ឈើព្រៃឡង់ជិតរលាយដោយមន្ត្រីពាក់ព័ន្ធបើកដៃ ព្រោះលុយធំ
- ក្រចេះ
សកម្មភាពនៃការដឹកជញ្ជូនឈើចេញពីក្នុងតំបន់ដែនជម្រកសត្វព្រៃឡង់ កើតមានជាហូរហែរាល់ថ្ងៃតាមមធ្យាបាយគ្រប់ប្រភេទ ហាក់មិនមានការបង្ក្រាបទប់ស្កាត់ពីសំណាក់
ខេត្តក្រចេះ ៖ ប្រភពព័ត៌មានពីប្រជាពលរដ្ឋបានរាយការណ៍ឲ្យដឹងថា សកម្មភាពនៃការដឹកជញ្ជូនឈើចេញពីក្នុងតំបន់ដែនជម្រកសត្វព្រៃឡង់ កើតមានជាហូរហែរាល់ថ្ងៃតាមមធ្យាបាយគ្រប់ប្រភេទ ហាក់មិនមានការបង្ក្រាបទប់ស្កាត់ពីសំណាក់មន្ត្រីបរិស្ថាន និងសមត្ថកិច្ចជំនាញពាក់ព័ន្ធដែលប្រចាំការនៅទីនោះឡើយ ។
ប្រភពដដែលបន្តថា នៅក្នុងសកម្មភាពនៃការដឹកជញ្ជូនឈើចេញពីតំបន់ព្រៃឡង់នោះ ក្រុមឈ្មួញបានប្រើប្រាស់មធ្យោបាយតាមរថយន្តសាំយ៉ុងកែច្នៃ តាមគោយន្តកន្ត្រៃ តាមរ៉ឺម៉កម៉ូតូ ឬរទេះគោជាដើម ។
បើតាមប្រភពព័ត៌មានបានខ្សឹបឲ្យដឹងថា នៅក្នុងសកម្មភាពនៃការដឹកជញ្ជូនឈើចេញពីចំណុចទីតាំងដែលគ្រប់គ្រងដោយមន្ត្រីបរិស្ថាន គឺក្រុមឈ្មួញត្រូវតែសុំការអនុញ្ញាតពីលោក សាំង សុខន នាយកដែនជម្រកសត្វព្រៃឡង់ និងលោក កា ជាមន្ត្រីកងរាជអាវុធហត្ថខេត្ត ដែលប្រចាំទិសនៅតំបន់ព្រៃឡង់ ។
ជាមួយនឹងការអនុញ្ញាតឲ្យមានសកម្មភាពរលូនល្អនៃការដឹកជញ្ជូនឈើពីសំណាក់ក្រុមឈ្មួញ គឺត្រូវបង់លុយថ្លៃបាយទឹកឲ្យទៅលោក សាំង សុខន នាយកដែនជំរកសត្វព្រៃឡង់ ដោយក្នុងរថយន្តសាំយ៉ុងកែច្នៃមួយគ្រឿងចំនួន ៣០ម៉ឺនរៀល គោយន្តកន្ត្រៃចំនួន២០ម៉ឺនរៀល ។ ក្រៅពីនោះ បង់អោយលោក កា ជាមន្ត្រីអាវុធហត្ថខេត្ត រួមនឹងសមត្ថកិច្ចជំនាញពាក់ព័ន្ធផ្សេងទៀត គឺត្រូវបង់លុយបាយទឹកទៅតាមជំនាញស្ថាប័នតាមជាក់ស្ដែង ។
ប្រភពដដែលបញ្ជាក់ថា ក្នុងជំនួញឈើខុសច្បាប់នៅក្នុងតំបន់ព្រៃឡង់ មនុស្សសំខាន់ៗដែលត្រូវប្រាប់មានតែមន្ត្រីបរិស្ថាន និងគ្រប់គ្រងដោយលោក សាំង សុខន មន្ត្រីអាវុធហត្ថ ដែលគ្រប់គ្រងដោយលោក កា និងលោក តូ ដែលជាប៉ូលិសសេដ្ឋកិច្ចក្រសួង ៣នាក់នេះគឺជាមនុស្សដែលសំខាន់នៅក្នុងការបើកឲ្យមានសកម្មភាពនៃការដឹកជញ្ជូនឈើចេញពីចំណុចតំបន់ព្រៃឡង់ ក្រៅពីនោះសមត្ថកិច្ចជំនាញពាក់ព័ន្ធដទៃផ្សេងទៀត គឺត្រឹមតែបាយទឹកបន្តិច បន្តួចតែប៉ុណ្ណោះ ។
គេសង្កេតឃើញសកម្មភាពនៃការដឹកជញ្ជូនឈើតាមមធ្យោបាយគ្រប់ប្រភេទចេញពីតំបន់ព្រៃឡង់ នៅតែកើតមានជាបន្តបន្ទាប់ ដោយសារតែមានការសម្របសម្រួល ការបើកភ្លើងខៀវពីសំណាក់សមត្ថកិច្ចជំនាញពាក់ព័ន្ធនៅតំបន់នោះ ។
រីឯការចាប់បង្ក្រាបម្ដងម្កាល លុះត្រាតែមានបទបញ្ជាពីថ្នាក់ដឹកនាំអង្គភាព ទើបកម្លាំងសមត្ថកិច្ចជំនាញពាក់ព័ន្ធនៅតំបន់នោះបង្ក្រាបបាន ប៉ុន្តែហាក់គ្មានប្រសិទ្ធភាពក្នុងការបង្ក្រាប ដោយសារក្រោយការចុះទៅបង្ក្រាបបាន៣-៤ថ្ងៃក៏ដំណើរការឡើងវិញ ជាក់ស្ដែងដូចករណីដឹកជញ្ជូនឈើឈ្លីកខ្លុំ ចេញពីដែនជម្រកសត្វព្រៃឡង់ទៅលក់ឱ្យក្រុមហ៊ុនស៊ីងបាយអូថេក ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ