើយ (មានសតិមិនប្រក្រតី) ដោយឆ្លើយថា ជនរងបានជាគាត់កាប់ជនរងគ្រោះ ព្រោះតែជនរងគ្រោះបានសម្លាប់ឪពុកម្តាយគាត់កាលពី៣០ឆ្នាំមុន ដែលតាមការពិតឪពុកម្តាយគាត់នៅរស់នៅឡើយនៅភុមិព្រែកហូរកើត ។
ក្រុមគ្រួសារជនសង្ស័យបានឲ្យដឹងថា ពីមុនជនសង្ស័យជាមនុស្សផឹកស្រាស្រវឹងស្ទើរតែរាល់ថ្ងៃរហូតរយៈពេល១ខែចុងក្រោយនេះជនសង្ស័យចេះតែជេរគេជេរឯងពេញក្នុងផ្ទះ និយាយតែម្នាក់ឯង ហើយជួនកាលដើរស្រាតខោ និងជុះអាចម៍ដាក់ខោទៀតផង ទើបត្រូវក្រុមគ្រួសារចាក់សោឲ្យនៅតែក្នុងផ្ទះ តែមិនដឹងជាយ៉ាងម៉េចនៅថ្ងៃកើតហេតុស្រាប់តែជនសង្ស័យបានលួចកាត់សោទ្វាររត់ចេញមកទើបកើតមានរឿងបែបនេះ ៕
ចែករំលែកព័តមាននេះ